សាខាកាកបាទក្រហមខេត្តបន្ទាយមានជ័យ សហការជាមួយមន្ទីរសាធារណការ និងដឹកជញ្ជូនខេត្ត និងនគរបាលចរាចរណ៍ផ្លូវគោក ចុះផ្សព្វផ្សាយច្បាប់ចរាចរណ៍ផ្លូវគោក និងការប្រើប្រាស់ទ្រូងថ្នល់ ក្នុងក្រុងសិរីសោភ័ណ
(បន្ទាយមានជ័យ)៖នាព្រឹកថ្ងៃទី១២ ខែមេសា ឆ្នាំ២០២២ សាខាកាកបាទក្រហមខេត្តបន្ទាយមានជ័យ សហការជាមួយកម្លាំងនគរបាលចរាចរណ៍ខេត្ត និងមន្ទីរសាធារណការ និងដឹកជញ្ជូនខេត្ត បានចុះធ្វើការផ្សព្វផ្សាយស្ដីពីច្បាប់ចរាចរណ៍ផ្លូវគោក និងការប្រើប្រាស់ទ្រូងថ្នល់ ជូនដល់បងប្អូនប្រជាពលរដ្ឋ អាជីវករផ្សារ ក្នុងក្រុងសិរីសោភ័ណ មានផ្សារចំការគរ(ផ្សារថ្មី) ផ្សារភូមិទឹកថ្លា ផ្សារសិរីសោភ័ណ និងចំណតរថយន្តបេនឡានចាស់ ក្នុងគោលបំណងឲ្យយល់ដឹងពីច្បាប់ចរាចរណ៍ផ្លូវគោក ត្រូវពាក់មួកសុវត្ថិភាពឲ្យបានត្រឹមត្រូវរាល់ពេលធ្វើដំណើរ បើកបរចេះអធ្យាស្រ័យគ្នា មិនបើកបរក្រោមឥទ្ធិពលគ្រឿងស្រវឹង និងបើកបរលើសល្បឿនកំណត់ ដើម្បីឈានទៅដល់ការកាត់បន្ថយអត្រាពិការស្លាប់ និងរបួសធ្ងន់ ដោយសារគ្រោះថ្នាក់ចរាចរណ៍ ដោយមានចែកជូននូវឯកសារពាក់ព័ន្ធ ខិតបណ្ណ័នានា ទាក់ទងនឹងច្បាប់ស្តីពីសុវត្ថិភាពចរាចរណ៍ផ្លូវគោក បិទចំណាំងផ្លាត ក៏ដូចជា ចុះអប់រំផ្សព្វផ្សាយ វិធានការការពារជំងឺកូវី១៩ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខនេះផងដែរ។
ក្នុងយុទ្ធនាការផ្សព្វផ្សាយក្រុមយុវជន និងអ្នកស្ម័គ្រចិត្តកាកបាទក្រហមកម្ពុជាខេត្តបន្ទាយមានជ័យ បានផ្ដាំផ្ញើដល់ពុកម៉ែបងប្អូនរួមគ្នាគោរពច្បាប់ចរាចរណ៍ផ្លូវគោករបស់ប្រទេសកម្ពុជាយើង ឲ្យបានខ្ជាប់ខ្ជួន និងត្រូវអនុវត្តគ្រប់ពេលវេលាគ្រប់ទីកន្លែងទោះនៅតាមជនបទឬទីក្រុង ត្រូវពាក់មួកសុវត្ថិភាពឱ្យបានត្រឹមត្រូវ និងដាក់ខ្សែក្រវ៉ាត់ចង្កេះឲ្យតឹងណែនល្មម រាល់ពេលធ្វើដំណើរទោះជិតឬឆ្ងាយ សូមគិតថាមួកសុវត្ថិភាពមួយអាចសង្គ្រោះជីវិតមនុស្សម្នាក់បាន បើសេពគ្រឿងស្រវឹងសូមកុំបើកបរ ការពារជីវិត អ្នកកុំបើកបរហួសល្បឿនកំណត់សូមកុំវ៉ា ឬជែងគ្នាក្នុងស្ថានភាពគ្រោះថ្នាក់ សូមគោរពសិទ្ធិអាទិភាពពេលបើកបរ សូមកុំប្រើទូរស័ព្ទដៃពេលបើកបរ សូមត្រួតពិនិត្យយានយន្តអោយបានត្រឹមត្រូវមុនពេលបើកបរគ្រប់ប្រជាពលរដ្ឋទាំងអស់ត្រូវមានប័ណ្ណបើកបរត្រឹមត្រូវ តាមប្រភេទរថយន្ត សូមបំពាក់សម្ភារៈចំណាំងផ្លាតលើរថយន្តរបស់បងប្អូន សូមកុំផ្ទុកទំនិញ សម្ភារៈ ឬមនុស្សលើសចំណុះ ។គោរពច្បាប់ចរាចរណ៍ គឺមានន័យថា លោកអ្នកបានគោរពនិងស្រឡាញ់ជីវិតអ្នក គោរពច្បាប់ចរាចរណ៍គឺមានន័យថា អ្នកបានលើកស្ទួយកិត្តិយសជាតិយើង។ចរាចរណ៍ល្អគឺអាស្រ័យលើអ្នក គោរពស្រឡាញ់ជីវិតអ្នក និងអ្នកដទៃសូមបើកបរដោយប្រុងប្រយ័ត្នខ្ពស់ ៕
.jpg)
.jpg)
