ចាប់ឃាត់ខ្លួនមេខ្យល់៣នាក់ ដែលបម្រុងនាំពលករឆ្លងដែនខុសច្បាប់ទៅប្រទេសថៃ បញ្ជូនទៅតុលាការខេត្តបន្ទាយមានជ័យ
ខេត្តបន្ទាយមានជ័យ៖ពលករខ្មែរចំនួន២៥នាក់ដែលបម្រុងលួចឆ្លងដែនខុសច្បាប់ទៅប្រទេសថៃ តាមរយះមេខ្យល់ ត្រូវបានកម្លាំងសមត្ថកិច្ចបញ្ជូនទៅធ្វើចត្តាឡីស័ក រីឯមេខ្យល់ចំនួន៣នាក់ត្រូវបានចាប់បញ្ជូនទៅតុលាការខេត្តបន្ទាយមានជ័យ នៅរសៀលថ្ងៃទី១១ ខែឧសភា ឆ្នាំ២០២១នេះ ដើម្បីអនុវត្តតាមនិតិវិធីច្បាប់ បន្ទាប់ចាប់ឃាត់ខ្លួនខណៈដែលបម្រុងនាំពលករខ្មែរឆ្លងដែរខុសច្បាប់ ក្នុងអំឡុងដែលកំពុងតែរឹតបន្តឹងតាមបន្ទាត់ព្រំដែនដោយអនុវត្តតាមបទបញ្ជារបស់ប្រមុខរាជរដ្ឋាភិបាលកម្ពុជានោះ។
សមត្ថកិច្ចបានឲ្យដឹងថា មេខ្យល់ទាំង០៣នាក់ដែលឃាត់ខ្លួននោះ១.ឈ្មោះ សុខ វិបុល ភេទប្រុស អាយុ៣០ឆ្នាំ បច្ចុប្បន្ន រស់នៅភូមិ និងសង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
២.ឈ្មោះ ឌឹប នុន ភេទប្រុស អាយុ៥២ឆ្នាំ បច្ចុប្បន្ន រស់នៅភូមិចំបក់ ឃុំបឹងបេង ស្រុកម៉ាឡៃ ខេត្តបន្ទាយមានជ័យ និង៣.ឈ្មោះ ម៉ៃ សៃហុង ភេទប្រុស អាយុ២១ឆ្នាំ បច្ចុប្បន្ន រស់នៅភូមិភ្នំរូង ឃុំបឹងបេង ស្រុកម៉ាឡៃ ខេត្តបន្ទាយមានជ័យ។
សមត្ថកិច្ចបញ្ជាក់ថា ការចាប់ឃាត់ខ្លួនមេខ្យល់ចំនួន៣នាក់នេះបានធ្វើឡើងខណៈដែលកម្លាំងមូលដ្ឋានកងរាជអាវុធហត្ថស្រុកម៉ាឡៃ និងកម្លាំងតំបន់ប្រតិបត្តិការសឹករងបន្ទាយមានជ័យ ដឹកនាំដោយលោកវរសេនីយ៍ឯក រិទ្ធ រ៉ម មេបញ្ជាការរង តំបន់ប្រតិបត្តិការសឹករងបន្ទាយមានជ័យ ទទួលទិសទី១ បានចុះល្បាតតាមបន្ទាត់ព្រំដែន នៅវេលាម៉ោង០១ និង៣០នាទីរំលងអាធ្រាត ឈានចូលថ្ងៃទី១០ ខែឧសភា ឆ្នាំ២០២១ ដើម្បីទប់ស្កាត់ការលួចចេញ-ចូលទៅប្រទេសថៃដោយខុសច្បាប់ លុះដល់ចំណុចភូមិសង្កែ ឃុំបឹងបេង ស្រុកម៉ាឡៃ ក៏ប្រទះឃើញម៉ូតូកង់បីឥណ្ឌា០១គ្រឿងកំពុងដឹកពលករចំនួន០៧នាក់ ពេលនោះកម្លាំងចម្រុះក៏បានឃាត់សួរនាំទើបដឹងថា ពលករទាំងអស់ ត្រូវបានម្ចាស់ម៉ូតូកង់បីដឹកទៅបម្រុងឆ្លងដែនទៅថៃ ទើបកម្លាំងធ្វើការឃាត់ខ្លួនទាំងអស់តែម្ដង រួចបញ្ជូនទៅមូលដ្ឋានកងរាជអាវុធហត្ថស្រុក ដើម្បីធ្វើការសាកសួរចម្លើយ។
បន្ទាប់មកទៀតនៅវេលាម៉ោង០៣និង៤០នាទីទៀបភ្លឺ ថ្ងៃដដែល នៅចំណុចភូមិ.ឃុំដដែល តែទីតាំងផ្សេងគ្នា កម្លាំងចម្រុះក៏បន្តធ្វើប្រតិបត្តិកាបង្រ្កាប និងឃាត់ខ្លួនមេខ្យល់០២នាក់បន្ថែមទៀត និងពលករចំនួន១៨នាក់ទៀតផងដែរ រួចបន្តបញ្ជូនទៅសាកសួរចម្លើយរួមគ្នានៅមូលដ្ឋានកងរាជអាវុធហត្ថស្រុកម៉ាឡៃ។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើស នៃបញ្ជាការដ្ឋានកងរាជអាវុធហត្ថខេត្ត បានឱ្យដឹងថា ពលករទាំងអស់ក្រោយពីកម្លាំងជំនាញសាកសួរចម្លើយរួចមក បានឆ្លើយសារភាពថា ពួកគេចង់ទៅរកការងារធ្វើនៅប្រទេសពិតប្រាកដមែន ដោយមេខ្យល់ទាំងនោះប្រាប់ថា ពួកគេនឹងនាំឆ្លងដែនទៅប្រទេសថៃបាន ដោយយកតម្លៃជូនក្នុងម្នាក់៦០០០បាត(លុយថៃ) ស្មើជិត២០០ដុល្លា។
ក្រោយពីកម្លាំងជំនាញសាកសួរចម្លើយរួចមក មេខ្យល់ទាំង៣នាក់បានឆ្លើយសារភាពថា ពួកគេបានទំនាក់ទំនងជាមួយពលករផ្សេងៗគ្នា ដើម្បីនាំចេញទៅប្រទេសថៃពិតប្រាកដមែន៕
.jpg)
.jpg)