ប្រជាពលរដ្ឋដែលរងគ្រោះ ដោយខ្យល់កន្រ្តាក់ចំនួន៣៤គ្រួសារ នៅស្រុកសំរោង ទទួលបានអំណោយមនុស្សធម៌ពីសាខាកាកបាទក្រហមកម្ពុជាខេត្តតាកែវ
(ខេត្តតាកែវ):ឯកឧត្តម អ៊ូច ភា ប្រធានគណៈកម្មាធិការសាខាកាកបាទក្រហមកម្ពុជា ខេត្តតាកែវ និងជាអភិបាលខេត្ត កាលរសៀលថ្ងៃទី៣០ ខែមីនា ឆ្នាំ២០២២ បានដឹកនាំមន្រ្តីសាខាខេត្ត ស្រុក អញ្ជើញចុះសួរសុខទុក្ខ និងនាំយកអំណោយមនុស្សធម៌របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចែកជូនប្រជាពលរដ្ឋចំនួន ៣៤គ្រួសារ ក្នុងឃុំចំនួន៥ ស្រុកសំរោង ដែលរងគ្រោះដោយសាខ្យល់កន្ត្រាក់ កាលពីរសៀលថ្ងៃទី២៧-២៨ ខែមីនា ឆ្នាំ២០២២ ក្នុងនោះ រលំទាំងស្រុង០៩ខ្នង ខូតខាតមធ្យម១០ខ្នង ។
ក្នុងឱកាសនោះឯកឧត្តម អ៊ូច ភា បានពាំនាំមតិផ្តាំផ្ញើសាកសួរសុខទុក្ខពីសំណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាលសម្ដេចតែងតែយកចិត្តទុកដាក់គិតគូរអំពីសុខទុក្ខដល់ប្រជាពលរដ្ឋដែលងាយទទួលរងគ្រោះ នៅគ្រប់ទីកន្លែងមិនប្រកាន់និន្នាការ ពូជសាសន៍ សាសនា អ្វីឡើយ ។
ជាមួយគ្នានោះដែរឯកឧត្តម អ៊ូច ភា បានក្រើនរំលឹកបន្ថែមទៀតទៅដល់បងប្អូនប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នឱ្យបានខ្ពស់ចំពោះគ្រោះធម្មជាតិ ខ្យល់កន្រ្តាក់នេះ ដោយភ្លៀងធ្លាក់ខ្យល់ខ្លាំង សូមកុំចេញក្រៅផ្ទះឱ្យសោះ ដើម្បីសុវត្ថិភាពរបស់បងប្អូន ។
អំណោយដែលបានផ្ដល់ជូនប្រជាពលរដ្ឋក្នុង១គ្រួសារទទួលបាន អង្ករ២៥ គីឡូក្រាម តង់ធំ១ កន្ទេល១ មុង១ ភួយ១ ក្រមារ១ សារុង១ អាវយឺត៥ ជែលលាងដៃ៤ដប និងអាល់កុល១ដប ជាអំណោយរបស់ ឯកឧត្តម អ៊ូច ភា ប្រធានគណៈកម្មាធិការសាខា។ដោយឡែក ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ប្រធានក្រុមការងារថ្នាក់ជាតិចុះ មូលដ្ឋាន ខេត្តតាកែវ និងជាប្រធានកិត្តិយសសាខាកាកបាទក្រហមកម្ពុជា ខេត្តតាកែវ បានឧបត្ថម្ភថវិកាដល់ គ្រួសារដែលរលំទាំងស្រុងក្នុង១គ្រួសារៗទទួលបាន ២០០.០០០រៀល គ្រួសារប៉ះព៉ាល់មធ្យម ១០០.០០០រៀល និងគ្រួសារប៉ះពាល់កម្រិតស្រាលឧបត្ថម្ភចំនួន ៥០.០០០រៀល ផងដែរ៕
