សម្តេចតេជោ បង្ហោះរូបយុវជនដែលជិះកង់ចាស់ ចូលរួមដង្ហែក្បូនគណបក្សប្រជាជនកម្ពុជា ដោយ បង្កប់នូវអត្ថន័យថា«កូនប្រុសទោះកូនក្រទ្រព្យសម្បត្តិតែទឹកចិត្តកូនមិនក្រទេ»
(ភ្នំពេញ)៖ក្រោយពីមានការបង្ហោះនៅលើបណ្តាយសង្គមហ្វេសប៊ុក ធ្វើឲ្យមានការចាប់អារម្មណ៍យ៉ាងខ្លាំង ជុំវិញយុវជនម្នាក់ជិះកង់ចាស់ ចូលរួមដង្ហែក្បូនគណបក្សប្រជាជនកម្ពុជា ដោយពាក់មួក ពាក់អាវរូបទេវតាបាចផ្កា និងទង់ជាតិ រួមទាំងមានប្រអប់បាយ ១ប្រអប់ផងនោះ នៅថ្ងៃទី២៤ ខែឧសភា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជា ក៏បានបង្ហោះរូបថតយុវជនរូបនោះដោយភ្ជាប់ជាមួយពាក្យបង្កប់នូវអត្ថន័យយ៉ាងជ្រាលជ្រៅ សម្រាប់ប្រជាជនកម្ពុជា។
យោងតាមផេកផ្លូវការរបស់សម្តេចតេជោ ហ៊ុន សែន បានបង្ហោះរូបថតចំនួន៣សន្លឹក អមដោយសំណេដ៏មានអត្ថន័យថា «កូនប្រុស ទោះកូនក្រទ្រព្យសម្បត្តិ តែទឹកចិត្តកូនមិនក្រទេ។ ទឹកមុខកូនពោរពេញដោយស្នាមញញឹមបង្ហាញថា គណបក្សប្រជាជនជារបស់ប្រជាជន ហើយក៏ជារបស់កូនដែរ ដែលកូនត្រូវចូលរួមការពារ ដើម្បីបុព្វហេតុសន្តិភាព និងការអភិវឌ្ឍ»៕
