ប្រជាពលរដ្ឋខ្មែរ ដែលវិលត្រឡប់ប្រទេសថៃ ចូលមកកម្ពុជា តាមច្រកអូរបីជាន់ ក្រុមគ្រូពេទ្យ មន្ត្រីជំនាញត្រួតពិនិត្យវាស់កំដៅ រួចបញ្ជូនទៅធ្វើចត្តាឡីស័ក គិតចាប់ពីថ្ងៃ២ ខែមេសា ឆ្នាំ២០២០ មកដល់ថ្ងៃទី២៤ ខែកុម្ភៈ ឆ្នាំ២០២១ មានចំនួនសរុប៧០៦១៩នាក់
ខេត្តបន្ទាយមានជ័យ៖ការវិលត្រឡប់ពីប្រទេសថៃ ចូលមកកម្ពុជាវិញ ពីសំណាក់ប្រជាពលរដ្ឋខ្មែរ តាមច្រកអូរបីជាន់ ស្ថិតនៅឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ គិតចាប់ពីវេលាម៉ោង៧ព្រឹកដល់ម៉ោង១១និង៣០នាទី ថ្ងៃទី២៥ ខែកុម្ភះ ឆ្នាំ២០២១ សរុបចំនួន១០៤នាក់។ដោយឡែកសម្រាប់តែក្នុងខេត្តបន្ទាយមានជ័យមានចំនួន២១នាក់ ស្រី៨នាក់។
បើតាមលោកអធិការរងស្រុកអូរជ្រៅ និងមន្ត្រីជំនាញ បានឲ្យដឹងថា គិតចាប់ពីថ្ងៃ២ ខែមេសា ឆ្នាំ២០២០ មកដល់ថ្ងៃទី២៤ ខែកុម្ភះ ឆ្នាំ២០២១ ប្រជាពលរដ្ឋខ្មែរចេញពីប្រទេសថៃមានចំនួនសរុប៧០៦១៩នាក់ ស្រី៣២០៥៥នាក់។ក្រោយពីត្រួតពិនិត្យវាស់កំដៅ រួចបញ្ជូនទៅធ្វើចត្តាឡីស័ករយះពេល១៤ថ្ងៃ នៅមណ្ឌលសំចតចំនួន៦កន្លែងក្នុងខេត្តបន្ទាយមានជ័យរួមមាន៖ក្រុងសិរីសោភ័ណ្ឌមានចំនួន៣កន្លែងនិងក្រុងប៉ោយប៉ែតចំនួន៣កន្លែង។
បើតាមលោក នង ធឿន អភិបាលរងស្រុកអូរជ្រៅបានឲ្យដឹងថា អង្គការដែលចូលរួមចំណែកជួយឧបត្ថម្ភជាគ្រឿងឧបភោគបរិភោគមានអង្គការIOM ជួយឧបត្ថម្ភដូចជា៖ក្នុងម្នាក់ៗទទួលបាន មីកំប៉ុង១ ,ទឹកសុទ្ធ ១ដប ,នំ១កញ្ចប់ ,ចាប់ពីថ្ងៃទី៦ ខែមេសា ឆ្នាំ២០២០ គ្រោងនឹងបញ្ចប់នៅថ្ងៃទី២៨ ខែកុម្ភះ ឆ្នាំ២០២១។ចំណែកអង្គការ សាម៉ារីតាន់ផើស បានជួយឧបត្ថម្ភចាប់ពីថ្ងៃទី៦ ខែមេសា ឆ្នាំ២០២០ ក្នុងម្នាក់ៗទទួលបាន នុំពងទា ១, សាប៊ូដុំ ១ដុំ និងទឹកសុទ្ធ១ដប ត្រូវបានបញ្ចប់នៅថ្ងៃទី១៩ ខែកុម្ភៈ ឆ្នាំ២០២១។ក្នុងនោះមន្ទីរសុខាភិបាលខេត្តក៏បានជួយជាបាយប្រអប់ និងទឹកបរិសុទ្ធ ១ដប ក្នុងមួយនាក់ផងដែរ។
មន្ត្រីជំនាញបញ្ជាក់ថា ពលរដ្ឋដែលចេញមកពីទឹកដីថៃរយះពេលកន្លងមកក៏ដូចជាពេលនេះសុទ្ធសឹងតែជួបបញ្ហាដោយសារដាច់ប៉ាស្ព័រ, អត់មានការងារធ្វើ និងមានធុរៈក្នុងគ្រួសារ។
ជាមួយគ្នានោះដែរមន្ត្រីជំនាញបានធ្វើការអំពាវនាវឲ្យប្រជាពលរដ្ឋខ្មែរទាំងអស់ ពិសេសអ្នកដែលចេញមកពីក្រៅប្រទេស ត្រូវចូលខ្លួនមកធ្វើចត្តាឡីស័ករយះពេល១៤ថ្ងៃឲ្យបានត្រឹមត្រូវតាមការណែនាំរបស់អាជ្ញាធរមានសមត្ថកិច្ច និងពិសេសត្រូវគោរពតាមវិធានការរបស់ក្រសួងសុខាភិបាលឲ្យបានខ្ជាប់ខ្ជួន ជៀសវាងការឆ្លងរីករាលដាលនៃជំងឺកូវី១៩ ក្នុងសហគម៕