អ្នកអង្គម្ចាស់ ស៊ីសុវត្ថិ សិទ្ធិដែន យាងសួរសុខទុក្ខប្រជានុរាស្ត្រ និងនាំយកព្រះរាជអំណោយជាសម្ភារៈសិក្សា តុ កៅអី ចែកជូនសិស្សានុសិស្សចំនួន២៥០នាក់ នៅចំណុចភូមិសាស្ត្រអ៊ុងម៉ុង ស្រុកម៉ាឡៃ
ខេត្តបន្ទាយមានជ័យ៖ដោយមើលឃើញពីការលំបាក និងខ្វះខាតរបស់ព្រះជានុរាស្ត្រ រស់នៅចំណុចភូមិសាស្ត្រអ៊ុងម៉ុង ស្ថិតនៅក្នុងឃុំទួលពង្រ ស្រុកម៉ាឡៃ ខេត្តបន្ទាយមានជ័យនោះ អ្នកអង្គម្ចាស់ ស៊ីសុវត្ថិ សិទ្ធិដែន បានសព្វព្រះហឬទ័យ ទ្រង់យាងសួរសុខទុក្ខប្រជានុរាស្ត្រ និងនាំយកព្រះរាជអំណោយជាសម្ភារៈសិក្សា តុ កៅអី ចែកជូនដល់សិស្សានុសិស្សចំនួន២៥០នាក់ ក្នុងម្នាក់ៗទទួលបាន សៀវភៅ ១ដុំ ,ប៊ិច ២ដើម ,ខ្មៅដៃ ២ដើម ,តុ សិស្សចំនួន៣៦, តុ គ្រូចំនួន៣, កៅអីគ្រូចំនួន៣ និងក្ដារខៀនចំនួន៣ ផងដែរ។ក្នុងនោះអ្នកអង្គម្ចាស់ ស៊ីសុវត្ថិ សិទ្ធិដែន ក៏បានផ្តល់ជូននូវថវិការមួយចំនួនដល់ជនពិការ លោកយាយ លោកតាចាស់ជរា គ្មានទីពឹងផងដែរ។
នាឱកាសនោះដែរ អ្នកអង្គម្ចាស់ ស៊ីសុវត្ថិ សិទ្ធីដែន បានមានព្រះរាជបន្ទូលផ្តាំផ្ញើសួរសុខទុក្ខដោយក្តីនឹករលឹកពីសំណាក់ ព្រះករុណា ព្រះបាទសម្តេច ព្រះនរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេច ព្រះនរោត្ដម មុនីនាថ សីហនុ សម្តេចព្រះវររាជមាតាជាតិខ្មែរ ដល់ព្រះជានុរាស្ត្រដែលជាកូន ជាចៅរបស់ព្រះអង្គ ជានិច្ចកាលព្រះអង្គទាំងទ្វេរតែងតែយកព្រះរាជហឬទ័យទុកដាក់ចំពោះកូនចៅរបស់ព្រះអង្គគ្រប់ទីកន្លែងនៅទូទាំងប្រទេស។
លោក គង់ ជា តំណាងឲ្យប្រជាពលរដ្ឋ ចំនួន១៣៥០គ្រួសារ រស់នៅចំណុចខាងលើ និងជាប្រធានក្រុមការងារស្ម័គ្រចិត្ត បានមានប្រសាសន៍ថា ប្រជាពលរដ្ឋរស់នៅចំណុចខាងលើនេះ ថ្នាក់ដឹកនាំមិនទាន់ទទួលស្គាល់ និងបង្កើតជាភូមិជាផ្លូវការនូវឡើយទេ គ្រាន់តែអាជ្ញាធរមូលដ្ឋានដឹងលឺតែប៉ុណ្ណោះ។ដូច្នេះដើម្បីការពារសន្តិសុខ របស់ប្រជាពលរដ្ឋនោះពួកគាត់បានសហការរួមគ្នាបង្កើតជាក្រុមការងារស្ម័គ្រចិត្ត ក្នុងគោលបំណងជួយដោះស្រាយរាល់ទុកលំបាកផ្សេងៗដែលកើតមានឡើងផងដែរ។
អ្នកគ្រូស្ម័គចិត្តង្រៀននៅសាលាខាងលើបានបញ្ចេញនូវអារម្មពិត ដោយក្តុកក្តួលបញ្ជាក់ថា ពួកខ្លួនសប្បាយរីករាយខ្លាំងណាស់ដែលអ្នកអង្គម្ចាស់ ស៊ីសុវត្ថិ សិទ្ធិដែន ទ្រង់យាងនាំយកព្រះរាជអំណោយជាសម្ភារៈសិក្សា តុ កៅអី ចែកជូនសាលាដែលកំពុងតែមានការខ្វះខាត ដោយសារតែនៅតំបន់ភូមិសាស្ត្រនេះ ប្រជាពលរដ្ឋទើបតែមករស់នៅបានប្រមាណជាង១ឆ្នាំ ទើបបានជាមានការខ្វះខាតច្រើនបែបនេះ រីឯចំនួនសិស្សកាន់តែកើនឡើង។
អ្នកគ្រូទៀតបញ្ជាក់ថា ដោយមើលឃើញពីការលំបាកនិងខ្វះខាតរបស់មាតា បីតាសិស្ស ឯសិស្សកាន់តែកើនឡើង បានធ្វើឲ្យពួកគាត់លះបង់មកបង្រៀនដោយស្ម័គចិត្តគ្មានប្រាក់បៀវត្សប្រចាំខែនឹងគេ ថែមទាំងជិះម៉ូតូឆ្លងកាត់ផ្លូវឆ្ងាយរយះពេល១ម៉ោងកន្លះទើបបានមកដល់សាលាបង្រៀនសិស្ស។ដូច្នេះប្រជាពលរដ្ឋ លោកគ្រូ អ្នកគ្រូ ស្នើសុំឲ្យថ្នាក់ដឹកនាំជួយសម្រួលឲ្យតំបន់នេះបានបង្កើតភូមិពេញសិទ្ធិដូចគេឯងផង ម្យ៉ាងវិញទៀតស្នើសុំប្រមុខថ្នាក់ដឹកនាំ និងសប្បុរសជននានា ជួយឧបត្ថម្ភ ជាសាលារៀន មន្តីរពេទ្យ សម្ភារៈសិក្សា ទឹក ភ្លើង ពិសេសផ្លូវដើម្បីងាយស្រួលក្នុងការធ្វើដំណើរ ពីព្រោះនៅរដូវវស្សាជួបការលំបាកខ្លាំងណាស់ទាំងអ្នកធ្វើដំណើរ និងសិស្សានុសិស្ស គ្រូបង្រៀនមកមិនទាន់ដោយសារផ្លូវធ្វើដំណើឆ្ងាយ៕