ដីចំកាស្រល់ចំនួន៧ហិចតាគ្រប់គ្រងដោយក្រសួងកសិកម្មត្រូវបានអាជ្ញាធរចាប់ពីថ្នាក់ភូមិឃុំរហូតដល់ថ្នាក់ខេត្តឃុបឃិតគ្នាជាប្រប្រព័ន្ធលក់អោយឈ្មួញបានលុយរាប់សែនដុល្លា
(ខេត្តមណ្ឌលគិរី )៖ ដីចម្ការស្រល់របស់រដ្ឋទំហំជាង៧ហិកតា ដែលគ្រប់គ្រងដោយក្រសួងកសិកម្មមួយកន្លែង ស្ថិតក្នុងភូមិពូតាំង សង្កាត់រមនា ក្រុងសែនមនោរម្យ ត្រូវបានជនខិលខូចមួយក្រុមតូចឃុបឃិតគ្នាលក់យ៉ាងអនាធិបតេយ្យ ក្នុងតម្លៃរាប់សិបម៉ឺនដុល្លារ ហើយអ្នកនៅពីក្រោយខ្នងនៃការជួញដូរទ្រព្យសម្បត្តិរបស់រដ្ឋនេះ គឺជាអាជ្ញាធរមូលដ្ឋាន ដែលឈ្មួញមកពីភ្នំពេញជាអ្នកទិញ ។
ប្រភពសុំមិនបញ្ចេញឈ្មោះបានឲ្យដឹងថា លោក ភី ងូក ចៅសង្កាត់រមនា ក្រុងសែនមនោរម្យ បានឃុបឃិតជាមួយបក្ខពួករៀបចំជាប្រព័ន្ឋ ដោយមានការចាត់តាំងអ្នកឈរឈ្មោះចំនួនបីនាក់ជាម្ចាស់ដីកម្មសិទ្ឋ ដើម្បីស្នើសុំកាន់កាប់ដីដោយខុសច្បាប់ រួចធ្វើលិខិតផ្ទេរទិញលក់ឲ្យទៅឈ្មោះ វិច សុវាចា ក្នុងតម្លៃជិត១០ម៉ឺនដុល្លារ ដោយទទួលស្គាល់ត្រឹមអាជ្ញាធរភូមិ សង្កាត់ ក្រុង ខេត្ត ពោលគឺគ្មានការធ្វើអនុបយោគពីរដ្ឋ ឬកាត់ខ្វៀលចេញពីដីក្រសួងកសិកម្មឡើយ ។ ជាងនេះទៀតសោត ក្រោយគេស្នើសុំចុះបញ្ជីសម្គាល់ម្ចាស់កម្មសិទ្ឋិអចលនទ្រព្យ(ប្លង់រឹង) មន្ត្រីរដ្ឋបាលព្រៃឈើបានប្តឹងជំទាស់ ប៉ុន្តែសកម្មភាពបំពានយកដីនៅតែប្រព្រឹត្ត ដោយគ្មានជនណាម្នាក់ត្រូវឃាត់ខ្លួនទទួលខុសត្រូវចំពោះមុខច្បាប់ឡើយ ព្រោះបានតាស្រមូមធ្វើខ្នង ។
ប្រភពបន្តថា ក្រោយទទួលបានលិខិតផ្ទេរ
សិទ្ឋិកាន់កាប់ដីពីលោកចៅសង្កាត់ ភី ងូក រួចហើយនោះ អ្នកទិញដីចម្ការស្រល់ដោយខុសច្បាប់នេះ បានទំនាក់ទំនងមន្ត្រីក្នុងខេត្តចំណាយលុយជាងពីរសែនដុល្លារ ដើម្បីជួយសម្រួលដល់ដំណើរការកាត់ខ្វៀលដីចំណុចខាងលើចេញពីដីក្រសួងកសិកម្ម ។ ដែលដំណើរការនេះ បានចាប់ផ្តើមតាំងពីអំឡុងខែកញ្ញា ឆ្នាំ២០២១ រហូតបច្ចុប្បន្នមិនទាន់សម្រេចនៅឡើយ ។
សេចក្តីរាយការណ៏បានឲ្យដឹងថា កាលពីថ្ងៃទី១ ខែកញ្ញា ឆ្នាំ២០២១ មន្ត្រីជំនាញរដ្ឋបាលព្រៃឈើ បានចុះត្រួតពិនិត្យករណីរំលោភយកដីចម្ការស្រល់របស់រដ្ឋ ស្ថិតក្នុងភូមិពូតាំងសង្កាត់រមនា ក្រុងសែនមនោរម្យ បានរកឃើញសកម្មភាពរំលោភយកដីស្រល់រដ្ឋចំនួន៤ទីតាំង ។ ដែលការចូលទន្ទ្រានហ៊ុមព័ទ្ធយកដីរដ្ឋខាងលើនេះ ម្ចាស់ដីពីរកន្លែងសំអាងលើពាក្យស្នើសុំកាន់កាប់ និងប្រើប្រាស់ដីធ្លី ដែលទទួលស្គាល់ពីអាជ្ញាធរភូមិ សង្កាត់ ក្រុង ។ ចំណែកដីពីរកន្លែងទៀត ឃើញមានហ៊ុមព័ទ្ធរបង តែពុំឃើញមានម្ចាស់ចេញមុខទទួលខុសត្រូវព្រោះកំពុងរត់
