លោក បោន ប៊ិន អញ្ជើញជាអធិបតីក្នុងពិធីបោះឆ្នោតស្ទាបស្ទង់មតិផ្ទៃក្នុងគណបក្ស ជ្រើសរើសបេក្ខជនឈរឈ្មោះបោះឆ្នោតក្រុមប្រឹក្សាឃុំ អាណត្តិទី៥ (ឆ្នាំ២០២២-២០២៧)
ខេត្តបន្ទាយមានជ័យ:លោក បោន ប៊ិន ប្រធានក្រុមការងារគណបក្សចុះមូលដ្ឋានឃុំចំណោម ស្រុកមង្គលបូរី ខេត្តបន្ទាយមានជ័យ កាលពីថ្ងៃទី០៤ ខែធ្នូ ឆ្នាំ២០២១ បានអញ្ជើញជាអធិបតីក្នុងពិធីបោះឆ្នោតស្ទាបស្ទង់មតិផ្ទៃក្នុងគណបក្ស ជ្រើសរើសបេក្ខជនឈរឈ្មោះបោះឆ្នោតក្រុមប្រឹក្សាឃុំ អាណត្តិទី៥ (ឆ្នាំ២០២២-២០២៧)។
ពិធីនេះបានប្រព្រឹត្តទៅនៅទីស្នាក់ការគណបក្សប្រជាជនឃុំចំណោម ដោយមានការអញ្ជើញពីលោក សាំង សាវ៉ាត អនុប្រធានក្រុមការងារចុះមូលដ្ឋាន ឃុំចំណោម លោក ស៊ុន សម្បត្តិ អនុប្រធានក្រុមការងារចុះមូលដ្ឋានឃុំចំណោម និងប្រធាន-អនុប្រធានក្រុមការងារចុះមូលដ្ឋានភូមិទាំង១៨ផងដែរ។
លោក បោន ប៊ិន បានមានមតិសំណេះសំណាលជាមួយសមាជិក សមាជិកា អង្គបោះឆ្នោតចំនួន២០០នាក់នាឱកាសនោះថា ការបោះឆ្នោតស្ទាបស្ទង់មតិផ្ទៃក្នុងគណបក្សជ្រើសរើសបេក្ខជនឈរឈ្មោះនេះ គឺផ្ដោតលើលក្ខណ:សម្បត្តិ ដូចជាមានគោលជំហរស្មោះត្រង់ ម៉ឺងម៉ាត់ ហ្មត់ចត់ សុខភាពល្អ មានសមត្ថភាព ចំណេះដឹង មានពេលវេលាគ្រប់គ្រាន់ ក្នុងការបំពេញតួនាទី-ភារកិច្ច ជូនបក្ស និងប្រជាជននៅមូលដ្ឋានបានល្អប្រសើរ និងមានសីលធម៌ល្អ ប្រជាប្រិយភាព ទទួលបានពីបក្ស និងប្រជាជន ។
លោកប្រធានក្រុមការងារគណបក្សចុះមូលដ្ឋានឃុំចំណោម បានបន្តទៀតថា កិច្ចប្រជុំថ្ងៃនេះគឺមានគោលបំណងយកជ័យជំនះលើការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាពេលខាងមុខផងដែរ ៕