ទំនិញហួសកាលបរិច្ឆេទ និងគ្មានច្បាប់អនុញ្ញាតចំនួន៣៣.២០គីឡូក្រាម ត្រូវបានមន្រ្តីជំនាញ ក.ប.ប. ខេត្តត្បូងឃ្មុំ ដកហូតយកទៅកំទិចចោល
ខេត្តត្បូងឃ្មុំ៖ដោយយល់ឃើញថាបច្ចុប្បន្នមានភាពអាណាធិបតេយ្យក្នុងការចរាចរណ៍តាំងលក់ផលិតផលគ្រឿងសំអាង ពិសេសឡេលាបមុខ លាបខ្លួនតែម្តង សុទ្ធសឹងតែនាំចូលពីប្រទេសជិតខាងមកគឺមិនមានបទដ្ឋានព័ត៌មាន និងមិនមានការទទួលស្គាល់ពីមន្ត្រីជំនាញសុខាភិបាលចេះតែលួចនាំចូលតាមច្រករបៀង ដោយលួចលាក់ពីមន្ត្រីជំនាញនោះ កាលពីព្រឹកថ្ងៃទី១៧ ខែមករា ឆ្នាំ២០២២ មន្ត្រីសាខា ក.ប.ប. ខេត្តត្បូងឃ្មុំ ដឹកនាំដោយលោក សាន វិជ្ជាសា រ៉ាវុធ ប្រធាន សាខាការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប .ប) ខេត្តត្បូងឃ្មុំ ដែលទើបតែផ្លាសប្តូពីខេត្តបន្ទាយមានជ័យមិនទាន់បានប៉ុន្មានផងលោកបានចុះ សហការជាមួយមន្ត្រីមន្ទីរពាណិជ្ជកម្មខេត្ត ចុះធ្វើការត្រួតពិនិត្យផលិតផលទំនិញនៅតាមបណ្តាគេហដ្ឋាន និងម៉ាតលក់ទំនិញ នៅក្នុងផ្សារស្ទឹង ស្ថិតនៅក្នុងស្រុកពញាក្រែក ខេត្តត្បូងឃ្មុំ ដើម្បីការពារដល់អ្នកប្រើប្រាស់។
ក្នុងការចុះពិនិត្យនោះដែរជាលទ្ធផលមន្ត្រីជំនាញដកហូតបាននូវផលិតផលហួសកាលបរិច្ឆេទ និងមិនអនុលោមច្បាប់ បានចំនួន ៣៣.២០គីឡូក្រាម ក្នុងនោះមាន កាហ្វេ មីចិន និងប្រភេទឡេដែលគ្មានលិខិតបញ្ជាក់ប្រវេទន៍ពីក្រសួងសុខាភិបាល។ក្នុងសកម្មភាពជាមួយគ្នានេះដែរ មន្ត្រីជំនាញបានធ្វើការពន្យល់ណែនាំអាជីវករដែលជាម្ចាស់ម៉ាតលក់ទំនិញ និងលក់គ្រឿងសំអាងឲ្យមានការយល់ដឹងក្នុងការដាក់តាំងលក់ទំទិញ និងលក់បន្ត ត្រូវតែមានលិខិតអនុញ្ញាតិពីស្ថាប័នជំនាញពាក់ព័ន្ធ និងមានបិទភ្ជាប់បទដ្ឋានព័ត៌មានសម្រាប់អ្នកប្រើប្រាស់ ស្របតាមច្បាប់ស្តីពីកិច្ចការពារអ្នកប្រើប្រាស់ផងដែរ៕