អបអរសាទរព្រះរាជកំណើតព្រះយេស៊ូវគ្រីស្ទ គ្រីស្តម៉ាស (Merry Christmas) សុខដុមនីយកម្មសាសនា ក្នុងខេត្តបន្ទាយមានជ័យ
ខេត្តបន្ទាយមានជ័យ៖ ឯកឧត្តម សៀ សុភ័ក្រ រដ្ឋលេខាធិការក្រសួងធម្មការ និងសាសនា តំណាងដ៏ខ្ពង់ខ្ពស់ ឯកត្តមបណ្ឌិត ងាយ បូរិន រដ្ឋមន្ត្រីក្រសួងធម្មការនិងសាសនា ឯកឧត្តម ប្លែក វ៉ារី ប្រធានក្រុមប្រឹក្សាខេត្ត និង ឯកឧត្តម អ៊ុំ រាត្រី អភិបាលនៃគណៈអភិបាលខេត្ត អញ្ជើញជាអធិបតីភាពក្នុងពិធីបុណ្យណូអែល និងចែកអំណោយមនុស្សធម៌ ដល់ប្រជាពលរដ្ឋដែលមានជីវភាពខ្វះខាត ចំនួន៣០០គ្រួសារ នារាត្រីថ្ងៃទី២៥ ខែធ្នូ ឆ្នាំ២០២៣ នៅបរិវេណសួនមានជ័យ។
ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានមានប្រសាសន៍ថា ផ្តើមចេញពីស្មារតីរួមសាមគ្គីគ្នា ចេះយោគយល់គ្នា អធ្យាស្រ័យគ្នានិងគោរពគ្នាទៅវិញទៅមក ដែលជាមូលដ្ឋានគ្រឹះ នៃវប្បធម៌សន្តិភាពដូចមានបញ្ញត្តិក្នុងគោលលទ្ធិជំនឿនិង វិន័យសាសនានីមួយៗ ដោយប្រកាន់ខ្ជាប់នូវគោលជំនឿសាសនារៀងៗខ្លួនដែលជាមាគ៌ានៃសច្ចធម៌ របស់សាសនានីមួយៗ ដើម្បីដឹកនាំបរិស័ទនៃសាសនារបស់ខ្លួនអោយទទួលបាននូវសេចក្តីសុខស្ងប់ និងសុភមង្គលក៏ដូចជាធ្វើអោយសង្គមមានសន្តិភាព សន្តិសុខ និងសណ្តាប់ធ្នាប់សង្គមបានល្អ ហើយធ្វើអោយប្រទេសជាតិយើងមានការអភិវឌ្ឍ និងរីកចម្រើនជឿនលឿនដូចបណ្តាប្រទេស នានាក្នុងពិភពលោក។
ឯកឧត្តម អ៊ុំ រាត្រី បានបន្តថា បងប្អូនគ្រីស្ទបរិស័ទ ជាពិសេសគណៈកម្មការទាំងអស់ នឹងបន្តនូវគោលជំហររួបរួម ជ្រោមជ្រែង ដល់ការដឹកនាំ ដ៏ឈ្លាសវៃរបស់ប្រមុខរាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជានាយរដ្ឋមន្រ្តី ក៏ដូចជាការរួមចំណែកអភិវឌ្ឍន៍សង្គមជាមួយរដ្ឋបាលខេត្តបន្ទាយមានជ័យផងដែរ ត្បិតក្នុងគម្ពីរ ព្រះគ្រីស្ទ បានចែងថា ត្រូវគោរពចុះចូលជាមួយនឹងរដ្ឋអំណាច។
