ពិធីប្រគល់ពានរង្វាន់ជ័យលាភី អក្សរសិល្ប៍ទន្លេមេគង្គលើកទី១១ ដល់បេក្ខនារីពីររូប
ខេត្តកំពង់ចាម៖ក្នុងពិធីប្រគល់ពានរង្វាន់ជ័យលាភី អក្សរសិល្ប៍ទន្លេមេគង្គ លើកទី១១ ដល់បេក្ខនារីពីររូប នៅមន្ទីរសុខាភិបាលនៃរដ្ឋបាលខេត្តកំពង់ចាម នាព្រឹកថ្ងៃទី១៥ ខែធ្នូ ឆ្នាំ ២០២១ ឯកឧត្តម អ៊ុន ចាន់ដា អភិបាលខេត្តកំពង់ចាម បានមានប្រសាសន៍ថា ការរៀបចំឲ្យមានការប្រឡងអក្សរសិល្ប៍ទន្លេមេគង្គនេះ គឺពិតជាមានអត្ថន័យសំខាន់ណាស់ ពោល មិនត្រឹមតែការប្រគល់ពានរង្វាន់លើកទឹកចិត្តដល់បុគ្គល ឬបញ្ញវន្ត នៃបណ្ដាប្រទេស រស់នៅជាប់ដងទន្លេមេគង្គនោះទេ សំខាន់បំផុតគឺការរឹតចំណងសាមគ្គីភាព កិច្ចសហប្រតិបត្តិការល្អ តាមបណ្ដាប្រទេស ដែលជាប់ដងទន្លេមេគង្គ។
លោក ព្រឿង ប្រណិត ប្រធានសមាគមអ្នកនិពន្ធខ្មែរ បានថ្លែងថា យើងគ្រប់គ្នាបានជ្រាបច្បាស់ហើយថា ការបង្កើតស្នាដៃអក្សរសិល្ប៍មួយ ប្រកបដោយការច្នៃប្រឌិត គឺទាមទារឱ្យអ្នកសរសេរមានកម្រិតយល់ដឹងមូលដ្ឋានយ៉ាងច្បាស់លាស់ ការយល់ច្បាស់អំពីបរិបទសង្គមមួយលើគ្រប់ផ្នែក ពិសេស វប្បធម៌ អរិយធម៌ និងជីវភាពពិតរបស់មនុស្សក្នុងតំបន់ទើបស្នាដៃមានភាពប្រាកដនិយម។
ម្យ៉ាងទៀត យើងតែងតែទទួលស្គាល់ថា អក្សរសិល្ប៍ដែលមាននិរន្តរភាព និងតម្លៃ គឺជាប្រភេទស្នាដៃ ដែលបានបង្ហាញ និងប្រៀបធៀបតិចឬច្រើននូវព្រឹត្តិការសង្គម ជីវិតពិតក្នុងសង្គមនោះ។
សូមបញ្ជាក់ដែរថា បេក្ខនារី ដែលទទួលបានជ័យលាភីមានពីររូប ទី១ ឈ្មោះ ឡុង លាភសុជាតា រស់នៅខេត្តកំពង់ចាម និងទី២ ឈ្មោះ លឹម ផាន់ណា មកពីភ្នំពេញ៕
