អភិបាលខេត្តកំពង់ចាម អញ្ជើញជាធិបតីភាព ក្នុងពិធីប្រកាសចូលកាន់មុខតំណែង អភិបាល អភិបាលរង នៃគណៈអភិបាលក្រុង និងនាយករដ្ឋបាលសាលាក្រុងកំពង់ចាម
(កំពង់ចាម)៖ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នៅព្រឹកថ្ងៃទី១៩ ខែមេសា ឆ្នាំ២០២២ អញ្ជើញជាធិបតីភាព ក្នុងពិធីប្រកាសចូលកាន់មុខតំណែង អភិបាល អភិបាលរង នៃគណៈអភិបាលក្រុង និងនាយករដ្ឋបាលសាលាក្រុងកំពង់ចាម។
ពិធីនេះបានធ្វើឡើងនៅសាលាខេត្តកំពង់ចាម ដោយមានការចូលរួមពីឯកឧត្តមប្រធានសាលាដំបូងខេត្ត តំណាងព្រះរាជអាជ្ញា លោក លោកស្រីអភិបាលរងខេត្ត សមាជិកក្រុមប្រឹក្សាខេត្ត កងកំលាំងទាំងបី លោក លោកស្រី នាយក នាយករងរដ្ឋបាល ថ្នាក់ដឹកនាំមន្ទីរអង្គភាពជុំវិញខេត្ត លោកអភិបាលក្រុង ស្រុក សមាជិកក្រុមប្រឹក្សាក្រុង លោក លោកស្រីចៅសង្កាត់ ចៅសង្កាត់រង និងមន្ត្រីពាក់ព័ន្ធមួយចំនួនផងដែរ ។
ក្នុងឱកាសនោះ ឯកឧត្តម អ៊ុន ចាន់ដា បានផ្តល់អនុសាសន៍ក្រើនរំលឹក ដល់លោក លោកស្រី អភិបាល អភិបាលរង នៃគណៈអភិបាលក្រុង ដែលទើបប្រកាសចូលកាន់តំណែងថ្មី រួមនឹងលោកស្រី នាយករដ្ឋបាលសាលាក្រុង នូវគោលការណ៍មួយចំនួនដូចខាងក្រោមៈ
- ក្នុងនាមជាថ្នាក់ដឹកនាំ ត្រូវចេះដឹកនាំឱ្យមន្ត្រីចេះ ធ្វើការចេះសម្របសម្រួល និងចេះដោះស្រាយបញ្ហា។
- ក្នុងនាថ្នាក់ដឹកនាំ ត្រូវចូលរួមគ្រប់ជាមួយ ភាគីពាក់ព័ន្ធទាំងអស់ ដើម្បីពង្រឹង សន្តិសុខ សុវត្ថិភាពសណ្តាប់ធ្នាប់ឱ្យបានល្អប្រសើរ ដើម្បីទទួលបានទំនុកចិត្តពីប្រជាពលរដ្ឋ និងថ្នាក់ដឹកនាំ។
- ត្រូវខិតខំបម្រើការផ្តល់សេវាសាធារណៈ ជូនបប្រជាពលរដ្ឋឱ្យបានល្អប្រសើរ។
- ត្រូវរក្សាខ្សែក្រវ៉ាត់ជ័យលាភីរំដួល ៣ទង តាមរយៈការរួបរួមសាមគ្គីគ្នាធ្វើចលនា ទីក្រុងស្អាត នឹងដើម្បីចូលរួមប្រឡងប្រណាំងទីក្រុងស្អាត នៅឆ្នាំ២០២៣ ខាងមុខឱ្យទទួលបានលទ្ធផលល្អប្រសើរ។
- ត្រូវរក្សាសន្តិសុខ សុវត្ថិភាព និងចែកខិត្តប័ណ្ណផ្សព្វផ្សាយឲ្យប្រជាពលរដ្ឋ បានយល់ដឹងអំពីការបោះឆ្នោត ។
- ត្រូវរក្សាសាមគ្គីភាព ផ្ទៃក្នុងឱ្យបានកាន់តែរឹងមាំ និងត្រូវចេះផ្តល់ឱ្យដល់មន្រ្តី ចំនួនបី រួមមាន:ឱ្យមន្ត្រីចេះធ្វើការ,ឱ្យមន្ត្រីចេះសម្រេចចិត្ត,ឱ្យមន្ត្រីមានធនធានសម្រាប់ធ្វើការ ។
ជាចុងក្រោយឯកឧត្តម អភិបាលខេត្ត សង្កត់ធ្ងន់ថា ក្នុងនាមជាថ្នាក់ដឹកនាំអង្គភាពមួយ ត្រូវ ចេះរួបរួម សាមគ្គីភាពរវាងមន្ទីរ អង្គភាព ពាក់ព័ន្ធ ជុំវិញខេត្ដឱ្យបានល្អប្រសើរ ដើម្បីនាំមកនូវភាពជោគជ័យជូនអង្គភាព៕