ជំនាញ សហការជាមួយកម្លាំងសមត្ថកិច្ចចុះបង្ក្រាបជាក់ស្ដែង នូវទីតាំងសត្វជ្រូក នាំចូលដោយខុសច្បាប់ពីប្រទេសថៃ នៅឃុំអូរបីជាន់ ស្រុកអូរជ្រៅ
ខេត្តបន្ទាយមានជ័យ៖នៅថ្ងៃទី១៧ ខែមករា ឆ្នាំ២០២២ កម្លាំងជំនាញដឹកនាំលោក ហ៊ុយ ទូច ប្រធានការិយាល័យកសិកម្មខេត្ដ សហការជាមួយកម្លាំងកងរាជអាវុធហត្ថស្រុកអូរជ្រៅ ដឹកដោយលោកវរសេនីយ៍ត្រី ឈុន ហ៊ីល មេបញ្ជាការរងស្រុកអូរជ្រៅ លោក តុល សារិន មេឃុំអូរបីជាន់ កម្លាំងប៉ុស្ដិ៍រដ្ឋបាលអូរបីជាន់ និងមន្ទីកសិកម្មខេត្ដបន្ទាយមានជ័យ ព្រមទាំងមានការសម្របសម្រួលនិតិវិធីដោយលោក លឹម ប៊ុនសុភ័ក្ត្រ ព្រះរាជអាជ្ញារងខេត្ដបន្ទាយមានជ័យ ចុះបង្ក្រាបជាក់ស្ដែងនូវទីតាំងសត្វជ្រូកនាំចូលដោយខុសច្បាប់ពីប្រទេសថៃ និងផលិតផលពីសត្វ នៅចំណុចភូមិបន្ទាយថ្មី ឃុំអូរបីជាន់ ស្រុកអូរជ្រៅ ខេត្ដបន្ទាយមានជ័យ។
សមត្ថកិច្ចបានឲ្យដឹងថា សត្វជ្រូកសរុប៧០ក្បាល ត្រូវម្ចាស់ទីតាំងឈ្មោះតាំ ជ័យ ភេទប្រុស អាយុ៤០ឆ្នាំ ស្នាក់នៅបណ្ដោះអាសន្នប្រកបរបរ នៅភូមិអូរបីជាន់ ឃុំអូរបីជាន់ ស្រុកអូរជ្រៅបានវ៉ៃបំផ្លាញទ្រុងជ្រូករបស់ខ្លួនប្រលែងសត្វជ្រូករត់ចេញពីទ្រុងអស់ នៅសល់តែសត្វជ្រូករស់ចំនួន២ក្បាល និងមានការឆែកឆេរ លំនៅដ្ឋានម្ចាស់ទីតាំងដកហូតបានសត្វជ្រូកធ្វើរួចចំនួន៩ក្បាល ចំណែកម្ចាស់ទីតាំងបានរត់គេចខ្លួនបាត់។
ករណីខាងលើនេះលោកព្រះរាជអាជ្ញារង អោយជំនាញការិយាល័យកសិកម្មខេត្ដកសាងសំណុំរឿងបញ្ជូនទៅតុលាការខេត្ដបន្ទាយមានជ័យ ដើម្បីអនុវត្តតាមនិតិវិធី៕