ទីតាំងល្បែងបញ្ជល់មាន់មួយកន្លែង នៅចំណុចក្លឹបថច់ដោន នៅក្នុងតំបន់កាស៊ីហ្គោលដិនក្រោន ត្រូវបានកម្លាំងនគរបាលក្រុងប៉ោយប៉ែត ចុះបង្ក្រាប
ខេត្តបន្ទាយមានជ័យ៖ដោយអនុវត្តតាមបទបញ្ជា របស់លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាល ខេត្តបន្ទាយមានជ័យ លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត នៅរសៀលថ្ងៃទី០៧ ខែកុម្ភៈ ឆ្នាំ២០២២នេះ បានដឹកនាំកម្លាំងការិយាល័យព្រហ្មទណ្ឌ នៃអធិការដ្ឋាននគរបាលក្រុងប៉ោយប៉ែត ចុះបង្ក្រាបទីតាំងសង្វៀនជល់មាន់មួយកន្លែង នៅចំណុចក្លឹបថច់ដោន ក្នុងតំបន់កាស៊ីហ្គោលដិនក្រោន ស្ថិតនៅក្នុងភូមិក្បាលស្ពាន១ សង្កាត់/ក្រុងប៉ោយប៉ែត ខេត្តបន្ទាយមានជ័យ ជាលិតផលនៅពេលចុះដល់ទីតាំងជាក់ស្តែងគឺពុំមានឃើញអ្នកញៀនល្បែងណាម្នាក់លេងឡើយ ហើយទីតាំងខាងលើនេះក៏ត្រូវបានចាក់សោរបិទទៀត។តែទោះបីជាយ៉ាងនេះក្តីលោកនិងដាក់កម្លាំងតាមដានបន្ថែមទៀត ក្រែងលមានករណីលួចលេងល្បែងស៊ីសងខុសច្បាប់បន្ត។
លោកវរសេនីយ៍ឯក សៅ សារឿន បានឲ្យដឹងថា ការចុះប្រតិបត្តិការបង្ក្រាបទីតាំងលួចលេងល្បែងស៊ីសងបញ្ជល់មាន់ខុសច្បាប់នេះ បានធ្វើឡើងបន្ទាប់ពីទទួលបានបទបញ្ជាពីលោកឧត្តមសេនីយ៍ទោ ស្នងការនគរបាលខេត្ត លោកក៏បានដឹកនាំកម្លាំងចុះទៅដល់ទីតាំងខាងលើនេះផ្ទាល់តែម្តង។
ក្នុងនោះលោកអធិការនគរបាលក្រុងប៉ោយប៉ែត បានអំពាវនាវដល់ប្រជាពលរដ្ឋ បើសិនជាមានករណីបើកលេងល្បែងស៊ីសងបញ្ជល់មាន់ខុសច្បាប់ ដែលក្រុមជនខិលខូចតែងតែលេងចល័តពីកន្លែងមួយទៅកន្លែងមួយ ដើម្បីបង្វែងដានសមត្ថកិច្ចនោះសូមឱ្យប្រញាប់រាយការណ៍មកសមត្ថកិច្ច ដើម្បីមានវិធានការចុះបង្ក្រាបឲ្យបានទាន់ពេលវេលា៕
.jpg)
