បុគ្គលិកអគ្គីសនីខេត្តកំពង់ឆ្នាំងម្នាក់ ត្រូវបានខ្សែភ្លើងឆក់ស្លាប់ នៅពេលដឹកបញ្ជូនទៅសង្គ្រោះនៅមន្ទីរពេទ្យបង្អែកខេត្ត
ខេត្តកំពង់ឆ្នាំង៖ បុគ្គលិកអគ្គីសនីម្នាក់ ឡើងលើបង្គោលដោះខ្សែភ្លើង ដើម្បីរំកិលបង្គោល តែសង្ស័យខុសបច្ចេកទេស បណ្ដាលឱ្យឆក់ស្លាប់ ពេលដឹកទៅសង្គ្រោះនៅឯមន្ទីរពេទ្យបង្អែកខេត្តកំពង់ឆ្នាំង
នៅថ្ងៃទី១៩ ខែមករា ឆ្នាំ២០២៤ នៅចំណុចព្រែកល្វា ស្ថិតក្នុងភូមិភូមិតាមល់លើ ឃុំកោះថ្កូវ ស្រុកជលគិរី ខេត្តកំពង់ឆ្នាំង។
ប្រភពព័ត៌មានបានឲ្យដឹងថា៖ ជនរងគ្រោះមានឈ្មោះ សុខ តេងភេទប្រុសអាយុ ៣៦ឆ្នាំ រស់នៅភូមិទឹកល្អក់ ឃុំក្រាំងលាវ ស្រុករលាប្អៀរ ខេត្តកំពង់ឆ្នាំង។
ប្រភពដដែលបន្តថា មុនពេលកើតហេតុជនរងគ្រោះ បានឡើងទៅលើបង្គោលភ្លើង ដើម្បីដោះខ្សែភ្លើងរំកិលបង្គោលចេញ ដើម្បីកុំឲ្យទើសផ្លូវប្រជាពលរដ្ឋបើកបរឆ្លងកាត់។ ពេលឡើងទៅលើបង្គោល បានប៉ះខ្សែភ្លើងបណ្ដាលឲ្យឆក់ ជនរងគ្រោះសន្លប់ជាប់នៅលើបង្គោល ភ្លាមនោះក្រុមការងារខាងអគ្គិសនី បាននាំគ្នាឡើងទៅយកជនរងគ្រោះចុះមកដី និងបានដឹកតាមរថយន្តទៅសង្គ្រោះនៅមន្ទីរពេទ្យបង្អែកខេត្ត តែជាអកុសលជនរងគ្រោះបានស្លាប់បាត់ទៅហើយ។
ក្រោយពីពិនិត្យសាកសពរួចរាល់ហើយ សមត្ថកិច្ចនគរបាលជំនាញ បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
