លោក តួ ធានទឺ សូមធ្វេីការបដិសេធ និងច្រានចោលទាំងស្រុង រាល់ព័ត៌មានក្លែងក្លាយ ប្រឌិត ចោទប្រកាន់មកលើរូបលោក ពាក់ព័ន្ធនិងវិវាទដីធ្លី
ខេត្តបាត់ដំបង៖នៅថ្ងៃទី២២ ខែមិនា ឆ្នាំ២០២១នេះ លោក តួ ធានទឺ បានធ្វើការបដិសេធ និងច្រានចោលទាំងស្រុង រាល់ព័ត៌មានក្លែងក្លាយ ប្រឌិតឡាយបង្ហោះ កាលពីថ្ងៃទី២១ ខែមិនា ឆ្នាំ២០២១ ដោយចោទប្រកាន់មកលើរូបលោកថា បានបិទផ្លូវ រំលោភយកដីផ្លូវ មិនអោយពលរដ្ឋប្រើប្រាស់ និងដីអ្នកស្រុកមួយចំនួនទៀត ស្ថិតនៅភូមិកំប្រង់ ឃុំតាក្រី ស្រុកកំរាង ខេត្តបាត់ដំបង។
លោក តួ ធានទឺ បានអោយដឹងថា ព័ត៌មានដែលបានឡាយបង្កាច់បង្ខូចមកលើរូបលោក គឺផ្ទុយពីការពិត គឺជាព័ត៌មានដែលមានការរៀបចំឡើងដោយបុគ្គលខិលខូចចំនួន ៥រូប ដែលបានរំលោភយកដីរបស់គាត់ រួមមាន ៖
ទី១៖ ឈ្មោះ ជា ភួងភិរម្យ អតីតជាមេបញ្ជាការកងពលតូចលេខ៥៣ បច្ចុប្បន្នមានតួនាទីជាអនុរដ្ឋលេខាធិការក្រសួងការពារជាតិ
ទី២៖ ឈ្មោះ ជុន វុទ្ធី ជាយោធាពាក់ស័ក្ដិបួនកន្លះ
ទី៣៖ ឈ្មោះ យឿន គឹមនី
ទី៤៖ ឈ្មោះ ប៉ែន សុវណ្ណារ៉ា
ទី៥៖ ឈ្មោះ ទូច ចិន្ដា ជាមេភូមិ។
លោក តួ ធានទឺ បានបញ្ជាក់បន្ថែមថា ជនខិលខូចខាងលើ បានឃុបឃិតគ្នារំលោភយកដីលោក ហើយមានចេតនាទំលាក់កំហុសមកលើរូបលោកបន្ថែមទៀត ធ្វើអោយថ្នាក់ដឹកនាំ និងមហាជន មានការភណ្ឌច្រឡំ និងធ្វើអោយប៉ះពាល់ដល់កិត្តិយស និងសេចក្ដីថ្លៃថ្នូ ពីព្រោះដីរបស់គាត់ មានចំនួន ១៤ហិកតា ដែលមានលិខិតកាន់កាប់ និងប្រើប្រាស់ដីធ្លីទទួលស្គាល់ដឹងឮពីអាជ្ញាធរភូមិឃុំ ចាប់តាំងពីឆ្នាំ២០០០មកម្លេះ បែជានាំគ្នាមកសង់ផ្ទះ កាយស្រះ ដឹកអាចម៍ដីលក់រាប់ឆ្នាំយ៉ាងអនាធិបតេយ្យ និងកាយយកអាចម៍ដី បំផ្លាញផលដំណាំ ដែលលោកបានដាំដុះអស់មួយចំនួនថែមទៀត។ហើយលោកក៏បានប្ដឹងទៅស្ថាប័នមានសមត្ថកិច្ចរួចរាល់អស់ហើយដែរ។ ក្នុងនោះលោកក៏បានប្ដឹងទៅតុលាការផងដែរ។ រឿងទាំងអស់ ទុកអោយច្បាប់ជាអ្នកដោះស្រាយ មិនត្រូវមកឡាយបរិហារកេរ្ដិ៍បែបនេះទេ។
លោក ទូច ចន្ដា មេភូមិកំប្រង់ បានអោយដឹងថា លោកជាអតីតនៅក្នុងភូមិនេះ លោកទទួលស្គាល់ថា លោក តួ ធានទឺ ពិតជាម្ចាស់កម្មសិទ្ធិនៅលើដីនៅតំបន់សរុបជាង ១០ហិកតា ពិតប្រាកដមែន ដែលបានកាន់កាប់ និងប្រើប្រាស់ចាប់តាំងពីឆ្នាំ២០០០ ពោលគឺចាប់តាំងពីលោកនៅជាលេខាភូមិ រហូតមកដល់ឆ្នាំ២០០៥ លោកត្រូវបានតែងតាំងជាមេភូមិកំប្រង់នេះ ៕ដោយ៖ប៉ែន នួន