ឯកឧត្តម បណ្ឌិត ម៉ៅ ធនិន អញ្ជើញជួបសំណេះសំណាល ជាមួយប្រជានេសាទនៅស្រុកកំពង់ត្រាចចំនួន៩៣៨គ្រួសារ
(កំពត)៖នាឱកាសអញ្ជើញជួបសំណេះសំណាលជាមួយបងប្អូនប្រជានេសាទ នៅស្រុកកំពង់ត្រាចចំនួន៩៣៨គ្រួសារ នៅភូមិស្លាបកាអោន ឃុំស្វាយទងខាងត្បូង ស្រុកកំពង់ត្រាច ខេត្តកំពត នាព្រឹកថ្ងៃទី០២ ខែមេសា ឆ្នាំ២០២២ ឯកឧត្តម បណ្ឌិត ម៉ៅ ធនិន អភិបាល នៃគណៈអភិបាលខេត្តកំពត បានបញ្ជាក់ថា ដោយប្រទេសយើងមានសុខសន្តិភាពពេញបរិបូរណ៍ ដែលយើងទាំងអស់គ្នាមានឱកាសរៀបចំពិធីជួបជុំគ្នានេះ គឺដោយសារសម្តេចតេជោ បានយកជីវិតទៅប្តូរ ដូច្នេះសូមបងប្អូនចូលរួមថែរក្សានូវសុខសន្តិភាពដ៏មានតម្លៃនេះឲ្យបានគង់វង្សសម្រាប់កូនចៅជំនាន់ក្រោយរបស់យើង ហើយសូមបងប្អូនកុំចាញ់នូវឧបាយកលរបស់ពួកអគតិមួយចំនួន ដែលដើរសន្យាខ្យល់ និងមានបំណងបំផ្លាញនូវសុខសន្តិភាពរបស់ប្រទេសជាតិ ដើម្បីផលប្រយោជន៍របស់ក្រុមខ្លួន។
ជាមួយគ្នានោះដែរឯកឧត្តម បានសំណូមពរដល់បងប្អូនប្រជានេសាទទាំងអស់ទៅចាក់វ៉ាក់សាំងការពារជំងឺកូវីដ-១៩ទាំងអស់គ្នា ដើម្បីឲ្យសហគមន៍យើងមានភាពស៊ាំជាមួយជំងឺដ៏កាចសាហាវនេះ ហើយវ៉ាក់សាំងដែលយើងមាន គឺបានមកពីសម្តេចតេជោ ស្វះស្វែងរកមកចាក់ជូនប្រជាពលរដ្ឋដោយឥតគិតថ្លៃ។សម្តេចមិនត្រឹមតែនាំមកនូវសុខសន្តិភាពជូនជាតិមាតុភូមិប៉ុណ្ណោះទេ សម្តេចថែមទាំងបានគិតគូពីសុខទុក្ខរបស់ប្រជាពលរដ្ឋ ហើយនៅជាមួយប្រជាពលរដ្ឋគ្រប់កាលៈទេសៈដែលប្រទេសជាតិជួបការលំបាក ៕
