បើកម៉ូតូឆ្លងកាត់ផ្លូវមិនប្រយ័ត្ន ត្រូវរថយន្តបុក ស្លាប់ទាំង២នាក់ នៅស្រុកអូរជ្រៅ
បើកបរខ្វះការប្រុងប្រយ័ត្នបានធ្វើឲ្យបុរសវ័យចំណាស់ម្នាក់ និងស្ត្រីម្នាក់បានបាត់បង់ជីវិតនៅនឹងកន្លែងកើតហេតុ ក្នុងឧបទ្ទវហេតុថ្នាក់ចរាចរណ៍រវាងម៉ូតូនិងរថយន្ត កាលពីវេលាម៉ោង០៦និង១០នាទីយប់ ថ្ងៃទី ០៥ខែធ្នូ ឆ្នាំ២០២១ នៅលើកំណាត់ផ្លូវជាតិលេខ៥ ស្ថិតក្នុងភូមិខៃដន ឃុំកូប ស្រុកអូរជ្រៅ ខេត្តបន្ទាយមានជ័យ។
នគរបាលស្រុកអូរជ្រៅ បានឲ្យដឹងថា៖ ជនរងគ្រោះដែលស្លាប់មានឈ្មោះ សៀម យិង ភេទប្រុស អាយុ ៦០ឆ្នាំ អ្នកបើកបរម៉ូតូ និងឈ្មោះហឿន ហេង ភេទស្រីអាយុ៤០ឆ្នាំ អ្នករួមដំណើរ ត្រូវជាក្មួយ ។ជនរងគ្រោះទាំង០២នាក់នេះ រស់នៅចំណុចកើតហេតុខាងលើ។
នគរបាលបានបញ្ជាក់ថា៖នៅមុនពេលកើតហេតុ ជនរងគ្រោះបានជិៈម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ប.មានជ័យ 1.C 3218 ឌុបក្មួយស្រី ក្នុងទិសដៅ ពីជើងមកត្បូង កាត់ទ្រូងថ្នល់ជាតិលេខ៥ ហើយបត់ឆ្វេងមកទិសខាងកើតវិញ ស្របពេលនោះមានរថយន្តមួយគ្រឿងម៉ាកលុចស៊ីស GS 300ពាក់ស្លាកលេខ ប. មានជយ័ 2E. 9000 បើកបរក្នុងទិសដៅលិចទៅកើត មកដល់កន្លែងកើតហេតុ បានបុកម៉ូតូពេញទំហឹង បណ្តាលឲ្យអ្នកបើកម៉ូតូនិងអ្នករួមដំណើរស្លាប់ភ្លាមៗនៅនឹងកន្លែង ចំណែកម៉ូតូខូចខាតធ្ងន់។
ក្រោយពីកើតហេតុភ្លាម អ្នកបើកបររថយន្តបានរត់គេចខ្លួនបាត់ បន្សល់ទុកតែរថយន្តនៅកន្លែងកើហេតុ។
ក្រោយពីកើតហេតុមធ្យោបាយទាំងពី ត្រូវបាននគរបាលយកទៅរក្សាទុកនៅអធិការដ្ឋាននគរបាលស្រុកអូរជ្រៅ ដើម្បីស្រាវជ្រាវរកម្ចាស់រថយន្តមកដោះស្រាវតាមនិតិវិធី ។ចំពោះសពត្រូវបានប្រគល់ជូនក្រុមគ្រួសារ ចាត់ចែងធ្វើបុណ្យតាមប្រពៃណី ៕