ការ។
ក្នុងចំណោមដីទាំងបួនទីតាំងខាងលើនេះ មានដីមួយកន្លែងនៅចំណុចនិយាមកា(៧៣៨២៨០-១៣៧១៧២៣)គិតត្រឹមរសៀលថ្ងៃទី២៥ វិច្ឆិកា ២០២១ កំពុងមានសកម្មភាពសាងសង់សំណង់រឹងមាំជាច្រើន ដោយគេសំអាងថា មានលិខិតកាន់កាប់ពីអាជ្ញាធរត្រឹមត្រូវ ។ ប៉ុន្តែមន្ត្រីជំំនាញបានអះអាងថា ក្រសួងមិនទាន់មានចំណាត់ការកាត់ខ្វៀលដីទាំងនោះទៅបុគ្គលណាម្នាក់កាន់កាប់ជាកម្មសិទ្ឋិនោះទេ ពោលគឺ ទុកជាទ្រព្យសម្បត្តិរបស់រដ្ឋ ដែលត្រូវតែការពារជាដាច់ខាត ។
ប្រភពដដែលនេះបានបន្តថា ក្នុងលិខិតផ្ទេរសិទ្ឋិកាន់កាប់ដីធ្លី ដែលមានការទទួលស្គាល់តាំងពីថ្នាក់ភូមិរហូតដល់ថ្នាក់ខេត្ត គឺមានបុគ្គលបីនាក់ ជាអ្នកឈរឈ្មោះលក់ដូរដីរដ្ឋនេះទៅឲ្យអ្នករស់នៅភ្នំពេញម្នាក់ ។
បុគ្គលបីនាក់ដែលឈរឈ្មោះលក់ដីរដ្ឋទំហំជាង៧ហិកតាឲ្យទៅគេនោះមានឈ្មោះដូចខាងក្រោម៖
១-ឈ្មោះ ភៅ ណារ៉ា ភេទប្រុស អាយុ៣៥ឆ្នាំ ។
២-ឈ្មោះ ភី ច្រាញ ភេទប្រុស អាយុ៣៧ឆ្នាំ ។
៣-ឈ្មោះ ហាន សាមឿន ភេទប្រុស អាយុ៤១ឆ្នាំ ។ អ្នកទាំងបីជាជនជាតិព្នង រស់នៅភូមិពូតាំង សង្កាត់រមនា ក្រុងសែនមនោរម្យ ខេត្តមណ្ឌលគិរី ។ ទាំងបីនាក់នេះ ក្នុងម្នាក់ទទួលបានលុយតែប្រាំមួយលានរៀលប៉ុណ្ណោះ ។ ហើយអ្នករត់ការបានធ្វើលិខិតកាន់កាប់ និងប្រើប្រាស់ដីធ្លីបីប្លង់ផ្សេងគ្នាក្នុងថ្ងៃតែមួយ(ថ្ងៃ១៤ ខែធ្នូ ឆ្នាំ២០១៥) ដើម្បីផ្ទេរទៅឲ្យអ្នកទិញតែម្នាក់ ហើយអ្នកទិញនោះ បានធ្វើលិខិតកាន់កាប់ដីធ្លីថ្មីមួយទៀត ដោយបូកទាំងបីប្លង់ចូលគ្នាស្មើជាង៧ហិកតា នៅថ្ងៃទី១១ ខែឧសភា ឆ្នាំ២០១៨ គឺជារឿងពិត ។
ឆ្លើយតបករណីខាងលើ លោក ភី ងូក ចៅសង្កាត់រមនា ក្រុងសែនមនោរម្យបាននិយាយថា ចំពោះរឿងដីនេះ ម្ចាស់គេបានអាស្រ័យផលជាយូរមកហើយ គឺមុនក្រុមហ៊ុនដាំដើមស្រល់ទៅទៀត ហើយគេមានប្លង់ត្រឹមត្រូវ ។ ចំណែកសំណង់ដែលកំពុងសាងសង់នោះ គេបានសុំទៅក្រុង ឬទៅខេត្តអស់ហើយ ក្រៅពីនេះលោកមិនដឹងទេ ព្រោះគ្រប់ទឹកហើយ ។
ចំណែកលោកប្រធានមន្ទីរកសិកម្មខេត្តមណ្ឌលគិរី ក្រោយទទួលព័ត៌មានខាងលើនេះ លោកបានបញ្ជាក់ថា នឹងចាត់លោកនាយខណ្ឌរដ្ឋបាលព្រៃឈើមណ្ឌលគិរី ចុះទៅទីតាំងនោះដើម្បីពិនិត្យជាក់ស្តែង និងចាត់ការ ។
ទោះជាយ៉ាងក្តី គិតត្រឹមព្រឹកថ្ងៃទី១ ខែធ្នូឆ្នាំ២០២១នេះគេមិនទាន់ឃើញមន្ត្រីជំនាញណាចុះទៅពិនិត្យឡើយ៕