ពិធីបុណ្យបញ្ចុះបឋមសិលាមហាកុដិ និងរាប់បាត្រព្រះសង្ឃចំនួន១០៩អង្គ នៅវត្ត"រតនារាម ហៅវត្តផ្សារកណ្តាល" ក្រុងប៉ោយប៉ែត
ខេត្តបន្ទាយមានជ័យ៖នាព្រឹកថ្ងៃទី១២ ខែធ្នូ ឆ្នាំ២០២១ ព្រះសិរីរក្ខិតវង្ស តែម ម៉ាច ព្រះរាជាគណៈថ្នាក់កិត្តិយស និងជាទីប្រឹក្សាសម្តេចព្រះមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចសង្ឃរាជគណៈមហានិយាកាយ នៃព្រះរាជាណាចក្រកម្ពុជា និងជាព្រះគ្រូចៅអធិការវត្តរតនារាម ហៅវត្តផ្សារកណ្តាល ព្រមទាំងព្រះសង្ឃ អាចារ្យ គណៈកម្មធិការ តាជី យាយជី នៅក្នុងវត្តបានធ្វើពិធីបុណ្យបញ្ចុះបឋមសិលាមហាកុដិ និងរាប់បាត្រព្រះសង្ឃចំនួន១០៩អង្គ។
ពិធីនេះបានប្រព្រឹត្តទៅក្រោមវត្តមានលោក ង៉ោ ម៉េងជ្រូន អភិបាលរងខេត្ត លោក គាត ហ៊ុល អភិបាល នៃគណៈអភិបាលក្រុង លោក លោកស្រី សមាជិកក្រុមប្រឹក្សាក្រុង/សង្កាត់ លោកចៅសង្កាត់ និងមន្ត្រីសង្ឃ និងលោកយាយ លោកតា ជាច្រើននាក់ផងដែរ។
នាឱកាសនោះ ព្រះសិរីរក្ខិតវង្ស តែម ម៉ាច ព្រះគ្រូចៅអធិការវត្តរតនារាម ហៅវត្តផ្សារកណ្តាល បានមានសង្ឃដិការថា ព្រះអង្គចូលកាន់ដំណែងជាព្រះគ្រូចៅអធិការវត្តនេះ គិតមកដល់ពេលនេះ បានជាងមួយឆ្នាំហើយ ដោយនៅក្នុងវត្តបច្ចុប្បន្នមានព្រះសង្ឃជាង៦០អង្គ ហើយនៅពេលខាងមុខនេះនឹងមានច្រើនអង្គទៀត ដូច្នេះតម្រូវការវត្តត្រូវការកុដិជាចាំបាច់ក្នុងការសិក្សារៀនសូត្ររបស់ព្រះសង្ឃ ដើម្បីលើកស្ទួយលើវិស័យព្រះពុទ្ធសាសនា ដែលជាសាសនារបស់រដ្ឋ ឲ្យមានការរីកចំរើនបន្លែមទៀត ពីព្រោះបច្ចុប្បន្នវិស័យព្រះពុទ្ធសាសានាកំពុងចូលរួមចំណែកយ៉ាងសកម្មទាំងផ្នែកការងារមនុស្សធម៌ និងលើកកម្ពស់សីលធម៌ ចរិយាធម៌ ដល់កុលបុត្រកុលធីតា ជំនាន់ក្រោយឲ្យចេះសាងអំពើល្អ តាមគន្លងប្រពៃណី ព្រះពុទ្ធសាសនា ក្នុងគោលបំណងកាត់បន្ថយការខុសឆ្គងក្នុងច្បាប់រដ្ឋ និងប្រពៃណីជាតិយើង។
ព្រះគ្រូចៅអធិការវត្តមានសង្ឃដិការទៀតថា ក្រោយពីមានការស្រុះស្រួលមូលមតិគ្នាជាឯកច្ឆនក្នុងការសាងសង់៩ចំណុចសំខាន់ៗបន្តទៀតដូចជាៈកសាងពុទ្ធិកបឋមសិក្សា(សាលាបាលី) ,របងក្បាច់កងចក្រព័ទ្ធជុំវិញវត្ត ,ស្រះមុជ្ជលិន ,ទីបច្ឆា(បូជាសព) ,ចាក់ផ្លូវបេតុង,មហាកុដិ ,ចាក់ដីក្នុងវត្ត ,កសាងក្លោងទ្វាទាំងបួនទិស និងកសាងព្រះពុទ្ធរូបទាំង៥អង្គ ដែលកំពុងសាងសង់បណ្តើរៗ ដោយមានការខ្វះខាតនោះ ព្រះអង្គបានអំពាវនាវដល់ឯកឧត្តម លោកជំទាវ លោក លោកស្រី ជាពុទ្ធបរិស័ទទាំងក្នុង និងក្រៅប្រទេសចូលរូមចាប់មគ្គផលតម្កល់ទុកក្នុងព្រះពុទ្ធសាសនា ទៅតាមកម្លាំងសទ្ធាជ្រះថ្លារៀងៗខ្លួនផងដែរ៕
