កម្មវិធីបើកបវេសនកាលឆ្នាំសិក្សា ២០២២-២០២៣ នៅសាលាកម្រងពុទ្ធិកបឋមសិក្សា វត្តស្រះត្រាច និងវត្តកូនដំរី ក្រុងប៉ោយប៉ែត
(បន្ទាយមានជ័យ)៖ថ្លែងក្នុងពិធីបើកបវេសនកាល ឆ្នាំសិក្សា២០២២ - ២០២៣ របស់សមណៈសិស្សចំនួន២ វត្ត មានវត្តស្រះត្រាច និងវត្តកូនដំរី ស្ថិតនៅក្នុងក្រុងប៉ោយប៉ែត កាលលពីព្រឹកថ្ងៃទី៧ ខែមិថុនា ឆ្នាំ២០២២ ក្រោមអធិបតីភាព ព្រះឧត្ដមសីលញាន ធុល សុធា ព្រះមេគណខេត្ត លោក បៀវ ថាន ប្រធានមន្ទីរធម្មការ និងសាសនាខេត្តបន្ទាយមានជ័យ បានលើកឡើងថា ការសិក្សារៀនសូត្រ ជាមូលដ្ឋានគ្រឹះដ៏រឹងមាំ ជាថ្នាលបណ្តុះបណ្តាលធនធានមនុស្ស ទាំងពុទ្ធចក្រនិងអាណាចក្រ ឲ្យមានការរីកចម្រើនឡើង។
ក្នុងនាមជាព្រះគ្រូចៅអធិការវត្តទាំងពីរដែលបានបើកបវេសនាកាល ថ្មីនេះដើម្បីឲ្យសមណៈសិស្សបានរៀនសូត្រសូមថ្លែងនូវអំណរគុណនិងអំណរព្រះគុណ ចំពោះព្រះថេរានុត្ថេរៈគ្រប់ព្រះអង្គ ឯកឧត្តមលោកជំទាវ លោកឧកញ៉ា ប្រជាពុទ្ធបរិស័ទ សប្បុរស តែងតែបរិច្ចាគ រួមចំណែក កសាងចំណេះដឹងផ្ទាល់នូវវិស័យពុទ្ធិកសិក្សា ឲ្យមានដំណើរការរៀនសូត្រមានការរីកចម្រើន គួរជាទីមោទនៈ និងសូមបន្តជួយគាំទ្រនូវវិស័យពុទ្ធិកសិក្សា ដើម្បីបុព្វហេតុនៃការអភិវឌ្ឍនូវធនធានព្រះសង្ឃ។
លោក បៀវ ថាន និងព្រះឧត្ដមសីលញាន ធុល សុធាបានមានប្រសាសន៍លើកឡើងថា ដើម្បីឲ្យស្របតាមការណែនាំរបស់អគារធិការដ្ឋាន លេ ២២៥/២២ ពុទ្ធិកសិក្សាជាតិ ក្នុងឱកាសបើកបវេស្សនកាលឆ្នាំសិក្សា២០២២ – ២០២៣ទូទាំងព្រះរាជាណាចក្រកម្ពុជាឲ្យមានភាពរលូន និងមានប្រសិទ្ធភាព ស្ថាប័នពាក់ព័ន្ធអាជ្ញាធរដែនដីគ្រប់គ្រងសាលាពុទ្ធិក លោកគ្រូ អ្នកគ្រូ សាស្ត្រាចារ្យគ្រប់ភូមិសិក្សា ត្រូវបន្តអនុវត្តនូវវិធានការនានា ដែលរាជរដ្ឋាភិបាលបានដាក់ចេញ ដើម្បីចូលរួមប្រយុទ្ធប្រឆាំង នឹងជំងឺកូវីដ១៩ និងជំងឺឆ្លងដទៃទៀតគ្រប់ភូមិសិក្សា ត្រូវបន្តរៀបចំបរិស្ថានសាលា មានទឹកស្អាតបង្គន់អនាម័យ កន្លែងលាងដៃឲ្យស័ក្ដិសមជាកន្លែងសម្រាប់ការអប់រំសិស្ស។
លោកគ្រូ អ្នកគ្រូ ត្រូវបន្តដើរតួនាទីជាបុគ្គលនាំមុខឪពុកម្ដាយទីពីរ ទីប្រឹក្សានិងជាអ្នកច្នៃប្រឌិត ព្រមទាំងត្រូវខិតខំប្រឹងប្រែង អភិវឌ្ឍនូវសមត្ថភាពរបស់ខ្លួនជាប្រចាំទាំងផ្នែកចំណេះដឹងទាំងពិធីសារបង្រៀន បច្ចេកវិទ្យាឌីជីថលមកបង្ហាត់បង្រៀន ដល់សមណសិស្សសមណនិស្សិតឲ្យ មានចំណេះដឹងទូលំទូលាយដើម្បីក្លាយខ្លួនជាអ្នកបន្តវេនដ៏មានសក្ដានុពលនាពេលអនាគត។សិស្សទាំងអស់ត្រូវបន្តខិតខំរៀនសូត្រស្រាវជ្រាវឲ្យបានខ្ជាប់ខ្ជួនព្រមទាំងចូលរួមយ៉ាងសកម្ម ក្នុងការកសាងអំពើល្អនិងចាក់ឲ្យផុតនូវអំពើអបាយមុខផ្សេងៗ ៕
