ពិធីបំពាក់គ្រឿងឥស្សរយសជូនឯកឧត្តម លោកជំទាវ និងសប្បុរសជន
ខេត្តបន្ទាយមានជ័យ៖ឯកឧត្តម លោកជំទាវ អស់លោក លោកស្រី ចំនួន ២២ រូប ត្រូវបានគណៈសង្ឃពុទ្ធសាសនារដ្ឋនៃព្រះរាជាណាចក្រកម្ពុជា ធម្មយុត្តនិកាយខ្មែរ ត្រាស់សម្រេចតែងតាំងជាឧត្តមទីប្រឹក្សាផ្ទាល់ និងទីប្រឹក្សាផ្ទាល់របស់សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជានៃគណៈធម្មយុត្តិកនិកាយនៃព្រះរាជាណាចក្រកម្ពុជា។
ដែលពិធីនេះបានប្រព្រឹត្តិទៅនៅថ្ងៃទី១៥ ខែកុម្ភៈ ឆ្នាំ២០២២ នៅវេទិកាមហាស្រប ខេត្តបន្ទាយមានជ័យ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ក្រោមអធិបតីភាពដ៏ខ្ពង់ខ្ពស់ សម្តេចព្រះមហាសង្ឃរាជ បួរ គ្រី លោកជំទាវ ហេម ចិត្តា អគ្គមហាឧបាសិកា ពុទ្ធសាសនូបត្ថម្ភ ម៉ៅ ម៉ាល័យ កែ គឹមយ៉ាន។
ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានមានប្រសាសន៍ អរព្រះគុណដ៏ខ្ពង់ខ្ពស់ ក្នុងឱកាសឯកឧត្តម លោក លោកជំទាវ អស់លោក លោកស្រីទាំងអស់គ្នា ត្រូវបានសម្តេចសព្វព្រះហរទ័យ ត្រាស់បញ្ញត្តិតែងតាំង អ្នកទាំងអស់គ្នាឲ្យមានស័ក្តិជាឧត្តមទីប្រឹក្សា ទីប្រឹក្សាផ្ទាល់ និងបញ្ញត្តិគោរម្យងារជាមហាឧបាសក មហាឧបាសិកាពុទ្ធសាសនូបត្ថម្ភ គឺជាគោរម្យងារដ៏ខ្ពស់ខ្ពង់បំផុត ក្នុងវិស័យព្រះពុទ្ធសាសនា ដែលជាសាសនារបស់រដ្ឋ នៃព្រះរាជាណាចក្រកម្ពុជាយើង។ឯកឧត្តមនិងបន្តចូលរួមចំណែក ក្នុងកិច្ចការងារជួយជ្រោមជ្រែង និងជួយគាំទ្រលើវិស័យព្រះពុទ្ធសាសនា និងចូលរួមថែរក្សាឲ្យបានគង់វង្សយូរអង្វែងជានិរន្តន៍ ពិសេសក្រោមបាវចនា “ ជាតិ សាសនា ព្រះមហាក្សត្រ “ ក្រោមព្រះបន្ទូលសម្តេចព្រះមហាសង្ឃរាជនោះគឺជា មេត្តា សតិ បញ្ញា។
សម្តេចកិត្តិឧទ្ទេសបណ្ឌិត បួរ គ្រី សម្តេចព្រះសង្ឃរាជ និងជាព្រះប្រធានគណៈសង្ឃនាយក នៃគណៈធម្មយុត្តិកនិកាយនៃព្រះរាជាណាចក្រកម្ពុជា ព្រះអង្គមានព្រះបន្ទូលយ៉ាងជាក់លាក់ថា នាបច្ចុប្បន្ននេះពុទ្ធចក្រ និងអាណាចក្រ កំពុងមានរីកចំរើន ដូចសព្វថ្ងៃនេះ គឺដោយសារប្រទេសជាតិមានសុខសន្តិភាព ពេញលេញ ក្រោមការដឹកនាំរបស់ប្រមុខរាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្រ្តីនៃព្រះរាជាណាចក្រកម្ពុជា។
ព្រះអង្គមានព្រះបន្ទូលបន្តថា៖ ធ្វើចិត្តជាបុណ្យ និងបានសុខហើយ និងផ្តល់ឱកាសដល់ប្រជាពុទ្ធ បរិស័ទ បានធ្វើបុណ្យទាន ធ្វើចិត្តឲ្យបានស្អាតបរិសុទ្ធ និងជ្រះថ្លា។ចុងបញ្ចប់ សម្តេច ព្រះសង្ឃរាជ បានព្រះរាជទានព្រះរាជអំណោយជូនដល់ឧបាសក ឧបាសិកា ពុទ្ធបរិសទ័ ទីទាល់ក្រចំនួន ២៥០ គ្រួសារមួយគ្រួសារៗ ទទួលបាន អង្ករ ២៥ គីឡូ មី ១ កេស ទឹកត្រីស៊ីអ៊ីវ ១ យួរ និងថវិការ ១០០០០រៀលផងដែរ៕
.jpg)
