លោក នុត ពុធដារ៉ា ជំរុញឲ្យអាជ្ញាធរក្រុងតាខ្មៅ ត្រូវចុះពិនិត្យនៅតាមខ្នងផ្ទះរបស់ប្រជាពលរដ្ឋ សាលាក្រុង មណ្ឌលសុខភាព សាលារៀន វត្តអារ៉ាម ការ៉ាសសាំង អាហារដ្ឋាន ប៉ុស្តិ៍នគរបាលរដ្ឋបាលសង្កាត់ និងសាលាសង្កាត់ ជាដើម ត្រូវមានបង្គន់អនាម័យប្រើប្រាស់បានត្រឹមត្រូវ
ខេត្តកណ្ដាល៖ក្នុងកិច្ចប្រជុំស្ដីពី ចុះផ្ទៀងផ្ទាត់ស្ថានភាពបញ្ចប់ការបន្ទោបង់ពាសវាលពាសកាលកម្រិតខ្ពស់ (ODF+) ក្នុងក្រុងតាខ្មៅ នាព្រឹកថ្ងៃទី០២ ខែកុម្ភៈ ឆ្នាំ២០២៤ លោក នុត ពុធដារ៉ា អភិបាលរងខេត្តកណ្ដាល បានមានប្រសាសន៍ជំរុញដល់អាជ្ញាធរក្រុងតាខ្មៅ ត្រូវចុះពិនិត្យសង្កាត់ទាំង១០ ធ្វើយ៉ាងណាឱ្យនៅតាមខ្នងផ្ទះរបស់ប្រជាពលរដ្ឋ សាលាក្រុង មណ្ឌលសុខភាព សាលារៀន វត្តអារ៉ាម ការ៉ាសសាំង អាហារដ្ឋាន ប៉ុស្តិ៍នគរបាលរដ្ឋបាលសង្កាត់ និងសាលាសង្កាត់ ជាដើម ត្រូវមានបង្គន់អនាម័យប្រើប្រាស់បានត្រឹមត្រូវ មានភាពស្អាត មិនមានក្លិន មានទឹក និងសាប៊ូប្រើប្រាស់បានគ្រប់គ្រាន់។
លោក នុត ពុធដារ៉ា បន្តថា៖ ការចុះផ្ទៀងផ្ទាត់ (ODF+) នៅក្រុងតាខ្មៅ នាពេលនេះគឺជាការចុះវាយតម្លៃដោយថ្នាក់ខេត្ត ដើម្បីបញ្ជាក់អំពីសុក្រិតភាពនៃការអះអាងតាមរយ:សេចក្តីប្រកាសផ្ទៃក្នុង(ODF+) របស់រដ្ឋបាលក្រុងតាខ្មៅ និងការផ្តល់កិត្តិយសប្រកបដោយគុណតម្លៃ ជូនប្រជាពលរដ្ឋក្នុងក្រុងតាខ្មៅ ដែលបានចូលរួមប្រតិបត្តិអនាម័យល្អ ស្របតាមគោលការណ៍ណែនាំ របស់ក្រសួងអភិវឌ្ឍន៍ជនបទ។ បន្ទាប់ពីការត្រួតពិនិត្យថ្នាក់ ភូមិ សង្កាត់ ក្រុង បានបញ្ចប់រួចជាស្ថាពរហើយ ក្រុមការងារថ្នាក់ជាតិនឹងចុះមកវាយតម្លៃថ្នាក់ខេត្តវិញម្ដង។ ហើយការចុះរបស់ថ្នាក់ជាតិក៏ដូចជាថ្នាក់ខេត្តដែរ គឺមានការចាប់ឆ្នោតយកស្រុក ក្រុង ឃុំ សង្កាត់ និងភូមិ ដើម្បីចុះត្រួតពិនិត្យ។ ដូច្នេះអាជ្ញាធរ ភូមិ សង្កាត់ ក្រុង ត្រូវត្រៀមខ្លួនឱ្យរួចរាល់ ត្រូវប្រាកដថាក្នុងមូលដ្ឋានរបស់ខ្លួនគឺនៅតាមខ្នងផ្ទះរបស់ប្រជាពលរដ្ឋ សាលាក្រុង មណ្ឌលសុខភាព សាលារៀន វត្តអារ៉ាម ការ៉ាសសាំង អាហារដ្ឋាន ប៉ុស្តិ៍នគរបាលរដ្ឋបាលសង្កាត់ និងសាលាសង្កាត់ ត្រូវមានបង្គន់អនាម័យប្រើប្រាស់បានត្រឹមត្រូវ មានភាពស្អាត មិនមានក្លិន មានទឹក និងសាប៊ូ សំដៅធ្វើឱ្យការចុះវាយតម្លៃ (ODF+) ក្នុងខេត្តកណ្ដាលទទួលបានលទ្ធផលល្អប្រសើរ។
លោកងភិបាលរងបានបន្ថែមថា៖ រដ្ឋបាលខេត្តកណ្តាល ក្រោមការដឹកនាំរបស់ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្ត បានធ្វើឱ្យមានការអភិវឌ្ឍលើគ្រប់វិស័យ ក្នុងនោះ វិស័យផ្គត់ផ្គង់ទឹកស្អាត និងអនាម័យជនបទ មានការរីកចម្រើនគួរឱ្យកត់សម្គាល់ គឺសង្ឃឹមជឿជាក់ថា “ខេត្តកណ្តាលធ្វើបាន” ហើយធ្វើបានយ៉ាងល្អ ដើម្បីសម្រេចឱ្យបានជាខេត្តបញ្ចប់ការបន្ទោបង់ពាសវាលពាសកាលកម្រិតខ្ពស់(ODF+) ក្នុងពេលឆាប់ៗខាងមុខនេះ។ អភិបាលរងខេត្ត មានជំនឿជឿជាក់ថា ការជំរុញឱ្យសម្រេចបាន(ODF+) នេះគឺពិតជាអាចធ្វើទៅបាន ហើយធ្វើបានយ៉ាងលឿន ថែមទៀតផង។ ព្រោះបើយោងលើសូចនាករ ដូចដែលតំណាងមន្ទីរអភិវឌ្ឍន៍ជនបទ បានលើកឡើងនាពេលមុននេះ គឺខេត្តកណ្តាលហាក់ដូចជាមានស្ទើរគ្រប់លក្ខខណ្ឌស្រេចទៅហើយ៕
