រថយន្តធុនធំសឺមីរ៉ឺម៉ក មិនគោរពភ្លើងសញ្ញាត្រង់ស្តុបទី១ ក្រុងសិរីសោភ័ណ បុករថយន្តនិងចូលផ្ទះពលរដ្ឋបង្កការខូចខាត សំណាងមិនបណ្តាលឲ្យមនុស្សគ្រោះថ្នាក់
ខេត្តបន្ទាយមានជ័យ៖ដោយសាររថយន្តធំសឺមីរ៉ឺម៉ក មិនគោរពភ្លើងសញ្ញាត្រង់ស្តុបទី១ ក្រុងសិរីសោភ័ណ បណ្តាលអោយបុករថយន្ត១គ្រឿងទៀតនិងចូលផ្ទះប្រជាពលរដ្ឋ បង្កខូចខាតធ្ងន់ទាំងផ្ទះ ទាំងរថយន្ត។
ហេតុការណ៍នេះបានកើតឡើងនៅថ្ងៃទី១៥ ខែមករា ឆ្នាំ២០២២ វេលាម៉ោង៤និង៤៥នាទីក្នុងទីប្រជុំជន លើកំណាត់ផ្លូវបំបែកនៃផ្លូវជាតិលេខ៥៦ និងផ្លូវជាតិលេខ៦ ត្រង់ចំនុចភ្លើងស្តុប ស្ថិតនៅភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ្ឌ ខេត្តបន្ទាយមានជ័យ ។
មន្ត្រីនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តបន្ទាយមានជ័យបានឲ្យដឹងថាៈករណីគ្រោះថ្នាក់ចរាចរណ៍នេះកើតឡើងរវាងរថយន្តសឺមីរ៉ឺម៉កពាក់ផ្លាកលេខមុខ3C-5506ភ្នំពេញនិងផ្លាកលេខក្រោយ រឺម៉ក4A-2016ភ្នំពេញបើកបរក្នុងទិសពីកើតមកលិចល្បឿនលឿន។
មន្ត្រីដដែរបន្តថា មូលហេតុនៃគ្រោះថ្នាក់នេះ ដោយសារមិនគោរពភ្លើងសញ្ញាពណ៏ក្រហម ហើយគេចពីរថយន្តបែនពាក់ផ្លាក លេខ3A-8717ភ្នំពេញ ដែលបើកបរពីត្បួងទៅជើងភ្លើងសញ្ញាពណ៏បៃតង ទើបក៏បុកប៉ះរថយន្តបែនចំហៀងខាងស្តាំ រួចក៏បន្តបុករះប៉ះផ្ទះប្រជាពលរដ្ឋ ហើយបន្តទៅបុកបង្គោលភ្លើងសញ្ញាចរាចរណ៍៨បង្គោលសញ្ញាចរាចរណ៍ថែមទៀត ។
ក្នុងករណីគ្រោះថ្នាក់នេះបណ្តាលឲ្យរថយន្តបែនខូចខាតស្រាល០១គ្រឿងខូច ផ្ទះខាងមុខខូចខាតធ្ងន់ បាក់បង្គោលភ្លើងស្តុបអស់០១ដើមនិងបង្គោលសញ្ញាចរាចរណ៍ផងទៀត ។
ប្រភពព័ត៌មានបានឲ្យដឹងដែរថា ក្នុងអំឡុងពេលបង្កគ្រោះថ្នាក់នេះ ជាពេលយប់ទៀបភ្លឺដែរ ទើបមិនខូចខាតយានយន្តផ្សេងទៀតនិងបង្កបាត់បង់ជីវិតឬរងរបួសមនុស្ស ។ករណីនេះ ភាគីបង្កនិងនគរបាលជំនាញ នឹងសម្របសម្រួលដោះស្រាយសំណងខូចខាតទាំងផ្នែករដ្ឋ និងផ្នែកឯកជន ព្រោះគ្រោះថ្នាក់នេះ មិនបង្ករងរបួសឬស្លាប់មនុស្សដែរ៕