ក្រៅពីការងារស្នូលអង្គភាព វរសេនាតូចថ្មើជើងលេខ៥១៤ បានបង្កបង្កើនផល និងចិញ្ចឹមសត្វ ដើម្បីជួយទ្រទ្រង់ជីវភាពកងទ័ព និងគ្រួសារកងទ័ព
ខេត្តបន្ទាយមានជ័យ៖វរសេនាតូចថ្មើរជើងលេខ៥១៤ ក្រៅពីការងារហ្វឹកហ្វឺនរៀនសូត្រ និងអនុវត្តន៍ភារកិច្ចស្នូល អង្គភាពបានបន្តការបង្កបង្កើនផល និងចិញ្ចឹមសត្វ ដើម្បីជួយធានាការរស់នៅរបស់កងទ័ព និងគ្រួសារកងទ័ពដែលមានជីវភាពខ្វះខាត ពិសេសចូលរួមអនុវត្តន៍តាមផែនការយុទ្ធសាស្រ្តលើកស្ទួយវិស័យកសិកម្មក្នុងស្រុក របស់រាជរដ្ឋាភិបាលកម្ពុជា។
ដោយមានការយកចិត្តទុកដាក់ និងណែនាំ លោកវរសេនីយ៍ទោ ប៉ែន សុគន្ធ មេបញ្ជាការវរសេនាតូចថ្មើជើងលេខ៥១៤ បានបង្កបង្កើនផលនូវបន្លែចម្រុះ និងការចិញ្ចឹមសត្វ ត្រីកង្កែប មាន់ ទា ក្ងាន ជ្រូក និងគោ តាមផែនការរបស់ថ្នាក់លើដាក់ឱ្យ។
គួរកត់សំគាល់ថា ក្នុងឆ្នាំ២០២១នេះ ដោយកងកម្លាំងរបស់ វរសេនាតូចថ្មើរជើងលេខ៥១៤ ចេញប្រតិបត្តិការតាមបន្ទាត់ព្រំដែនកម្ពុជា-ថៃ កងកម្លាំងត្រៀមអន្តរាគមន៍នៅក្នុងទីតាំង គ្រប់អង្គភាព បានខិតខំការងារបង្កបង្កើនផល និងចញ្ចឹមសត្វ បញ្ជូនបន្លែគ្រប់មុខ និងត្រីសាច់ មួយចំនួនបន្ថែមដល់កម្លាំងជួរមុខ ធានាបានហូបប្រចាំថ្ងៃគ្រប់គ្រាន់ សុវត្ថិភាព និងសុខភាពល្អដល់កងកម្លាំង៕