ឯកឧត្តមឧកញ៉ា សៀ សុភ័ក្ត្រ អញ្ជើញជួបសំណេះសំណាល និងនាំយកអំណោយមនុស្សធម៌ចែកជូនប្រជាពលរដ្ឋចំនួន១០០គ្រួសារ ដែលមានជីវភាពទីទ័លក្រ នៃគ្រួសារគ្រីស្ទបរិស័ទ នៅស្រុកព្រះនេត្រព្រះ
ខេត្តបន្ទាយមានជ័យ៖ឯកឧត្តម សៀ សុភ័ក្ត្រ រដ្ឋលេខាធិការក្រសួងធម្មការនិងសាសនា នាព្រឹកថ្ងៃទី២០ ខែមករា ឆ្នាំ២០២២ បានដឹកនាំក្រុមការងារអញ្ជើញជួបសំណេះសំណាល និងនាំយកអំណោយមនុស្សធម៌បានមកពីអង្គការមួយសម្រាប់មួយយកមកចែកជូនប្រជាពលរដ្ឋចំនួន១០០គ្រួសារដែលមានជីវភាពទីទ័លក្រ នៃគ្រួសារគ្រីស្ទបរិស័ទ មកពីតាមបណ្ដាភូមិ ឃុំ នៅក្នុងស្រុកព្រះនេត្រព្រះ ខេត្តបន្ទាយមានជ័យ ។
លោក ឃូ ពៅ អភិបាលស្រុកព្រះនេត្រព្រះ បានសម្តែងនូវអំណរគុណយ៉ាងក្រៃលែងចំពោះម្ចាស់អំណោយ ដែលបានយកមកផ្តល់ជូនបងប្អូនប្រជាពលរដ្ឋ ដែលកំពុងជួបនូវការលំបាកផ្នែកជីវភាព ក្នុងកាលៈទេសៈនៃជំងឺរាតត្បាតកូវីដ១៩ រីឯការផ្តល់នូវអំណោយនេះគឺជាសក្ខីភាពសបញ្ជាក់ឲ្យ ឃើញពីទឹកចិត្តអាណិតស្រឡាញ់ខ្មែរជួយខ្មែរ ដែលជាប្រពៃណីដ៏ល្អផូរផង់។
ជាមួយគ្នានោះដែរឯកឧត្តម សៀ សុភ័ក្ត្រ បានមានប្រសាសន៍លើកឡើងថា អំណោយទាំងនេះគឺបានមកតាមរយៈអង្គការមួយសម្រាប់មួយ ដែលតែងតែជួយផ្តល់នូវអំណោយដល់បងប្អូនប្រជាពលរដ្ឋងាយរងគ្រោះចាស់ជរាគ្មានទីពឹង ជនក្រីក្រជាដើម ស្ទើរគ្រប់ទីកន្លែង។ហើយការផ្តល់នូវអំណោយរយៈកាលកន្លងមក គឺអង្គការនិងក្រុមបរិស័ទចែកអំណោយដោយគ្មានការរើសអើងពូជសាសន៍ឬសាសនាអ្វីឡើយ។
ឯកឧត្តមបញ្ជាក់ថា ទោះបីជាអំណោយនេះតិចតួចក្តីក៏ប៉ុន្តែជាទឹកចិត្តអាណិតស្រឡាញ់ និងជាការចូលរួមចំណែកជាមួយរាជរដ្ឋាភិបាល ដើម្បីសម្រាលនូវទុក្ខលំបាករបស់បងប្អូនបានមួយគ្រាផងដែរ។ចុងក្រោយឯកឧត្តមបាន ធ្វើការផ្ដាំផ្ញើដល់បងប្អូន ប្រជាពលរដ្ឋទាំងអស់បន្តនៃការការពារចំពោះមេរោគកូវីដ១៩ ព្រោះថាមេរោគ ១៩មិនទាន់រលាយបាត់សូន្យនៅឡើយនោះទេ ដូច្នេះត្រូវអនុវត្តតាមការណែនាំរបស់ក្រសួងសុខាភិបាល ពិសេសវិធានការរបស់ប្រមុខរាជរដ្ឋាភិបាលកម្ពុជា គឺ៣កុំ និង៣ការពារ ឲ្យបានខ្ជាប់ខ្ជួន។អំណោយដែលបានយកមកផ្តល់ជូននាពេលនេះក្នុងម្នាក់ៗ ទទួលបាននូវ អង្ករ២៥គីឡូក្រាម ,មី១កេស ,ត្រីខ ១យួរ ,ស្ករស១គីឡូក្រាម និងអំបិលអនាម័យ ១គីឡូក្រាមផងដែរ៕