អភិបាលខេត្តកំពត ដាក់បទបញ្ជាដល់កងកម្លាំងឈរជើង នៅតាមបន្ទាត់ព្រំដែនកម្ពុជា-វៀតណាម ត្រូវទប់ស្កាត់ និងបង្ការការនាំចូលវីរុសកូវីដ-១៩ ចូលមកក្នុងប្រទេស
ខេត្តកំពត៖មានប្រសាសន៍ក្នុងកិច្ចប្រជុំជាបន្ទាន់មួយ នៅទីស្នាក់ការច្រកទ្វារអន្តរជាតិព្រែកចាក នៅថ្ងៃទ០៥ ខែកុម្ភៈ ឆ្នាំ២០២១ ដោយមានការចូលរួមពីលោកអភិបាលរងខេត្ត កងកម្លាំងទាំងបី អភិបាលស្រុក ប្រធានមន្ទីរ អង្គភាពពាក់ព័ន្ធ និងកងកម្លាំងឈរជើងតាមខ្សែបន្ទាត់ព្រំដែន ដើម្បីអនុវត្តឲ្យបានដាច់ខាតតាមបទបញ្ជាដ៏មុតស្រួចរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្នុងការទប់ស្កាត់ការនាំចូលវីរុសកូវីដ-១៩ ចូលក្នុងប្រទេសនោះឯកឧត្តម ជាវ តាយ អភិបាល នៃគណ:អភិបាលខេត្តកំពត បានដាក់បទបញ្ជាដល់សមត្ថកិច្ច និងអាជ្ញាធរឈរជើងនៅតាមបណ្តាច្រកទ្វារជាប់ព្រំដែនកម្ពុជា-វៀតណាមទាំងអស់ ត្រូវរឹតបណ្តឹង និងចាត់វិធានម៉ឺងម៉ាត់លើការទប់ស្កាត់ និងបង្ការការនាំចូលវីរុសកូវីដ-១៩ ចូលមកក្នុងប្រទេសកម្ពុជា។
សមត្ថកិច្ចមានវិធានការម៉ឺងម៉ាត់ និងទប់ស្កាត់ប្រជាពលរដ្ឋកម្ពុជាចេញទៅប្រទេសវៀតណាម និងចំពោះប្រជាពលរដ្ឋខ្មែរវិលត្រលប់មកវិញ ព្រមទាំងប្រជាជនវៀតណាមចូលមកកម្ពុជាត្រូវធ្វើចត្តាឡីស័កជាដាច់ខាត ដោយគ្មានការលើកលែងនោះឡើយ។
លើសពីនេះទៀត ឯកឧត្តម បានដាក់បញ្ជាឲ្យសមត្ថកិច្ចរឹតបន្តឹងហាមឃាត់មិនឲ្យមានការលួចចេញចូលតាមបណ្តាច្រករបៀងទាំងអស់ ជាពិសេសព្រំដែនទឹកក៏ត្រូវមានវិធានការម៉ឺងម៉ាត់ផងដែរ។
រីឯរាល់ទំនិញចេញចូលត្រូវដំណើរការធម្មតា ប៉ុន្តែត្រូវត្រួតពិនិត្យ ឲ្យត្រឹមត្រូវតាមការណែនាំរបស់ក្រសួងសុខាភិបាលផងដែរ៕
