អង្គការទស្សនៈពិភពលោក ប្រចាំខេត្តបន្ទាយមានជ័យ និងខេត្តបាត់ដំបង ជួបសម្តែងការគួរសម ជាមួយឯកឧត្តម អ៊ុំ រាត្រី
ខេត្តបន្ទាយមានជ័យ៖ដើម្បីពង្រឹងទំនាក់ទំនង និងសហការជាមួយរដ្ឋបាលខេត្ត និងមន្ទីរពាក់ព័ន្ធតាមស្រុកគោលដៅនោះ នៅព្រឹកថ្ងៃទី១៥ ខែធ្នូ ឆ្នាំ២០២១ អង្គការទស្សនៈពិភពលោកប្រចាំខេត្តបន្ទាយមានជ័យ និងខេត្តបាត់ដំបង បានជួបសម្តែងការគួរសម និងសំណេះសំណាលជាមួយឯកឧត្តម អ៊ុំ រាត្រី អភិបាលខេត្ត និងថ្នាក់ដឹកនាំក្រុង ស្រុក និងមន្ទីរពាក់ព័ន្ធ នៅសាលាខេត្តបន្ទាយមានជ័យ។
លោកស្រី ងួន សោភ័ណ្ឌ ដែលជាប្រធានតំបន់ខេត្តបន្ទាយមានជ័យ បាត់ដំបង និងក្រុមមន្ត្រី ធ្វើការលើកឡើងពីទស្សនវិស័យនៃអង្គការទស្សនៈពិភពលោកគឺចង់ឃើញកុមារគ្រប់រូបមានជីវិតពេញលេញ បរិបូរណ៍ ទំនុកបម្រុងកុមារងាយរងគ្រោះជួយជនក្រីក្រ និងជនដែលត្រូវគេសង្កត់សង្កិនក្រុមសហគមន៍ក្រីក្រ រស់ក្រោមបន្ទាត់ភាពក្រីក្រក្រុមចំណាកស្រុកក្រុមដែលទទួលរង ផលប៉ះពាល់ពីហិង្សានៅក្នុងគ្រួសារ។
លោកស្រី ងួន សោភ័ណ្ឌ បានលើកឡើងទៀតថា ប្រទេសសំខាន់ៗ ដែលបានផ្ដល់ថវិកាតាមរយៈអង្គការទស្សនៈពិភពលោករួមមានៈប្រទេសជប៉ុន ហុងកុង សហគមន៍អឺរ៉ុប និងសហរដ្ឋអាមេរិក។គម្រោងរួមមាន ធ្វើឲ្យប្រសើរឡើងនៃសេវាសាធារណៈគោលបំណងដើម្បី ការរួមចំណែកជាមួយរាជរដ្ឋាភិបាលធ្វើឲ្យប្រសើរឡើងក្នុងការផ្តល់សេវាសាធារណៈ ប្រកបដោយគុណភាព ប្រសិទ្ធភាព តាមរយៈការលើកកម្ពស់ តម្លាភាពការចូលរួម របស់ប្រជាពលរដ្ឋនិងតម្រូវការនានារបស់ប្រជាពលរដ្ឋ ។
ដោយឡែកសម្រាប់តំបន់គោលដៅនៅក្នុងខេត្តបន្ទាយមានជ័យ ឧបត្ថម្ភដោយធនាគារពិភពលោក និងអង្គការទស្សនៈពិភពលោកមាន៤ ស្រុកគឺស្រុកមង្គលបុរី ស្រុកស្វាយចេក ស្រុកថ្មពួក និងស្រុកភ្នំស្រុក រួមមានៈចំនួន៣៣ឃុំ និង៣៣ មណ្ឌលសាលាបឋមសិក្សា១៣២សាលា។
ជាមួយគ្នានោះដែរឯកឧត្តម អ៊ុំ រាត្រី បានមានប្រសាសន៍កោតសរសើរនិងថ្លែងអគុណចំពោះ ប្រទេសម្ចាស់ជំនួយអង្គការទស្សនៈពិភពលោក ដែលរយៈកាលកន្លងមកតែងតែចុះជួយដល់កុមារកំព្រា គ្មានទីពឹងប្រជាពលរដ្ឋទីទ័លក្រ ចាស់ជរា ប្រជាពលរដ្ឋទទួលរងគ្រោះធម្មជាតិផ្សេងៗ។
ឯកឧត្តម បានបន្តថា ក្នុងនាមរដ្ឋបាលខេត្តនៅតែបន្តគាំទ្រសហការជាមួយអង្គការទស្សនៈពិភពលោក អង្គការជួយដល់កុមារងាយរងគ្រោះក្នុងសហគមន៍និងប្រជាពលរដ្ឋក្រីក្រនិងងាយរងគ្រោះ៕
