ឯកឧត្តម សុខ លូ ដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្តបាត់ដំបង ប្រចាំខែវិច្ឆិកា ឆ្នាំ២០២១
ខេត្តបាត់ដំបង៖ក្នុងកិច្ចប្រជុំប្រចាំខែវិច្ឆិកា ឆ្នាំ២០២១ របស់គណៈបញ្ជាការឯកភាពរដ្ឋបាលខេត្តបាត់ដំបង នៅព្រឹកថ្ងៃទី២២ ខែធ្នូ ឆ្នាំ២០២១ ដោយមានការអញ្ជើញចូលរួមដោយ អភិបាលរងខេត្ត លោកនាយករដ្ឋបាលសាលាខេត្ត កងកម្លាំងប្រដាប់អាវុធទាំង៣ប្រភេទ អភិបាល អភិបាលរងក្រុងស្រុកទាំង១៤ ព្រមទាំងប្រធាន អនុប្រធានមន្ទីរ អង្គភាពជុំវិញខេត្ត និងអ្នកពាក់ព័ន្ធមួយចំនួនទៀតនោះ ឯកឧត្តម សុខ លូ ប្រធានគណៈបញ្ជាការឯកភាព និងជាអភិបាល នៃគណៈអភិបាលខេត្ត បានមានប្រសាសន៍ណែនាំដល់ គណៈបញ្ជាការឯកភាពរដ្ឋបាលខេត្ត និងរដ្ឋបាលក្រុងស្រុក ឲ្យបន្តពង្រឹងការខិតខំប្រឹងប្រែងរបស់ខ្លួនបន្តទៀត ពិសេសពង្រឹងផ្នែកគោលនយោបាយភូមិ ឃុំមានសុវត្ថិភាព ផ្នែកចរាចរណ៍សាធារណៈ ឲ្យកាន់តែមានប្រសិទ្ធិភាពជាងមុន ក្នុងន័យពង្រឹងដល់សុវត្ថិភាពសាធារណៈជូនប្រជាពលរដ្ឋ កាត់បន្ថយអាត្រាគ្រោះថ្នាក់ចរាចរណ៍ និងអាត្រាការស្លាប់ដោយសារគ្រោះថ្នាក់ចរាចរណ៍ ។
ក្នុងនោះឯកឧត្តម បានបានលើកទឹកចិត្តដល់រដ្ឋបាលក្រុងស្រុក ទាំង១៤ រៀបចំវេទិការសាធារណៈទៅតាមលទ្ធភាពជាក់ស្ដែង ដែលខ្លួនអាចធ្វើទៅបាន មិនថាតូចក្ដី ធំក្ដី នៅតាមភូមិឃុំរបស់ខ្លួន ដើម្បីពង្រឹងការដោះស្រាយជូនប្រជាពលរដ្ឋតាមបែបក្រៅប្រព័ន្ធតុលាការ ។
ជាងនេះទៅទៀតឯកឧត្តម បានជម្រុញឲ្យមានការផ្សព្វផ្សាយដល់ប្រជាពលរដ្ឋ អំពីការមកទទួលចាក់វ៉ាក់សាំងកូវីដ-១៩ ដូសជំរុញ ឬដូសទី៣ ដោយកន្លងមកប្រជាពលរដ្ឋភាគមិនទាន់បានទទួលដំណឹងច្រើនអំពីការចាក់វ៉ាក់សាំងលើកទី៣នេះ ដូច្នេះត្រូវធ្វើការផ្សព្វផ្សាយជូនប្រជាពលរដ្ឋ គ្រប់ភូមិ ឃុំ សង្កាត់ ទាំងអស់ ក្នុងការប្រញាប់ប្រញាល់មកទទួលវ៉ាក់សាំងកូវីដ-១៩ ដូសជំរុញ ឬដូសទី៣ នៅតាមមណ្ឌលចាក់វ៉ាក់សាំងទៅតាមមណ្ឌលដែលរដ្ឋបាលក្រុង ស្រុកបានរៀបចំ ដើម្បីពង្រឹងភាពស៊ាំក្នុងខ្លួនខ្ពស់ ប្រឆាំងការរីករាលដាលជម្ងឺកូវីដ-១៩បម្លែង ជាពិសេសកូវីដ-១៩ អូមីក្រុង ដែលកំពុងតែរីករាលដាលយ៉ាងឆាប់រហ័សនៅបណ្ដាប្រទេសមួយចំនួនក្នុងពិភពលោក ៕
