ពិធីប្រគល់វិញ្ញាបនប័ត្របញ្ចប់ការសិក្សា និងប្រគល់ជូនប្រកាសនីយបត្រ គ្រឿងឥស្សរយស មេដាយស្ថាបនាជាតិ
ខេត្តបន្ទាយមានជ័យ៖មន្ទីរធម្មការនិងសាសនាខេត្តបន្ទាយមានជ័យនារសៀលថ្ងៃទី៣១ ខែមករា ឆ្នាំ ២០២២ បានរៀបចំពិធីជួបសំណេះសំណាលរវាងថ្នាក់ដឹកនាំ មន្ទីរជាមួយសិក្ខាកាម ដែលបានសិក្សាវគ្គបណ្ដុះបណ្ដាលតាមប្រព័ន្ធអនឡាញ ស្ដីពីតួនាទី ភារកិច្ច និងក្រមសីលធម៌ អាចារ្យខ្មែរជំនាន់ទី៣៧ ដែលបានសិក្សាមានរយៈពេល៤ថ្ងៃពេញ ហើយក៏បានធ្វើពិធីប្រគល់វិញ្ញាបនប័ត្របញ្ចប់ការសិក្សា នៃវគ្គបណ្ដុះបណ្ដាលនេះ និងសៀវភៅឯកសារ កម្រងអត្ថបទ ឧន្ទេសសាចារ្យ។សូមបញ្ជាក់ថាសិក្ខាកាម ដែលបានរៀនវគ្គបណ្ដុះបណ្ដាលនេះមានចំនួន១៩នាក់ ក្នុងនោះមានបព្វជិត ចំនួន៦អង្គផងដែរ។
លោក បៀវ ថាន ប្រធានមន្ទីរធម្មការនិងសាសនាខេត្តបានមានប្រសាសន៍ថា សម្រាប់ខេត្តបន្ទាយមានជ័យចំនួនអាចារ្យ ចៅមហា បានចូលរួមវគ្គបណ្ដុះបណ្ដាលស្ដីពីក្រមសីលធម៌ តួនាទី ភារកិច្ច រួមមានកម្មវិធីបុណ្យប្រពៃណីសាសនា ពិធីបុណ្យផ្សេងៗ និងទំរង់អាពាហ៍ពិពាហ៍ខ្មែរ នៅក្រសួងធម្មការនិងសាសនាចាប់ពីវគ្គទី១ ដល់វគ្គទី៣៧ សរុបចំនួន៣៦៥អង្គ/នាក់ បព្វជិត៣៧អង្គ ស្រី៤ នាក់ ប្រុស៣២៤នាក់ ភ្ជាប់ទៅនឹងកម្មវិធីប្រគល់វិញ្ញាបនប័ត្របញ្ចប់ការសិក្សានេះផងដែរ ថ្នាក់ដឹកនាំមន្ទីរធម្មការ និងសាសនាក៏បានប្រគល់ជូនប្រកាសនីយប័ត្រ គ្រឿងឥស្សរិយយស មេដាយមាស មេដាយស្ថាបនាជាតិចំនួន១២នាក់ ដែលជាថ្នាក់ដឹកនាំ ក្រុមគ្រឹសបរិស័ទក្នុងខេត្ត ដែលបានជួយកសាងនូវសមិទ្ធផលនានា ក្នុងវិស័យធម្មការនិងសាសនា ក៏ដូចជាការចូលរួមចំណែកជាមួយរាជរដ្ឋាភិបាលកម្ពុជា ក្នុងការអភិវឌ្ឍប្រទេសជាតិឲ្យមានការរីកចម្រើនឡើង។
ជាចុងក្រោយ លោក បៀវ ថាន ក៏បានថ្លែងនូវអំណរគុណយ៉ាងជ្រាលជ្រៅចំពោះ អស់លោកលោកស្រី ដែលជាគ្រឹសបរិសទ័ទាំងអស់ តែងតែចូលរួមជួយដល់វិស័យសាសនាជារៀងរហូតមក ដោយមិនប្រកាន់និន្នាការនយោបាយ ឬក៏កាន់សាសនាផ្សេងៗគ្នាក្ដី៕
.jpg)
