បុរសម្នាក់ស្លាប់ភ្លាមៗនឹងកន្លែង ក្រោយពីបើកម៉ូតូលឿនទៅបុករថយន្តធុនធំ ខូចចតលើទ្រូងផ្លូវគ្មានភ្លើងសម្គាល់
ខេត្តបន្ទាយមានជ័យ៖បុរសម្នាក់បានស្លាប់ភ្លាមៗនៅនឹងកន្លែងកើតហេតុ បន្ទាប់ពីបើកម៉ូតូក្នុងល្បឿនលឿនខ្វះការប្រុងប្រយ័ត្ន ទៅបុករថយន្តធុនធំខូចដែលកំពុងតែចតលើទ្រូងផ្លូវ កាលពីវេលាម៉ោង៧និង៤០នាទីយប់ ថ្ងៃទី៦ ខែមេសា ឆ្នាំ២០២១ នៅលើផ្លូវជាតិលេខ៥ ត្រង់ចំណុចចន្លោះបង្គោលគីឡូម៉ែត្រលេខ៣៧២-៣៧៣ ស្ថិតក្នុងភូមិថ្មី ឃុំសំរោង ស្រុកអូរជ្រៅ ខេត្តបន្ទាយមានជ័យ ។
នគរបាលស្រុកអូរជ្រៅ បានឲ្យដឹងថា ជនរងគ្រោះមានឈ្មោះរ៉ន សារុំ ភេទប្រុស អាយុ៣០ឆ្នាំ រស់នៅភូមិរ៉ាចំហៀង ឃុំឬស្សីក្រាំង ស្រុកមោង ខេត្តបាត់ដំបង។
នគរបាលស្រុកអូរជ្រៅបញ្ជាក់ថា មុនពេលកើតហេតុជនរងគ្រោះ បានបើកម៉ូតូ១គ្រឿងពីកើតទៅលិចក្នុងល្បឿនលឿន បើកមកដល់ចំណុចកើតហេតុក៏រេចង្កូត ទៅបុករថយន្តធុនធំពីក្រោយ ដែលខូចដាច់គ្រឡេចតនៅលើទ្រូងផ្លូវ ដោយដាក់មែកឈើចំនួន៣កន្លែងដែរ តែមិនភ្លើងបំភ្លឺជាសម្គាល់ បណ្តាលជនរងគ្រោះស្លាប់ភ្លាមៗនៅនឹងកកន្លែង។
ក្រោយកើតហេតុអ្នកបើកអ្នកបើករថយន្តបានរត់គេចខ្លួនបាត់ បន្សល់ទុករថយន្តដែលខូច ម៉ូតូខូចធ្ងន់ និងរថយន្តខូចស្រាល។រថយន្ត និងម៉ូតូនគរបាលចរាចរណ៍ស្រុកអូរ ជ្រៅយកមករក្សាទុកនៅអធិការដ្ឋាននគរបាលស្រុកអូរជ្រៅ រងចាំស្រាវជ្រាវរកម្ចាស់មកដោះស្រាយនៅពេលក្រោយ។ដោយឡែកសពជនរងគ្រោះ ត្រូវបាននគរបាលប្រគល់ជូនក្រុមគ្រួសារ យកទៅចាត់ចែងធ្វើបុណ្យតាមប្រពៃណី៕