លោក ឧត្តមសេនីយ៍ត្រី រ៉ែម វីរៈ ដឹកនាំក្រុមការងារ បន្តចុះពិនិត្យកម្លាំងអធិការដ្ឋាននគរបាល ក្រុងប៉ោយប៉េត និងវរសេនាតូចការពារព្រំដែនគោកលេខ៩១១
ខេត្តបន្ទាយមានជ័យ៖លោកឧត្តមសេនីយ៍ត្រី រ៉ែម វីរៈ ស្នងការរង ទទួលផែនការងារសេនាធិការ តំណាងលោកឧត្តមសេនីយ៍ទោ សិទ្ធិ ឡោះ ស្នងការ នៃស្នងការដ្ឋាននគរបាលខេត្តបន្ទាយមានជ័យ កាលពីថ្ងៃទី០៩ ខែធ្នូ ឆ្នាំ២០២១ បានដឹកនាំក្រុមការងារបន្តចុះត្រួតពិនិត្យក្របខ័ណ្ឌមន្ត្រីនគរបាលនៃ អធិការដ្ឋាននរបាលក្រុងប៉ោយប៉ែត និងមន្ត្រីនគរបាលនៃវរសេនាតូចនគរបាលការពារព្រំដែនគោកលេខ៩១១។
នាឱកកាសនោះលោកឧត្តមសេនីយ៍ត្រី រ៉ែម វីរៈ បានជម្រុញដល់មន្ត្រីនគរបាល នៃអធិការដ្ឋាននរបាលក្រុងប៉ោយប៉ែត និងមន្ត្រីនគរបាល នៃវរសេនាតូចការពារព្រំដែនគោកលេខ៩១១ ត្រូវយកចិត្តទុកដាក់បំពេញភារកិច្ចរបស់ខ្លួន ជាអ្នកបំរើឲ្យវិស័យសន្តិសុខជាតិ សំដៅលើកកម្ពស់ ការរស់នៅដោយភាពសុខសាន្តរបស់ប្រជាពលរដ្ឋ នៅក្នុងភូមិសាស្ត្រដែលខ្លួនទទួលខុសត្រូវ ដោយគ្មានក្តីបារម្ភពីបញ្ហាសន្តិសុខ។
លោកឧត្តមសេនីយ៍ត្រី បន្តថា៖ ដើម្បីរកឲ្យឃើញពីភាពអសកម្មរបស់មន្ត្រីនគរបាល មួយចំនួន លោកឧត្តមសេនីយ៍ទោ សិទ្ធិ ឡោះ ស្នងការ នគរបាលខេត្ត បានបង្កើតក្រុមការងារចុះត្រួតពិនិត្យកម្លាំងមន្ត្រីនគរបាលក្នុងអង្គភាពអធិការដ្ឋាននគរបាល ក្រុង ស្រុក ទាំង០៩ និងរវសេនាតូចការពារព្រំដែនគោកទាំង០៤ ។នៅក្នុងនោះលោកឧត្តមសេនីយ៍ត្រី ក៏បានណែនាំដល់នគរបាលប៉ុស្តិ៍រដ្ឋបាល ឃុំ សង្កាត់ ត្រូវអនុវត្តឲ្យបាននូវភារកិច្ចរបស់នគរបាលប៉ុស្តិ៍រដ្ឋបាលទាំង១៣ចំណុច និងបន្តផ្សព្វផ្សាយពីលក្ខណសម្បត្តិ ភូមិ ឃុំ សង្កាត់ មានសុវត្ថិភាព ទាំង០៧ចំណុចឲ្យបានទូលំទូលាយដល់ប្រជាពលរដ្ឋ ឲ្យចូលរួមសហការជាមួយអាជ្ញាធរ និងសមត្ថកិច្ចសំដៅលើកកម្ពស់សន្តិសុខ សណ្តាប់ធ្នាប់ សុវត្ថិភាពសង្គម ក្នុងមូលដ្ឋាន និងបំរើសេវាសាធារណៈជូនប្រជាពលរដ្ឋបានទាន់ពេលវេលា នៅយាមប្រចាំការនៅប៉ុស្តិ៍ជាប្រចាំ ពោលគឺដើម្បីឆ្លើយតបរាល់សំណូមពរនិងការពឹងពាក់របស់ប្រជាពលរដ្ឋ។
ជាមួយគ្នានោះដែរ កម្លាំងនគរបាលវរសេនាតូចការពារព្រំដែន ក៏ត្រូវពង្រឹងភារកិច្ចរបស់ខ្លួន ការពារបូរណភាពទឹកដី ការពារសន្តិសុខ សណ្តាប់ធ្នាប់ សុវត្ថិភាព តាមបន្ទាត់ព្រំដែន ទប់ស្កាត់រាល់បទល្មើសឆ្លងដែនដោយខុសច្បាប់ ទំនិញគេចពន្ធ ទំនិញខូចគុណភាព ក៏ដូចជាប្រជាពលរដ្ឋឆ្លងដែនទៅប្រទេសថៃឲ្យបានម៉ឺងម៉ាត់ផងដែរ៕