ឯកឧត្តម ជា សុមេធី និងលោកជំទាវ នាំយកសម្ភារៈបរិក្ខាប្រគេនព្រះសង្ឃ ដែលគង់នៅវត្តសំសមី ក្រុងព្រៃវែង
(ព្រៃវែង)៖ឯកឧត្តម ជា សុមេធី អភិបាលខេត្តព្រៃវែង និងលោកជំទាវ ជា ផល្គុន កាលពីថ្ងៃទី២៩ ខែមេសា ឆ្នាំ២០២២ បានអញ្ជើញនាំយកសម្ភារៈបរិក្ខា ចង្ហាន់ប្រគេនព្រះសង្ឃ ដែលគង់នៅវត្តសំសមី ស្ថិតក្នុងក្រុងព្រៃវែង ដើម្បីបង្សុកូលឧទ្ទិសកុសលជូនដល់ សម្ដេចអគ្គធម្មពោធិសាល ជា ស៊ីម និងលោកជំទាវ ញ៉ែម សឿន ជាស៊ីម និងលើកទឹកចិត្តដល់ព្រះសង្ឃ អាចារ្យ គណៈកម្មការ ដែលបានចូលរួម រៀបចំនៅក្នុងព្រឹតការឆ្នាំថ្មីព្រៃវែង ដែលរដ្ឋបាលខេត្តព្រៃវែងបានរៀបចំនោះ។
ចំពោះសម្ភារៈបរិក្ខា ចង្ហាន់ នោះក៏បានវេប្រគេនដល់ព្រះសង្ឃ ដើម្បីបង្សុកូលឧទ្ទិសកុសលផលបុណ្យដល់ញាតិការទាំង៧សន្តាន ដែលបានពលីកម្ម ជូនជាតិមាតុភូមិ ជាពិសេស សូមឧទ្ទិសមហាកុសល ផលបុណ្យដល់ ដួងវិញ្ញាណក្ខន្ធរបស់សម្ដេចអគ្គមហាធម្មពោធិសាល ជា ស៊ីម និងលោកជំទាវ ញ៉ែម សឿន ជា ស៊ីម ដែលសម្ដេចបានបូជាសាច់ស្រស់ ឈាមស្រស់ ដើម្បីជាតិមាតុភូមិ ពេញមួយជីវិត ដើម្បីទទួលបាននូវ សន្តិភាព ស្ថេរភាព រហូតមកដល់សព្វថ្ងៃនេះ នឹងសូមឲ្យដួងវិញ្ញាណក្ខន្ធរបស់សម្ដេច និងលោកជំទាវ ទៅកាន់សុគតិភពកុំបីអាក់ខានហើយ។
សម្ភារៈបរិក្ខា ដែលបានប្រគេនព្រះសង្ឃនោះមាន បច្ច័យសម្រាប់វត្តចំនួន ៤ លានរៀល, អង្ករ ១ តោន, ត្រីខ ២កេសធំ,ទឹកសុទ្ធ១០ កេស,ទឹកផ្លែឈើ 10 កេស,មី 2 កេសធំ និងបានប្រគេនចង្ហាន់ដល់ព្រះសង្ឃផងដែរ៕