នគរបាលស្រុកស្វាយចេក បង្រ្កាបមុខសញ្ញារក្សាទុក និងប្រើប្រាស់គ្រឿងញៀន ដោយឃាត់ខ្លួនជនសង្ស័យបានចំនួន០៥នាក់
(បន្ទាយមានជ័យ)៖មុខសញ្ញារក្សាទុក និងប្រើប្រាស់នូវសារធាតុញៀនដោយខុសច្បាប់ ចំនួន០៥នាក់ ត្រូវបានកម្លាំងនគរបាលស្រុកស្វាយចេកចាបឃាត់ខ្លួនបានជាបន្តបន្ទាប់កាលពីវេលាម៉ោង១២ថ្ងៃត្រង់ ថ្ងៃទី២០ ខែមិថុនា ឆ្នាំ២០២២ នៅចំណុចស្ពានលេខ៨ ខាងត្បូងស្រុកថ្មពួកប្រហែល ៣,០០០ ម៉ែត្រ ក្នុងប្រទល់ស្រុកស្វាយចេក និងស្រុកថ្មពួក(ភូមិសាស្ត្រស្រុកថ្មពួក) ខេត្តបន្ទាយមានជ័យ ។
លោកវរសេនីយ៍ឯក ជា ស្លូញ អធិការនគរបាលស្រុកស្វាយចេក បានឲ្យដឹងថា៖ដំបូងកម្លាំងនគរបាលនៃអធិការដ្ឋាននគរបាលស្រុកស្វាយចេក ដឹកនាំដោយលោក វរសេនីយ៍ត្រី ដោក ខាំ អធិការរង បានចុះប្រតិបត្តិការរុករកជនសង្ស័យ ០៣នាក់ ដែលធ្វើសកម្មភាពឆក់កាបូប ក៏ប្រទះឃើញមនុស្ស០១ក្រុមមានគ្នីគ្នាចំនួន០៥នាក់ កំពុងអង្គុយលេងក្នុងខ្ទមទុកចោលមួយកន្លែង ដោយមានការសង្ស័យ កម្លាំងយើងសុំត្រួតពិនិត្យឆែកឆេររកឃើញម្សៅក្រាមពណ៌សថ្លា ០២ កូនថង់ បំពង់កែវសម្រាប់ជក់ ០២ ដើម ដែកកេះ ០១ និងកូនថង់សម្រាកច្រកថ្នាំមួយចំនួន ហើយក៏ឃាត់ខ្លួនមកអធិការដ្ឋាននគរបាលស្រុកស្វាយចេក។
លោកអធិការបានបញ្ជាក់ថា៖ជនសង្ស័យទាំង០៥នាក់រួមមាន៖
១-ឈ្មោះ រ៉ិត សំរ៉ាច់ ភេទប្រុស អាយុ ២០ ឆ្នាំ នៅភូមិគំរូ ឃុំគំរូ ស្រុកថ្មពួក (ម្សៅក្រាម ០១ កូនថង់)។
២-ឈ្មោះ ដូង សំណាង (ហៅវិត) ភេទប្រុស អាយុ ២៣ ឆ្នាំ នៅភូមិវត្តចាស់ ឃុំថ្មពួក។
៣-ឈ្មោះ ដឿយ ដេត ភេទប្រុស អាយុ ១៦ ឆ្នាំ នៅភូមិថ្មពួក ឃុំថ្មពួក។
៤-ឈ្មោះ ម៉ី កាមុត ភេទប្រុស អាយុ ២០ ឆ្នាំ នៅភូមិថ្មពួក ឃុំថ្មពួក។
៥-ឈ្មោះ យឿត យ៉ា ភេទប្រុស អាយុ ២៣ ឆ្នាំនៅភូមិថ្មពួក ឃុំថ្មពួក ម្សៅក្រាម០១កូនថង់ ។ជនសង្ស័យទាំង០៥នាក់ កម្លាំងនគរបាលផ្នែកជំនាញប្រឆាំងគ្រឿងញៀន បានធ្វើតេស្តទឹកនោម ជាលទ្ធផលវិជ្ជមានទាំង០៥នាក់ ។បច្ចុប្បន្នមុខសញ្ញាទាំង០៥នាក់ ដែលរក្សាទុកនិងប្រើប្រាស់គ្រឿងញៀននេះ កម្លាំងផ្នែកជំនាញប្រឆាំងគ្រឿងញៀន រៀបចំសំណុំរឿងបញ្ជូនទៅស្នងការដ្ឋាននគរបាលខេត្តបន្ទាយមានជ័យ ដើម្បីចាត់ការបន្តតាមនិតិវិធី៕