ពិធីកាត់ខ្សែបូណ៌សម្ពោធឆ្លងសមិទ្ធផលនានា និងបញ្ចុះបឋមសិលាដងទង់ព្រះវិហារក្នុងវត្ត ទួលលក្ខរស្មីមានជ័យ ហៅវត្ត"ទួលពង្រ"ក្នុងក្រុងប៉ោយប៉ែត
ខេត្តបន្ទាយមានជ័័យ៖លោក ង៉ោ ម៉េងជ្រួន អភិបាលរងខេត្តបន្ទាយមានជ័យ តំណាងឯកឧត្តម អ៊ុំ រាត្រី អភិបាលខេត្ត បានអញ្ជើញជាអធិបតីភាពក្នុងពិធី កាត់ខ្សែបូណ៌សម្ពោធឆ្លងសមិទ្ធផលនានា និងបញ្ចុះបឋមសិលាដងទង់ព្រះវិហារក្នុងវត្ត ទួលលក្ខរស្មីមានជ័យ ហៅវត្ត"ទួលពង្រ"ក្នុងក្រុងប៉ោយប៉ែត នាថ្ងៃទី៣០ ខែមករា ឆ្នាំ២០២២។
បើតាមសង្ឃដីកា ព្រះតេជគុណ សុវណ្ណបញ្ញោ យឺន សុវណ្ណា ព្រះចៅអធិការវត្ត ទួលពង្រនេះបានបញ្ជាក់ថា សមិទ្ធផលដែលត្រូវបានសម្ពោធឆ្លងនាពេលនេះរួមមាន រូបសំណាកព្រះពុទ្ធ សំណាកព្រះពុទ្ធ ឃោសសាចារ្យ សំណាកសម្ដេចព្រះសង្ឃ រាជ ជួនណាត សំណាកព្រះជ័យវរ្ម័នទី៧ សំណាកក្រមង៉ុយ សួនច្បារ ផ្លូវក្រាលថ្មម៉ិច និងបន្ទប់ទឹកចំនួន២០បន្ទប់ ដែលសរុបជាថវិកាប្រមាណ ៥,៥០០០ ដុល្លារសហរដ្ឋអាមេរិក ហើយសំណង់ដែលនឹងគ្រោងធ្វើបន្ត មានដងទង់ព្រះវិហារ២ដើម ដែលត្រូវចំណាយថវិកាប្រមាណជា ២,៤០០០ ដុល្លារបន្ថែមទៀត ដោយកម្លាំងមហាសាមគ្គីរបស់ប្រជាពុទ្ធបរិស័ទជិតឆ្ងាយ ដោយចូលជាហ៊ុន តាមសទ្ធាជ្រះថ្លានៅក្នុងពិធីបញ្ចុះបឋមសិលានាថ្ងៃនេះ។
លោក ង៉ោ ម៉េងជ្រួន បានសម្ដែងនូវក្ដីសោមនស្សរីករាយ និងមានមោទនភាព ទទួលសាទរសមិទ្ធផលដែលបានកកើតឡើង និងកំពុងកសាងបន្ត នឹងទទួលបានផលផ្លែផ្កាដ៏សមស្រប ទៅនិងកម្លាំងមហាសាមគ្គីរបស់សប្បុរសជន ពុទ្ធបរិស័ទជិតឆ្ងាយជាពិសេស ក្រុមអាជីវករក្រុងប៉ោយប៉ែត ដែលមានលោក គាត ហ៊ុល ជាអភិបាលក្រុង ធ្វើការដឹកនាំរួមសាមគ្គីគ្នាបានល្អប្រសើរ កសាងនូវសមិទ្ធផលនានាក្នុងបរិវេណវត្តទួលពង្រនេះ សម្រាប់ជាប្រយោជន៍សាធារណៈ គោរពសក្ការះ បូជាដល់ព្រះសាមាសាមពុទ្ធនៃយើង។
គួរកត់សំគាល់ថា សមិទ្ធផលទាំងអស់នេះជាគំនិតផ្ដួចផ្ដើម ព្រះគ្រូចៅអធិការ អាចារ្យ គណៈកម្មការគឺជាកម្លាំងសទ្ធាជ្រះថ្លារបស់សប្បុរសជន ពុទ្ធបរិស័ទ អាជ្ញាធរគ្រប់លំដាប់ថ្នាក់។តាមសង្ឃដីកា ព្រះចៅអធិការវត្តទួលពង្រនេះ បានបញ្ជាក់ផងដែរថា រយៈកន្លងមកធ្លាប់បានត្រៀមរៀបចំ បញ្ចុះក្ខណ្ឌសីមាព្រះវិហារថ្មីនេះម្ដងហើយ ប៉ុន្តែដោយសារកូវីដ១៩ ទើបត្រូវផ្អាកលើកពេលមកដល់ពេលនេះ ប៉ុន្តែព្រះតេជគុណបានមានសង្ឃដីកាថា និងត្រៀមរៀបចំពិធីបញ្ចុះក្ខណ្ឌសីមាព្រះវិហារថ្មីនេះ ក្នុងអំឡុងចុងខែមីនាឬដើមខែមេសា ឆ្នាំ២០២២ខាងមុខនេះ ក្រោមអធិបតីភាព ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន និងលោកជំទាវ ឧកញ៉ាម៉ៅម៉ាល័យ កែ គឹមយ៉ាន។ចុងបញ្ចប់កម្មវិធីមានពិធីរាប់បាត្រព្រះសង្ឃ១០០អង្គផងដែរ៕
