អភិបាលខេត្តព្រៃវែង ប្រគល់ប័ណ្ណសរសើរ និងរង្វាន់លើកទឹកចិត្តដល់មន្ត្រីថ្នាក់ឃុំ សង្កាត់ និងប៉ុស្តិ៍នគរបាលរដ្ឋបាលឃុំ សង្កាត់ ដែលមានស្នាដៃល្អ
ខេត្តព្រៃវៃង៖ឯកឧត្តម សួន សុម៉ាលីន អភិបាលនៃគណៈអភិបាលខេត្តព្រៃវៃង បានថ្លែងក្នុងពិធីផ្សព្វផ្សាយសេចក្តីណែនាំ ស្តីពីការពង្រឹងប្រសិទ្ធិភាពការងារគណៈបញ្ជាការឯកភាពរដ្ឋបាលរាជធានីខេត្ត ក្រុង ស្រុក ខណ្ឌ និងប្រគល់ប័ណ្ណសរសើរ ព្រមទាំងរង្វាន់លើកទឹកចិត្តជូនរដ្ឋបាលឃុំ សង្កាត់ និងប៉ុស្តិ៍រដ្ឋបាលឃុំ សង្កាត់ ដែលមានស្នាដៃល្អក្នុងការអនុវត្តគោលនយោបាយភូមិ-ឃុំ-សង្កាត់ មានសុវត្ថិភាព ក្នុងខេត្តព្រៃវែង នាព្រឹកថ្ងៃទី២៨ ខែមីនា ឆ្នាំ២០២៤ ថា លើការងារសន្តិសុខសណ្តាប់សាធារណៈ និងសុវត្ថិភាពសង្គមក្នុងដែនសមត្ថកិច្ចរបស់ខេត្ត ជារួម រក្សាការពារបានយ៉ាងល្អប្រសើរ ជាពិសេសខេត្តបានយកចិត្តទុកដាក់អនុវត្តជាប់ជាប្រចាំនូវបណ្តាវិធានការនានា ក្នុងការពង្រឹងការអនុវត្តគោលនយោបាយភូមិ-ឃុំ-សង្កាត់មានសុវត្ថិភាពនៅគ្រប់មូលដ្ឋាន ជាមួយនោះខេត្ត ក៏បានយកចិត្តទុកដាក់ក្នុងការចាត់វិធានការទប់ស្កាត់បទល្មើសនានា និងសកម្មភាពអសកម្មមួយចំនួន សំដៅ បង្កលក្ខណៈសុខដុមរម្យនាដល់ការរស់នៅ និងការប្រកបមុខរបរក្នុងជីវភាពប្រចាំថ្ងៃរបស់ប្រជាពលរដ្ឋបានល្អ ប្រសើរ។
ជាក់ស្តែងនៅក្នុងឆ្នាំ២០២៣ ក្រោមការខិតខំប្រឹងប្រែង និងយកចិត្តទុកដាក់ខ្ពស់របស់កងកម្លាំង មានសមត្ថកិច្ច និងអាជ្ញាធរគ្រប់លំដាប់ថ្នាក់ ក្នុងការអនុវត្តគោលនយោបាយភូមិ ឃុំ សង្កាត់ មានសុវត្ថិភាព ជារួមទទួលបានលទ្ធផលល្អប្រសើរ រួមទាំងការបង្ក្រាបបទល្មើសព្រហ្មទណ្ឌ ការងារប្រឆាំងគ្រឿងញៀន បង្ក្រាបក្មេងទំនើង ល្បែងស៊ីសង និងការកាត់បន្ថយគ្រោះថ្នាក់ចរាចរណ៍ ។ជាមួយនោះបានជំរុញនូវការផ្សព្វផ្សាយ និងការៀបចំវេទិការសាធារណៈនៅមូលដ្ឋាន ដើម្បីបង្កើននូវការស្រឡាញ់ជឿទុកចិត្តរបស់ប្រជាពលរដ្ឋ មកលើកម្លាំងសមត្ថកិច្ច និងអាជ្ញាធរគ្រប់លំដាប់ថ្នាក់ ព្រមទាំងចូលរួមក្នុងការអនុវត្តគោលនយោបាយភូមិឃុំសង្កាត់ មានសុវត្ថិភាព និងបានស្ម័គ្រចិត្តចូលរួមក្នុងចលនាប្រជាការពារ យាមកាមការពារភូមិ ឃុំ ។
