សាខាកាកបាទក្រហមកម្ពុជាខេត្តកណ្តាល នាំយកអំណោយចែកជូនប្រជាពលរដ្ឋក្រីក្រ និងចាស់ជរាគ្មានទីពឹង ចំនួន៣៩៨នាក់ មកពីសង្កាត់ចំនួន៦ ក្នុងក្រុងតាខ្មៅ
ខេត្តកណ្ដាល៖ឯកឧត្តម គង់ សោភ័ណ្ឌ ប្រធានគណៈកម្មាធិការសាខាកាកបាទក្រហមកម្ពុជាខេត្តកណ្ដាល និងជាអភិបាលខេត្ត ព្រមទាំងសហការរី មន្ត្រីរាជការ និងសប្បុរសជននានា នៅព្រឹកថ្ងៃទី៨ ខែវិច្ឆិកា ឆ្នាំ២០២១នេះ បានអញ្ជើញសំណេះសំណាល និងចែកអាវរងា ភួយនិងស្បៀងអាហារមួយចំនួន ដល់ពលរដ្ឋចាស់ចាស់ជរា និងមានជីវភាពខ្វះខាត ចំនួចំ៣៩៨នាក់ មកពីសង្កាត់ទាំង៦ ក្នុងក្រុងតាខ្មៅ។
នាឱកាសនោះដែរ ឯកឧត្តម គង់ សោភ័ណ្ឌ បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ដោយក្តីនឹករលឹកបំផុត និងបានថ្លែងនូវការកោតសរសើរ និងថ្លែងអំណរគុណ ចំពោះទឹកចិត្តដ៏សប្បុរសប្រកបដោយព្រហ្មវិហារធម៌ របស់សប្បុរសជនទាំងអស់ ដែលបានបរិច្ចាគធនធាន ពេលវេលា កម្លាំងកាយចិត្ត ចេញពីបេះដូងមនុស្សធម៌សុទ្ធសាធ ក្នុងការចូលរួមចំណែកជួយដល់ជនរងគ្រោះ និងជនងាយរងគ្រោះបំផុត នៅក្នុងខេត្តកណ្ដាល។ក្រៅពីនេះ ឯកឧត្តមក៏បានណែនាំឱ្យប្រជាពលរដ្ឋទាំងអស់បន្តថែទាំសុខភាពឲ្យបានល្អ ពិសេសត្រូវអនុវត្តតាមការណែនាំរបស់ក្រសួងសុខាភិបាល និងវិធានការរបស់ប្រមុខរាជរដ្ឋាភិបាល គឺ៣ការពារ និង៣កុំ ទោះបីជាប្រមុខរាជរដ្ឋាភិបាល បានសម្រេចឱ្យបើកប្រទេសឡើងវិញក៏ដោយ ។
អំណោយដែលត្រូវចែកជូនប្រជាពលរដ្ឋចាស់ជរាទាំង ៣៩៨នាក់ ដោយក្នុងម្នាក់ទទួលបាន៖ ភួយ១ អាវរងា១ មី ១កេស ត្រីខ ១យួរ ជែលលាងដៃ ១ដប សាប៊ូ ១ដុំ និងម៉ាស់ ១០បន្ទះផងដែរ៕
