អភិបាលខេត្តកែប អញ្ជើញសំណេះសំណាល ជាមួយក្រុមកីឡាករបាល់ទាត់ ដែលត្រូវទៅចូលរួមប្រកួតពានរង្វាន់ សម្តេចតេជោនៅទីរួមខេត្តតាកែវ
ខេត្តកែប:ឯកឧត្តមបណ្ឌិត សោម ពិសិដ្ឋ អភិបាល នៃគណ:អភិបាលខេត្តកកែប កាលពីព្រឹកថ្ងៃទី១៣ ខែកុម្ភៈ ឆ្នាំ២០២២ បានអញ្ជើញជាអធិបតីភាព ក្នុងពិធីសំណេះសំណាលជាមួយក្រុមកីឡាករបាល់ទាត់ខេត្តកែប ដែលត្រូវទៅចូលរួមប្រកួតពានរង្វាន់សម្តេចតេជោ ហ៊ុន សែន លើកទី១៦ ថ្នាក់ខេត្ត ឆ្នាំ២០២២ នៅទីរួមខេត្តតាកែវ។
នាឱកាសនោះឯកឧត្តមបណ្ឌិត សោម ពិសិដ្ឋ បានលេីកឡេីងថា ដោយកត្តាសុខសន្តិភាពពេញលេញទូទាំងប្រទេស រួមផ្សំជាមួយស្ថេរភាពនយោបាយ និងការអភិវឌ្ឍនៅក្នុងព្រះរាជាណាចក្រកម្ពុជា ទើបយើងអាចមានឱកាសប្រារព្ធនូវពិធីជួបជុំ កីឡាបាល់ទាត់ បាល់ទះ និងកីឡាផ្សេងៗទៀត ប្រកបដោយភាពសប្បាយរីករាយ។
ឯកឧត្តម បន្តថា ការប្រកួតប្រជែងកីឡា ក៏មិនខុសពីការដឹកនាំប្រទេសដែរ ប្រសិនបើកីឡាករទាំងអស់ពុំមានសាមគ្គីភាពជាធ្លុងមួយទេនោះ យើងក៏មិនអាចទទួលបានជោគជ័យដែរ ដូច្នេះសូមឱ្យកីឡាករទាំងអស់ ត្រូវរួមសាមគ្គីគ្នា ហើយត្រូវយកចិត្តទុកដាក់ខិតខំប្រឹងប្រែងយកជ័យជំនះ នាំមកនូវកិត្តិយសជូនខេត្ត ស្រុក ភូមិរបស់យើង។
ឯកឧត្តមបញ្ជាក់ថា ដើម្បីជាការលើកទឹកចិត្តបន្ថែមពីលើការឧបត្ថម្ភរបស់ មន្ទីរអប់រំ យុវជន និងកីឡាខេត្ត ឯកឧត្តមបណ្ឌិត សោម ពិសិដ្ឋ និងលោក លោកស្រី អភិបាលរងខេត្ត អភិបាលក្រុង ស្រុក លោកឧត្ដមសេនីយ៍ វរសេនីយ៍ តំណាងកងកម្លាំងទាំងបី ប្រធាន អនុប្រធានមន្ទីរជុំវិញខេត្ត បានចូលរួមឧបត្ថម្ភដល់ប្រតិភូកីឡាករបាល់ទាត់ ដែលត្រូវចូលរួមនៅខេត្តតាកែវបានចំនួនជាង៥លានរៀល ហើយកីឡាករម្នាក់ៗទទួលបានប្រាក់ឧប្បត្ថម្ភ ១០០,០០០៛ ផងដែរ៕