ឯកឧត្ដម បន្តទៀតថា ទោះបីជា ការអនុវត្តគោលនយោបាយភូមិឃុំមានសុវត្ថិភាព ត្រូវបានប្រជាពលរដ្ឋជឿជាក់ និងទុកចិត្ត មកលើការអនុវត្តរបស់សកម្ថកិច្ច និងអាជ្ញាធរ ក៏យើងនៅមានបញ្ហាមួយចំនួនដូចជា ការផ្សព្វផ្សាយមិនទាន់ បានទូលំទូលាយ, ការយល់ដឹងរបស់ប្រជាពលរដ្ឋនៅមានកម្រិត និង ការយាមកាមរបស់ក្រុមប្រជាការពារ តាមគោលដៅមិនទាន់បានជាប់ជាប្រចាំ ។
ជាមួយគ្នានោះឯកឧត្ដម ក៏បានណែនាំ អាជ្ញាធរទាំងអស់ ត្រូវលើកកម្ពស់ប្រសិទ្ធភាពក្នុងការផ្តល់សេវាជូនប្រជាពលរដ្ឋ ត្រូវធ្វើយ៉ាងណាធានាឲ្យបាននូវដំណើរការផ្តល់សេវាសាធារណៈទៅដោយរលូន និងមិនមានកត្តារាំងស្ទះ ដើម្បីទទួលបានការគាំទ្រ និងសាទរពីប្រជាពលរដ្ឋ ដែលជាអ្នកស្នើសុំសេវា ស្របតាមគោលដៅរបស់រាជរដ្ឋាភិបាល ដែលបានបង្ខិតសេវាឱ្យកាន់តែកៀកជិតប្រជាពលរដ្ឋ និងនីតិវិធីមានលក្ខណៈសាមញ្ញ តម្លាភាព គណនេយ្យភាព ភាពជឿជាក់ ទុកចិត្តបាន និងគ្មានអំពើពុករលួយ។ ពិសេសខិតខំយកចិត្តទុកដាក់ដោះស្រាយសំណើរ សំណូមពរ និងបញ្ហាប្រឈមជូនប្រជាពលរដ្ឋ ។ ត្រូវពង្រឹងប្រសិទ្ធភាពអនុវត្តការងារនៃរដ្ឋបាលក្រុង ស្រុក និងឃុំ សង្កាត់ រចនាសម្ព័ន្ធនៃ រដ្ឋបាលបាលក្រុង ស្រុកទូទាំងខេត្ត ទាំងបុគ្គលិក ទាំងធនធាន ត្រូវបានធ្វើសមាហរណកម្ម ដូចនេះក្រុង ស្រុក ត្រូវប្រមូលផ្តុំការដឹកនាំគ្រប់វិស័យក្នុងដែនដីរបស់ខ្លួន ប្រកបដោយគុណភាព ប្រសិទ្ធភាព និងឲ្យមានភាព ឆ្លើយតបខ្ពស់ជាងមុន។ ជាមួយនេះ រដ្ឋបាលឃុំ សង្កាត់ ត្រូវពង្រឹងការអនុវត្តតួនាទី ភារកិច្ច និងបំពេញការងារ របស់ខ្លួន ជាពិសេសការអនុវត្តការងារតាមទម្រង់ “ការងារនគរបាល និងសហគមន៍” ដែលជាស្នូលនៃចលនា អនុវត្តភូមិឃុំសង្កាត់ មានសុវត្ថិភាព៕
