ឃាត់ខ្លួនជនជាតិចិន៥នាក់ ខណៈសម្ងំផលិត និងចែកចាយគ្រឿងញៀន នៅទីតាំងមួយក្នុងចម្ការស្វាយ ស្រុកភ្នំស្រួច
ខេត្តកំពង់ស្ពឺ៖ករណីផលិត និងចែកចាយគ្រឿងញៀន របស់ជនជាតិចិន ត្រូវកម្លាំងសមត្ថកិច្ចចុះបង្ក្រាបនិងឃាត់ខ្លួនជនជាតិចិនបានចំនួន៥នាក់ កាលពីយប់ ថ្ងៃទី២០ ខែឧសភា ឆ្នាំ២០២២ នៅចំណុចចម្ការស្វាយ ស្ថិតនៅក្នុងភូមិស្រល់ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។ក្រុមជនសង្ស័យជាជនជាតិចិន ដែលសមត្ថកិច្ចឃាត់ខ្លួនបានទាំង៥នាក់មិនទាន់ស្គាល់អត្តសញ្ញាណនៅឡើយទេ។
សមត្ថកិច្ចបានបញ្ជាក់ថា នៅមុនពេលចុះបង្ក្រាបទីតាំងផលិតគ្រឿងញៀននេះ គឺក្រុមការងារចម្រុះដែលដឹកនាំដោយលោកឧត្ដមសេនីយ៍ទោ សិរី បុត្រសត្យា នាយករងមន្ទីរប្រឆាំងគ្រឿងញៀន ដោយមានការសម្របសម្រួលពីលោក ខៃ សម្ភស្ស ព្រះរាជអាជ្ញារងអមសាលាដំបូងខេត្តកំពង់ស្ពឺ និងមានការចូលរួមពីលោកស្រីឧត្ដមសេនីយ៍ឯក ឈឹម សិទ្ធបុណ្យរិទ្ធ អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន និងមន្ត្រីសមត្ថកិច្ចជាច្រើនរូបថែមទៀតផង។
សមត្ថកិច្ចបានបញ្ជាក់ទៀតថា ក្រោយធ្វើការបង្ក្រាបទីតាំងផលិតគ្រឿងញៀននេះ កម្លាំងដកហូតបានវត្ថុតាងរួមមាន៖សារធាតុគីមីផ្សំសរុបទម្ងន់៦០ គីឡូក្រាម ,សារធាតុគីមីសរុបទម្ងន់ ៥២៨០ គីឡូក្រាម។បន្ទាប់ពីចុះត្រួតពិនិត្យរួចមក ក្រុមការងារបានធ្វើការបិទគ្រប់បន្ទប់ទាំងអស់ និងបានប្រគល់ឃ្លាំងខាងលើឱ្យអធិការនគរបាលស្រុកភ្នំស្រួចគ្រប់គ្រង រង់ចាំស្រាវជ្រាវបន្តទៀត៕