នាឱកាសនោះ ឯកឧត្តម អ៊ុំ រាត្រី បានគាំទ្រក្នុងការដឹកនាំគ្រីបរិស័ទ និងគ្រីស្ទបរិស័ទទាំងអស់ដែលបានរួបរួមសាមគ្គីគ្នា និងបំពេញភារកិច្ចយ៉ាងសកម្ម ក្នុងការរួមចំណែកក្នុងវិស័យ មនុស្សធម៌ សង្គមកិច្ច និងការអប់រំសីលធម៌ ដើម្បីធ្វើយ៉ាងណាអោយបងប្អូននៃគ្រីស្ទបរិស័ទ ដើរតាមមាគ៌ា បង្ហាញផ្លូវនៃគោលលទ្ធិជំនឿ និងវិន័យគ្រីស្ទសាសនា ដែលជាតំលៃនៃវប្បធម៌សន្តិភាព ធ្វើអោយបងប្អូនគ្រីស្ទបរិស័ទមានសីលធម៌រស់នៅស្អាតស្អំ ប្រកបដោយសុខសន្តិភាព ជាមួយសហគមន៍សាសនារបស់ខ្លួន ក៏ដូចជា ជាមួយសហគមន៍សាសនាដទៃទៀត ក្នុងសង្គមជាតិយើង ព្រមទាំងធ្វើអោយសង្គមមានការអភិវឌ្ឍន៍ និងរីកចម្រើនជឿនលឿនផងដែរ។
ឯកឧត្តម សៀ សុភ័ក្រ រដ្ឋលេខាធិការក្រសួងធម្មការ និងសាសនា បានមានប្រសាសន៍ពាំនាំផ្ដាំផ្ញើសាកសួរសុខទុក្ខ និងនឹករលឹកពីប្រមុខរាជរដ្ឋាភិបាល និងពីថ្នាក់ដឹកនាំគ្រប់លំដាប់ថ្នាក់ក្នុងខេត្ត ចំពោះបរិស័ទគ្រឹស្តសាសនិកទាំងអស់ ដែលកំពុងគោរព និងប្រតិបត្តិសាសនានៅក្នុងខេត្ត ក៏ដូចជានៅក្នុងព្រះរាជាណាចក្រកម្ពុជា។ ពិធីបុណ្យណូអែល ឬ គ្រីស្តម៉ាស (Christmas) គឺជាពិធីបុណ្យមួយដែលបានចាប់ផ្ដើម តាំងពី២០០ឆ្នាំ ក្រោយគ្រឹស្តសករាជ ដែលកាលពីឆ្នាំ២២១ ប្រវត្តិវិទូសម័យក្រុងរ៉ូម ឈ្មោះ Sextus Julius Africanus បានកំណត់ក្នុងសៀវភៅប្រវត្តិពិភពលោករបស់គាត់ ដោយយកថ្ងៃទី២៥ ខែធ្នូ ជាបុណ្យគ្រីស្តម៉ាស ដោយភ្ជាប់ទៅនឹងបុណ្យរដូវរងា ដែលជាឱកាសសប្បាយរីករាយ របស់ជនជាតិជាច្រើនក្នុងតំបន់ត្រជាក់ឈៀងខាងជើងនៃពិភពលោក តមកបុណ្យនេះក៏ចេះតែមានប្រិយភាព ខ្លាំងឡើងចាប់ពីសតវត្សរ៍ទី៤ តរៀងមក។ បុណ្យណូអែល ឬគ្រិស្តម៉ាសនេះ គឺជាទិវាប្រសូតរបស់ព្រះយេស៊ូគ្រឹស្ត ដែលគ្រីស្ទបវិទូទាំង ពិភពលោកតែងប្រារព្ធធ្វើឡើង ដើម្បីអបអរសារទរចំពោះការប្រសូតមកជាមនុស្សរបស់ព្រះយេស៊ូវគ្រីស្ទ ដើម្បីធ្វើជាការដូនៃការប្រោសលោះ ជួយសង្គ្រោះមនុស្សដែលមានបាប។
សូមបញ្ជាក់ផងដែរថា ពិធីនេះក៏មានការចាប់រង្វាន់ផ្សងសំណាង ជូនដល់បងប្អូនប្រជាពលរដ្ឋដែលបានចូលរួម ក្នុងនោះរួមមាន ម៉ូតូចំនួន ២ គ្រឿង ទូទឹកកកចំនួន ២ គ្រឿង កង់អាគុយចំនួន២ គ្រឿង កង់ចំនួន ៣ គ្រឿង កង្ហារចំនួន ៥ គ្រឿង ឆ្នាំងបាយអគ្គិសនីចំនួន ៥ គ្រឿង និងបំពង់ទឹកក្ដៅអគ្គិសនីចំនួន ៥ គ្រឿងផងដែរ៕
