ឯកឧត្ដម អ៊ូច ភា នាំយកបច្ច័យ និងគ្រឿងឧបភោគមួយចំនួន ចែកជូនគ្រួសារសពដែលគ្រោះថ្នាក់ចរាចរណ៍ស្លាប់៣នាក់និងរបួស២នាក់
ខេត្តតាកែវ:ឯកឧត្តម អ៊ូច ភា ប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ និងជាអភិបាលខេត្ត អមដំណើរដោយសមាជិកគណៈកម្មាធិការសាខា មន្រ្តីប្រតិបត្តិសាខា និងមន្រ្តីអនុសាខាកាកបាទក្រហមកម្ពុជាស្រុកកោះអណ្តែត ខេត្តតាកែវ កាលពីព្រឹកថ្ងៃទី ០៥ ខែធ្នូ ឆ្នាំ២០២១ បាននាំយកបច្ច័យ និងគ្រឿងឧបភោគ បរិភោគ ដែលជាអំណោយមនុស្សធម៌របស់កាកបាទក្រហកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ទៅចូលរួមរំលែកទុក្ខដ៏ក្រៀមក្រំជាមួយគ្រួសារសព ប្រជាពលរដ្ឋមានសមាជិកចំនួន៥នាក់ ក្នុងនោះស្លាប់០៣នាក់ របួសធ្ងរ០២នាក់ ដែលកំពុងសម្រាកព្យាលនៅមន្ទីរពេទ្យភ្នំពេញ ដោយឧបទ្ទវហេតុគ្រោះថ្នាក់ចរាចរណ៍ កាលថ្ងៃទី០៤ ខែធ្នូ ឆ្នាំ២០២១ នៅខេត្តព្រះសីហុន ដែលបានតម្កល់ធ្វើបុណ្យតាមប្រពៃណីនៅគេហដ្ឋាននៃសព ស្ថិតក្នុងភូមិព្រៃខ្លាជើង ឃុំព្រៃខ្លា ស្រុកកោះអណ្តែត ខេត្តតាកែវ។
នាឱកាសនោះដែរ ឯកឧត្តម អ៊ូច ភា ប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ បានពាំនាំមកនូវការចូលរួមសោកស្តាយ និងរំលែកទុក្ខដ៏ក្រៀមក្រំ ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជាមួយគ្រួសារសព ចំពោះការបាត់បមនុស្ស ជាទីស្រឡាញ់ និងសូមបួងសួងដល់វិញ្ញាណក្ខន្ធសពបានទៅកាន់សុគតិភពកុំបីឃ្លៀងឃ្លាតឡើយ។
ឯកឧត្តមបានបន្តថា ជានិច្ចកាលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា តែងតែគិតគូរខ្ពស់ពីសុខទុក្ខបងប្អូនប្រជាពលរដ្ឋ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយ មិនដែលទុកឱ្យប្រជាពលរដ្ឋណាម្នាក់ ស្លាប់ដោយអត់ស្បៀងអាហារ និងមិនមានការដោះស្រាយឡើយ។
ជាមួយនេះផងដែរ ឯកឧត្តមប្រធាន ក៏បានក្រើនរំលឹកសំណូមពរដល់បងប្អូនប្រជាពលរដ្ឋ ទាំងអស់ចូលរួមអនុវត្តនូវវិធានការសុខាភិបាលឱ្យបានខ្ជាប់ខ្ជួនដើម្បីការពារការឆ្លងជំងឺកូវីដ-១៩។
អំណោយដែលត្រូវចែកជូនរួមមាន៖ អង្ករ ១០០គីឡូក្រាម ទឹកបរិសុទ្ធវីតាល់ ៥កេស ទឹកក្រូច ៥កេស ថវិកា ចំនួន១លានរៀល ព្រមទាំងថវិកាផ្ទាល់របស់ ឯកឧត្តម អ៊ូច ភា និងលោកជំទាវ ២លានរៀល និងថវិកាមន្ទីរអង្គភាពជុំវិញខេត្ត មួយចំនួនធំ ព្រមទាំងថវិការបស់សប្បុរសជនមួយចំនួនទៀតផងដែរ៕