ជនសង្ស័យ២នាក់ ត្រូវអាវុធហត្ថបញ្ជូនទៅតុលាការខេត្តបន្ទាយមានជ័យ ពាក់ព័ន្ធករណីកាប់បំផ្លាញម៉ូតូ របស់ជនរងគ្រោះ ដោយចេតនា
ខេត្តបន្ទាយមានជ័យ៖បន្ទាប់ពីចាប់ឃាត់ខ្លួនជនសង្ស័យចំនួន២នាក់ជាបន្តបន្ទាប់ លើករណីធ្វើឱ្យខូចខាតដោយចេតនា(កាប់បំផ្លាញម៉ូតូ)ដែលកើតឡើងកាលពីថ្ងៃទី២៥ ខែកុម្ភះ ឆ្នាំ២០២១ នៅចំណុចកែងផ្សារចំការគ ស្ថិតក្នុងភូមិ/សង្កាត់ កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ និងដោយផ្អែកទៅលើចំលើយសារភាពរបស់ជនសង្ស័យមកនោះនៅព្រឹកថ្ងៃទី២ ខែមីនា ឆ្នាំ២០២១កម្លាំងជំនាញព្រហ្មទណ្ឌកងរាជអាវុធហត្ថខេត្ត បញ្ជូនទៅសាលាដំបូងខេត្ត ដើម្បីចាត់ការបន្តតាមនិតិវិធី។
ពាក់ព័ន្ធទៅនឹងករណីខាងលើនេះបើតាមលោកវរសេនីយ៍ត្រី យ៉ាន់ សុវណ្ណ មេបញ្ជាការមូលដ្ឋានអាវុធហត្ថក្រុង បានឱ្យដឹងថា ករណីខាងលើនេះជនរងគ្រោះឈ្មោះ បិត ធាអ៊ី ភេទប្រុស អាយុ២១ឆ្នាំ បានមកដាក់ពាក្យបណ្ដឹងនៅមូលដ្ឋានអាវុធហត្ថក្រុង តាំងពីថ្ងៃទី២៦ ខែកុម្ភៈ ឆ្នាំ២០២១ មកម្លេះ តែដោយកម្លាំងធ្វើការស៊ើបអង្កេត និងស្រាវជ្រាវលើករណីជាក់ស្ដែង ទើបឈានដល់ការឃាត់ខ្លួនជាបន្តបន្ទាប់បានជនសង្ស័យចំនួន០២នាក់ នៅថ្ងៃទី២៨ ខែកុម្ភៈ ឆ្នាំ២០២១ វេលាម៉ោង១៧និង៤០នាទី ហើយបញ្ជូនមកមូលដ្ឋានអាវុធហត្ថក្រុងដើម្បីធ្វើការសាកសួរ។
ជនសង្ស័យទាំង០២នាក់ មានឈ្មោះ ចន សត្យា ហៅម៉ា ភេទប្រុស អាយុ១៨ឆ្នាំ មុខរបរជាងម៉ូតូ បច្ចុប្បន្នរស់នៅភូមិដីឡូតិ៍ សង្កាត់ទឹកថា ក្រុងសិរីសោភ័ណ ខេត្តបន្ទាយមានជ័យ និងឈ្មោះ រឿម ណាវីន ភេទប្រុស អាយុ១៩ឆ្នាំ បច្ចុប្បន្នរស់នៅភូមិតាគល់ ឃុំផ្គាំ ស្រុកស្វាយចេក ខេត្តបន្ទាយមានជ័យ។នៅចំពោះមុខអាវុធហត្ថក្រុងជនសង្ស័យទាំង០២នាក់បានឆ្លើយសារភាពថា ពួកគេពិតជាបានចូលរួមក្នុងសកម្មភាព កាប់បំផ្លាញម៉ូតូរបស់ជនរងគ្រោះខាងលើ ពិតប្រាកដមែន ប៉ុន្តែពួកគេពុំបានកាប់ទៅលើម៉ូតូនោះទេ អ្នកដែលកាប់គឺបក្សពួកគេម្នាក់ទៀតឈ្មោះ ឈូ ដោយពួកគេមិនស្គាល់ត្រកូល ហើយមូលហេតុឈ្មោះ ឈូ កាប់ទៅលើម៉ូតូជនរងគ្រោះ ឈ្មោះ បិត ធាអ៊ី ព្រោះឈ្មោះ បិត ធាអ៊ី និងបក្សពួកធ្លាប់យកដុំថ្មគប់ទៅលើឈ្មោះ ឈូ បណ្ដាលឱ្យរងរបួសដៃកន្លងមក។
ដោយផ្អែកលើពាក្យបណ្ដឹង និងចម្លើយសារភាព ជនសង្ស័យទាំង០២នាក់ ត្រូវបានកម្លាំងជំនាញ អាវុធហត្ថក្រុងកសាងសំណុំរឿងបញ្ជូនទៅការិយាល័យព្រហ្មទណ្ឌអាវុធហត្ថខេត្តដើម្បីចាត់ការបន្តតែម្តង៕
