នគរបាលស្រុកស្វាយចេក ឃាត់ខ្លួនជនសង្ស័យ២នាក់ ពាក់ព័ន្ធករណីគ្រឿងញៀន
ខេត្តបន្ទាយមានជ័យ៖បុរសម្នាក់ត្រូវបានកម្លាំងនគរបាលស្រុកស្វាយចេក ចាប់ឃាត់ខ្លួនបន្ទាប់ពីទទួលបាននូវសេចក្តីរាយការណ៍ពីប្រជាពលរដ្ឋ នៅភូមិចំការគ ឃុំស្វាយចេក ស្រុកស្វាយចេក កាលពីវេលាម៉ោង២០និង៣០នាទីថ្ងៃទី១៧ ខែ១២ ឆ្នាំ២០២១ ថាមានឈ្មោះ ហែម សុផន ភេទប្រុស អាយុ៣១ឆ្នាំ រស់នៅភូមិ/ឃុំខាងលើ បានរកវាយគេតាមផ្លូវ។
សមត្ថកិច្ចបានឲ្យដឹងថា ក្រោយពីឃាត់ខ្លួនជនសង្ស័យខាងលើ យកទៅសាកសួរនៅអធិការដ្ឋាននគរបាលស្រុកស្វាយចេកសមត្ថកិច្ចបានធ្វើតេស្តិ៍រកសារធាតុញៀន លទ្ធផលវិជ្ជមាន បានរកឃើញមានម្សៅក្រាមពណ៍សរថ្លា ០១កូនថង់ នៅក្នុងហោប៉ៅខោខៅប៉ោយផ្នែកខាងស្ដាំខាងមុខ។នៅពេលសមត្ថកិច្ចធ្វើការសាកសួរជនសង្ស័យ បានឆ្លើយសារភាពថា ខ្លួនបានទិញថ្នាំញៀនពីឈ្មោះ ជិន ប្រុស ភេទប្រុស អាយុប្រហែល ៣៥ ឆ្នាំនៅភូមិ/ឃុំជាមួយគ្នា ធ្លាប់ទិញបានចំនួន១៥លើកក្នុង១លើកៗ តំលៃពីរម៉ឺនរៀល។
ដោយយោងតាមចម្លើយសារភាពរបស់ជនសង្ស័យខាងលើ និងដោយអនុវត្តតាមបញ្ជារបស់លោកវរសេនីយ៍ឯក ធិន ស៊ិនដេត ស្នងការរងខេត្ត ទទួលផែនប្រឆាំងបទល្មើសគ្រឿងញៀន និងដោយមានការសម្របសម្រួលព្រះរាជអាជ្ញាសាលាដំបូងខេត្តផងនោះ នៅព្រឹកថ្ងៃ១៨ ខែធ្នូ ឆ្នាំ២០២១ កម្លាំងជំនាញបានកសាងសុំណុំរឿងបញ្ជូនខ្លួនឈ្មោះ ជិន ប្រុស និងវត្ថុតាងម្សៅក្រាម ចំនួន៣៨ កូនកំណត់កិបទុយោបឺត ទៅតុលាការខេត្ត ដើម្បីបន្តនីតិវិធី៕
