សាខាកាកបាទក្រហមកម្ពុជា ខេត្តកណ្តាល នាំយកអំណោយចែកជូនប្រជាពលរដ្ឋ ដែលរងគ្រោះដោយសារខ្យល់កន្ត្រាក់ចំនួន៣ឃុំ ក្នុងស្រុកពញាឮ
ខេត្តកណ្ដាល៖លោក ទៀង សុគន្ធ នាយកសាខាកាកបាទក្រហមកម្ពុជាខេត្តកណ្តាល តំណាងឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត នារសៀលថ្ងៃទី២ ខែមិថុនា ឆ្នាំ២០២២ បានដឹកនាំប្រតិភូសាខា និងអជ្ញាធរពាក់ព័ន្ធ អញ្ជើញចុះសួរសុខទុក្ខ និងនាំយកអំណោយមនុស្សធម៌ របស់សាខាកាកបាទក្រហមកម្ពុជាខេត្ត ចែកជូនដល់ប្រជាពលរដ្ឋដែលរងគ្រោះដោយសារខ្យល់កន្ត្រាក់ បណ្តាលឱ្យខូចខាតផ្ទះសម្បែងរបស់ពួកគាត់នៅក្នុងឃុំភ្នំបាត ឃុំផ្សារដែក និងឃុំជ្រៃលាស់ ស្រុកពញាឮ សរុបចំនួន២៧ខ្នងផ្ទះ ក្នុងនោះផ្ទះរងការខូចខាតធ្ងន់ធ្ងរមានចំនួន ៥ខ្នង និងខូចខាត់ស្រាលចំនួន ១៩ខ្នងផ្ទះ។
ក្នុងឱកាសនោះលោកនាយកសាខា បាននាំមកនូវប្រសាសន៍ផ្ដាំផ្ញើសួរសុខទុក្ខពីសំណាក់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្ដេច តែងតែគិតគូរពីសុខទុក្ខ របស់បងប្អូនប្រជាពលរដ្ឋគ្រប់ពេលវេលា និងគ្រប់ទីកន្លែង និងបានសម្តែងការសោកស្តាយចំពោះការខូចខាតទ្រព្យសម្បត្តិ ផ្ទះសម្បែងដែលបង្ករដោយគ្រោះធម្មជាតិនាពេលនេះ។ ថ្វីត្បិតតែអំណោយមនុស្សធម៌ដែលបាននាំយកមកចែកជូននាពេលនេះមានចំនួនមិនសមល្មម នឹងការខាតបង់របស់បងប្អូនក្ដី តែក៏អាចជួយសម្រាលទុក្ខលំបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា”។
អំណោយដែលបាននាំយកមកប្រគល់ជូនប្រជាពលរដ្ឋរងគ្រោះទាំង ២៧គ្រួសារ នាពេលនេះ ក្នុងមួយគ្រួសារទទួលបានអង្ករ ២៥kg មី០១កេស ត្រីខកំប៉ុង០១យួរ ទឹកត្រី០១យួរ ទឹកស៊ីអ៊ីវ០១យួរ ទឹកសុទ្ធ០១កេស ជែល០១ដប ម៉ាស០១ប្រអប់ និងគ្រួសាររងគ្រោះធ្ងន់ធ្ងរចំនួន៥គ្រួសារ ក្នុងមួយគ្រួសារទទួលបានថវិកាចំនួន ៤០ម៉ឺនរៀល ន។គ្រួសាររងគ្រោះដោយអន្លើចំនួន១៩គ្រួសារ ក្នុង១គ្រួសារទទួលបានថវិកាចំនួន២០ម៉ឺនរៀលផងដែរ៕
