គណៈបញ្ជាការឯកភាពខេត្តបន្ទាយមានជ័យ ដាក់បទបញ្ជាបន្ថែមដល់កម្លាំងចម្រុះ ត្រូវពង្រឹងការទប់ស្កាត់ការឆ្លងដែនខុសច្បាប់ ក្នុងដំណាក់កាលនៃការរីករាលដាលជំងឺកូវីដ១៩
ខេត្តបន្ទាយមានជ័យ៖ក្នុងដំណើរអញ្ជើញបន្តចុះត្រួតពិនិត្យរឹតបន្តឹង នៅតាមខ្សែបន្ទាប់ព្រំដែនកម្ពុជា-ថៃ នៅព្រឹកថ្ងៃទី២០ ខែមេសា ឆ្នាំ២០២១ របស់គណៈបញ្ជាការឯកភាពខេត្ត ក្រុង ដឹកនាំដោយឯកឧត្ដម ខេង ស៊ុម ប្រធានក្រុមប្រឹក្សាខេត្តបន្ទាយមានជ័យ,ឯកឧត្ដម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ អមដំណើរដោយ មេបញ្ជាការ-មេបញ្ជាការរងអាវុធហត្ថខេត្ត ,កងពលថ្មើជើងលេខ៥១ យោធាខេត្ត ,ស្នងការរងនគរបាលខេត្ត ,អាជ្ញាធរក្រុងប៉ោយប៉ែត និងមេបញ្ជាការវរការពារព្រំដែនគោក ៨៩១ និង៩១១ បានដាក់បទបញ្ជាបន្ថែមដល់កម្លាំងចម្រុះមាននគរបាលការពារព្រំដែន អាវុធហត្ថ យោធា ទាំងអស់ ត្រូវពង្រឹងការទប់ស្កាត់ការឆ្លងដែនខុសច្បាប់ក្នុងដំណាក់កាល នៃការរីករាលដាលជំងឺកូវីដ១៩ ឲ្យបានតឹងរឹងបំផុត។
ក្នុងនោះអាជ្ញាធរខេត្ត ក្នុងនាមគណៈបញ្ជាការឯកភាពក៏បានណែនាំដល់កងកម្លាំងទាំងអស់ ត្រូវបង្កើនការប្រុងប្រយ័ត្នឲ្យបានខ្ពស់បំផុតក្នុងការការពារ និងទប់ស្កាត់ឲ្យខានតែបាននូវរោគរាតត្បាត នៃជំងឺកូវីដ-១៩នេះ ហើយចូលរួមធ្វើអនាម័យឲ្យបានគ្រប់ៗគ្នា ពិសេសត្រូវចូលរួមអនុវត្តឲ្យបានខ្ជាប់ខ្ជួននូវវិធានការរបស់ប្រមុខរាជរដ្ឋាភិបាល សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ គឺ៣ការពារ និង៣កុំ ដើម្បីបញ្ជៀសការឆ្លងរីករាលដាលនៃជំងឺកូវីដ១៩ នៅក្នុងសហគមទ្រង់ទ្រាយធំ។
បន្ទាប់ពីការអញ្ជើញពិនិត្យមើលភូមិសាស្ត្រព្រំដែន ឯកឧត្តម ខេង ស៊ុម ប្រធានក្រុមប្រឹក្សាខេត្ត និង ឯកឧត្តម អ៊ុំ រាត្រី អភិបាលខេត្ត បានអញ្ជើញផ្តល់អំណោយឧបត្ថម្ភរបស់ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ជូនដល់កងកម្លាំងទាំង៣ប្រភេទ ដែលបានកំពុងឈរជើងក្នុងភូមិសាស្ត្រ ក្រុងប៉ោយប៉ែត មានចំនួន៦អង្គភាព ទទួលបានៈ
១.ទិសទី១ ខេត្តបន្ទាយមានជ័យ មី ១០កេស ទឹកបរិសុទ្ធអង្គរ ៣០កេស និងទឹកក្រូច ៣៣យួរ
២.ស្នងការនគរបាលខេត្ត មី៣០ កេស ទឹកបរិសុទ្ធ៧០ កេស និងទឹកក្រូច ៦០យួរ
៣.កងពលថ្មើរជើងលេខ៥១ មី៣០កេស ទឹកបរិសុទ្ធ៧០កេស ទឹកក្រូច ៦០យួរ
៤.យោធាខេត្ត មី២០កេស ទឹកបរិសុទ្ធ៥០ កេស ទឹកក្រូច៤០ យួរ
៥.កងរាជអាវុធហត្ថខេត្ត មី២០កេស ទឹកបរិសុទ្ធ៥០កេស ទឹកក្រូច ៤០យួរ
៦.អន្តោប្រវេសច្រកអន្តរជាតិប៉ោយប៉ែត មី១០កេស ទឹកបរិសុទ្ធ ៣០កេស និងទឹកក្រូច ៣៣យួរផងដែរ៕
