រដ្ឋបាលខេត្តកណ្តាល រៀបចំសិក្ខាសាលាផ្សព្វផ្សាយអំពីសៀវភៅផែនការជាតិ ប្រឆាំងភេរវកម្ម ក្រោមអធិបតីភាពឯកឧត្ដមបណ្ឌិត ឈួន ចាន់ថន
ខេត្តកណ្ដាល៖នាព្រឹកថ្ងៃទី១ ខែមីនា ឆ្នាំ២០២២ រដ្ឋបាលខេត្តកណ្ដាល បានរៀបចំសិក្ខាសាលាផ្សព្វផ្សាយអំពីសៀវភៅផែនការជាតិប្រឆាំងភេរវកម្ម ក្រោមអធិបតីភាពឯកឧត្ដមបណ្ឌិត ឈួន ចាន់ថន អនុប្រធានគណៈកម្មាធិការជាតិប្រឆាំងភេរវកម្ម និងឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល ក្នុងនោះក៏មានការចូលរួមពីកងកម្លាំងទាំង៣ អភិបាលក្រុង-ស្រុក ទាំង១១ និងមន្ទីរអង្គភាពពាក់ព័ន្ធផងដែរ។
ឯកឧត្ដម គង់ សោភ័ណ្ឌ បានមានប្រសាសន៍ថា សិក្ខាសាលានេះគឺពិតជាមានសារៈសំខាន់ ដើម្បីបញ្ជ្រាបការយល់ដឹងអំពីការលើកកម្ពស់នីតិវិធីសម្របសម្រួលការងារ និង ការបង្កើនប្រសិទ្ធិភាព នៃការចូលរួមដោះស្រាយឧបទ្ទវហេតុភេរវកម្ម ក្នុងគោលបំណងថែរក្សាសន្តិភាព សន្តិសុខ សណ្តាប់ធ្នាប់សាធារណៈ ពីព្រោះថា អំពើភេរវកម្ម ជាអំពើខុសច្បាប់ មានទម្រង់ហិង្សា កេងប្រវ័ញ្ច បង្កឱ្យមានការភ័យខ្លាចដល់ប្រជាពលរដ្ឋ បង្កអសន្តិសុខសង្គម និងនៅក្នុងរូបភាពវាយប្រហារនយោបាយ ដឹកនាំរបស់ប្រទេស ដែលជាទូទៅអំពើភេរវកម្មនេះ មានលក្ខណៈជាបណ្ដាញ ការត្រៀមរៀបចំផែនការ ឧបាយកលច្បាស់លាស់ពីពួកអមិត្ត ដែលនេះ ទាមទារឱ្យការប្រយុទ្ធប្រឆាំងអំពើភេរវកម្មមានយន្តការ ច្បាស់លាស់ មានកិច្ចសហប្រតិបត្តិការ និងការសម្របសម្រួលទាំងថ្នាក់ជាតិ និងអន្តរជាតិ។
ឯកឧត្ដមអភិបាលខេត្ត បន្តថា ប្រទេសកម្ពុជា ក្រោមការដឹកនាំដ៏ឈ្លាសវៃ និងប៉ិនប្រសប់ របស់ សម្តេច អគ្គមហាសេនាបតីតេជោ នាយករដ្ឋមន្ត្រី នៃព្រះរាជាណាចក្រកម្ពុជា ប្រទេសកម្ពុជាទទួលបាននូវសន្តិភាព បរិបូរណ៍ ស្ថិរភាពនយោបាយ សន្តិសុខ សណ្តាប់ធ្នាប់សាធារណៈ និងការអភិវឌ្ឍន៍លើគ្រប់វិស័យ។
ទន្ទឹមនឹងនេះឯកឧត្ដមបណ្ឌិត ឈួន ចាន់ថន អនុប្រធានគណៈកម្មាធិការជាតិប្រឆាំងភេរវកម្ម បានធ្វើបទបង្ហាញជូនដល់អង្គសិក្ខាសាលាទាំងមូល និងបានលើកឡើងថា អំពើភេរវកម្ម គឺជាប្រភេទឧក្រិដ្ឋកម្មដ៏ឃោរឃៅបំផុតក្នុង ប្រវត្តិសាស្ត្រនៃមនុស្សជាតិ បាននឹងកំពុងបន្តគំរាមកំហែងឥតឈប់ឈរ ព្រមទាំងបង្កមហន្តរាយដល់ អាយុជីវិតមនុស្សគ្រប់ជាតិសាសន៍ គ្រប់វ័យ គ្រប់ទីកន្លែងដែលវាអាចធ្វើសកម្មភាពបាន ពីកន្លែងមួយ ប្រទេសមួយ តំបន់មួយ រហូតអន្តរតំបន់ និងអន្តរទ្វីប បង្កើតឱ្យមានហានិភ័យ និងក្តីព្រួយបារម្ភជាទូទៅ សម្រាប់ពិភពលោកទាំងមូល ៕