ក្រសួងប្រកាសថា ក្រោយពីចាប់ឃាត់ជ្រូក៣០ក្បាល នៅខេត្តបន្ទាយមានជ័យកន្លងមកពិនិត្យ នៅវិទ្យាស្ថានជាតិស្រាវជ្រាវសុខភាពសត្វជ្រូក មានផ្ទុកជម្ងឺប៉េស្តជ្រូកអាហ្វ្រិក
ខេត្តបន្ទាយមានជ័យ:លោក ហ៊ុន សារ៉ាត់ ប្រធានក្រុមការងារត្រួតពិនិត្យ និងបង្ក្រាបបទល្មើសចលនាសត្វ បានប្រាប់អ្នកយកព័ត៍មានឲ្យដឹងថា សត្វជ្រូករស់សរុប៣០ក្បាលដោយដឹកតាមរថយន្ត១គ្រឿងលួចដឹក២០ក្បាល និងគោយន្ត ១គ្រឿងលួចដឹកចំនួន១០ក្បាល តាមច្រករបៀងកម្ពុជា ថៃ ត្រង់ចំណុចច្រកអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយគ្មានលិខិតអនុញ្ញាតអ្វីទាំងអស់ ដែលត្រូវអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ បានចាត់ក្រុមការងារ សហការជាមួយអាជ្ញាធរ ចុះឃាត់បាននៅព្រឹក ថ្ងៃទី៩ ខែកុម្ភៈ ឆ្នាំ២០២១ កន្លងមកនោះបន្ទាប់ពីយកសំណាកឈាមជ្រូកទៅពិនិត្យនៅវិទ្យាស្ថានជាតិស្រាវជ្រាវសុខភាពសត្វ និងផលិតកម្មសត្វ នៃអគ្គនាយកដ្ឋានសុខភាពសត្វ និងផលិតកម្ម សត្វ លទ្ធផលបានបញ្ជាក់ឲ្យដឹងថា ជ្រូកទាំង៣០ក្បាលនោះមានជម្ងឺប៉េស្តជ្រូកអាហ្វ្រិកទាំងអស់។
ករណីនេះ អគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ បានជម្រាបជូនដល់សាធារណជនថា ប្រសិនបើសាធារណជនបានដឹង ឬបានឃើញជាក់ស្តែង នូវការនាំចូលសត្វខុសច្បាប់ សូមជូនដំណឹងមកក្រុមការងារត្រួតពិនិត្យ និងបង្ក្រាបបទល្មើសចលនាសត្វឲ្យបានទាន់ពេលវេលា។
ជាងនេះទៅទៀតលោក ហ៊ុន សារ៉ាត់បានបញ្ជាក់ទៀតថា ក្រោយពីចាប់ឃាត់ជ្រូក៣០ក្បាលនៅខេត្តបន្ទាយមានជ័យកន្លងមកពិនិត្យទៅមានជម្ងឺប៉េស្តជ្រូកអាហ្វ្រិកក្រសួងបានចេញសេក្តីប្រកាសព័ត៍មានជាបន្ទាន់មួយដល់សមត្ថកិច្ចជាប់ពាក់ព័ន្ធត្រូវចុះត្រួតពិនិត្យនិងបង្រ្កាបបទល្មើសឈ្មួញ ណាដឹកសត្វជ្រូកខុសច្បាប់ឲ្យមានប្រសិទ្ធភាពខ្ពស់។
កសិករនិងពាណិជ្ជករជាអ្នកចិញ្ចឹមជ្រូកត្រូវមានវិធានការឲ្យបានម៉ើងម៉ាត់បោសសំអាតកន្លែងចិញ្ចឹមសត្វជាប្រចាំ ដើម្បីជៀសវាងការចម្លងជំងឺប៉េស្តជ្រូកអាហ្វ្រិកនិងជំងឺផ្សេងៗទៀត។គ្រប់សត្តឃាតដ្ឋានទូទាំងខេត្តត្រូវសហការជាមួយមន្ត្រីមានសមត្ថកិច្ចពិនិត្យសុខភាពសត្វ ឲ្យបានជាប្រចាំក្រុមហ៊ុនទិញជ្រូករស់ស្របច្បាប់ដែលចេញដោយក្រសួងកសិកម្មរុក្ខាប្រមាញ់ និងនេសាទបើកធ្វើសត្តឃាតសត្វត្រូវគោរពច្បាប់ឲ្យបានខ្ជាប់ខ្ជួននូវគោលការណ៍ណែនាំ និងវិធានការអនាម័យសត្វចំនួន១២ចំណុច ។
សម្រាប់អ្នកនាំចូលសត្វជ្រូករស់និងនាំឆ្លងកាត់ពីប្រទេសជិតខាងដែលតម្រូវឲ្យមានទីតាំងចត្តាឡីស័កពិនិត្យឲ្យបានត្រឹមត្រួវមុននិងនាំចេញនាំចូល ដើម្បីងាយស្រួលដល់មន្ត្រីបច្ចេកទេសពិនិត្យ ៕
