មន្ទីរបរិស្ថានខេត្តកណ្ដាល ប្រារព្ធទិវាតំបន់ដីសើមអន្តរជាតិ ២កុម្ភៈ ក្រោមប្រធានបទ "ការអភិរក្សតំបន់ដីសើម សម្រាប់មនុស្ស និងធម្មជាតិ"
ខេត្តកណ្ដាល៖តំបន់ដីសើមផ្ដល់ផលប្រយោជន៍ ដ៏មហិមាដល់យើងទាំងអស់គ្នា ដូចជា ការផ្គត់ផ្គង់ទឹកសម្រាប់ប្រើប្រាស់ក្នុងលំនៅឋាន អាជីវកម្ម សេវាកម្ម កសិកម្ម ឧស្សាហកម្ម សិប្បកម្ម ការស្តុកទឹកទុក និងកាត់បន្ថយឥទ្ធិពល នៃគ្រោះទឹកជំនន់ គ្រោះរាំងស្ងួត ជារនាំងការពារព្យុះ និងការពារពីការបំផ្លិចបំផ្លាញនៃគ្រោះធម្មជាតិ ផ្ដល់ផលត្រី និងធនធានជលផល ជាប្រភពចំណីអាហារ សត្វព្រៃ សត្វស្លាបទឹក ជាកន្លែងធ្វើស្រែចំការ ព្រមទាំងបន្សុទ្ធទឹកអោយស្អាត និងដកយកសារធាតុពុលចេញពីក្នុងទឹក ក្នុងកម្រិតមួយដែលអាចទទួលយកបាន។លោក តាំង ម៉េងលាន អភិបាលរងខេត្តកណ្ដាល មានប្រសាសន៍បែបនេះ ក្នុងឱកាសដែលលោកអញ្ជើញចូលរួមក្នុងទិវាតំបន់ដីសើមអន្តរជាតិ ២កុម្ភៈ ដែលប្រារព្ធធ្វើឡើងនៅក្នុងបរិវេណវត្តម៉ែបាន ស្ថិតនៅក្នុងឃុំស៊ីធរ ស្រុកខ្សាច់កណ្ដាល នៅព្រឹកថ្ងៃទី៩ ខែកុម្ភៈ ឆ្នាំ២០២២នេះ ដែលពិធីនេះរៀបចំឡើងដោយមន្ទីរបរិស្ថានខេត្តកណ្ដាល។
លោក តាំង ម៉េងលាន បញ្ជាក់ថា ការប្រារព្ធទិវានេះ ក្នុងគោលបំណងដើម្បីលើកកម្ពស់ការយល់ដឹង ដល់ស្ថាប័នពាក់ព័ន្ធ សាធារណជន និងសហគមន៍មូលដ្ឋាន អំពីភាពចាំបាច់ និងអត្ថប្រយោជន៍នៃតំបន់រ៉ាមសារ ដែលជាតំបន់ដីសើម ដ៏មានសារៈសំខាន់ជាអន្តរជាតិ ព្រមទាំងចលនា ប្រជាពលរដ្ឋពីគ្រប់មជ្ឈដ្ឋានឱ្យចូលរួមថែរក្សា ការពារ ស្តារ និងអភិរក្សតំបន់ដីសើមនៅកម្ពុជា ជាពិសេស ធនធាននៅក្នុង និងជុំវិញតំបន់ដីសើមឱ្យបានល្អប្រសើរឡើង។
លោក ទូច វីណា អគ្គនាយកស្តីទី អគ្គនាយកដ្ឋានអប់រំ និងព័ត៍មានបរិស្ថាន នៃក្រសួងបរិស្ថាន បានឱ្យដឹងដែរថា ក្នុងពេលបច្ចុប្បន្ននេះ ប្រទេសកម្ពុជាមានតំបន់រ៉ាមសារ ដែលជាតំបន់ដីសើមចំនួន ៥កន្លែង គឺតំបន់រ៉ាមសារកោះកាពិ តំបន់រ៉ាមសារព្រែកទាល់ តំបន់រ៉ាមសារស្ទឹងសែន តំបន់រ៉ាមសារបឹងទន្លេឆ្មារ និងតំបន់រ៉ាមសារស្ទឹងត្រែង។ក្នុងនោះដែរ យើងក៏មានតំបន់ការពារ ធម្មជាតិ ដែលជាតំបន់ដីសើម ដែលមានសារៈសំខាន់សម្រាប់បរិស្ថាន និងសង្គម ដូចជា តំបន់ការពារ ទេសភាពអន្លង់ព្រីង តំបន់ការពារទេសភាពបឹងព្រែកល្ពៅ តំបន់ការពារទេសភាពទំនាបខាងជើងទន្លេសាប តំបន់ការពារទេសភាពអាងត្រពាំងថ្ម តំបន់ប្រើប្រាស់ច្រើនយ៉ាងទួលព័ន្ធតាឡីបឹងស្នេហ៍ តំបន់ប្រើប្រាស់ច្រើនយ៉ាងដងពែង តំបន់ការពារទេសភាពបឹងការដេរ និងតំបន់ប្រើប្រាស់ច្រើនយ៉ាងបឹងទន្លេសាប ក៏ដូចជាឧទ្យានជាតិសមុទ្រកោះរ៉ុងផងដែរ៕