រដ្ឋបាលខេត្តបន្ទាយមានជ័យ ប្រារព្ធពិធីអបអរសាទរខួបអនុស្សាវរីយ៍លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា
ខេត្តបន្ទាយមានជ័យ៖នៅព្រឹកថ្ងៃទី០៩ ខែវិច្ឆិកា ឆ្នាំ២០២១នេះ នៅសាលាខេត្តបន្ទាយមានជ័យ មានរៀបចំប្រារព្ធពិធីអបអរសាទរខួបអនុស្សាវរីយ៍លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា(៩ វិច្ឆិកា ១៩៥៣-៩ វិច្ឆិកា ២០២១) ដោយមានការអញ្ជើញចូលរួមពីក្រុមប្រឹក្សាខេត្ត/ក្រុង គណៈអភិបាលខេត្ត/ក្រុង មន្ត្រីរាជការ កងកម្លាំងប្រដាប់អាវុធ មន្ទីរគ្រប់អង្គភាពជុំវិញខេត្ត ព្រះសង្ឃ លោកគ្រូ អ្នកគ្រូ និងនិស្សិត បញ្ញវន្តយ៉ាងច្រើនកុះករផងដែរ។
នាឱកាសនោះដែរថ្នាក់ដឹកនាំខេត្ត ក្រុង កងកម្លាំងប្រដាប់អាវុធ មន្ទីរគ្រប់ស្ថាប័នបានអញ្ជើញគោរពព្រះវិញ្ញាណក្ខន្ធព្រះបរមរតនកោដ្ឋ នរោត្តម សីហនុ ដើម្បីរលឹកនឹកដល់គុណូបការៈ និងវីរភាពដ៏ធំធេងរបស់សម្តេចព្រះបរមរតនកោដ្ឋ ដែលបានយាងបំពេញព្រះរាជបូជនីយកិច្ច និងបូជាអស់កម្លាំងព្រះកាយពល បញ្ញាញាណ ក្នុងការដណ្តើមឯករាជ្យពីប្រទេសបារាំង។
ជាមួយគ្នានោះដែរឯកឧត្តម អ៊ុំ រាត្រី អភិបាលខេត្ត បានលើឡើងពីប្រវត្តិព្រះរាជបូជនីយកិច្ច ទាមទារឯករាជ្យនៅថ្ងៃទី០៩ ខែវិច្ឆិកា ឆ្នាំ១៩៥៣ របស់ព្រះបាទសម្ដេចព្រះនរោត្ដមសីហនុ ព្រះមហាវីរក្សត្រ ព្រះរាជបិតាឯករាជ្យជាតិបូរណភាពទឹកដី និងឯកភាពជាតិខ្មែរព្រះបរមរតនកោដ្ឋ ជាទីសក្ការៈដ៏ខ្ពង់ខ្ពស់បំផុត ក្នុងការទាមទារឯករាជ្យ ពីសាធារណរដ្ឋបារាំង យ៉ាងលំបាកជូនដល់ប្រជារាស្រ្តនិងមាតុភូមិកម្ពុជា រហូតធ្វើឲ្យពិភពលោកទទួលស្គាល់ និងប្រសិទ្ធនាមព្រះរាជាណាចក្រកម្ពុជា ថាកោះសន្តិភាពនៅអាស៊ីអាគ្នេយ៍។
បច្ចុប្បន្នដោយមានគោលនយោបាយរបស់រាជរដ្ឋាភិបាល ដែលមានសម្តេចតេជោ ជាប្រមុខនិងក្រោមម្លប់ដ៏ត្រជាក់នៃព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា និងអង្គសម្តេចម៉ែ សម្តេចយាយ នរោត្តមមុនិនាថសីហនុ ព្រះមហាក្សត្រី ព្រះវរវាជមាតាជាតិខ្មែរក្នុងសេរីភាព សេចក្តីថ្លៃថ្នូរ និងសុភមង្គលជាទីសការៈដ៏ខ្ពង់ខ្ពស់ ទឹកដីជាទីស្នេហានៃយើងដែលកំពុងធ្វើការអភិវឌ្ឍន៍លើគ្រប់វិស័យ យើងត្រូវបានការពារនូវអធិបតេយ្យភាព បូរណភាពទឹកដីដ៏រឹងមាំ និងលើឆាកអន្តរជាតិ កម្ពុជាមានកិត្តិយសស្មើមុខស្មើមាត់ជាមួយបណ្តាលប្រទេសនានា និងមានកិត្តិនាមល្បីរន្ទឺពេញសកលលោក ទាំងនេះគឺផ្តើមចេញពីពិធីរំលឹកខួបលើកទី៦៨ នៃទិវាបុណ្យឯករាជ្យជាតិនេះ ក្នុងនាមថ្នាក់ដឹកនាំខេត្ត កងកម្លាំងប្រដាប់អាវុធ មន្ទីរគ្រប់ស្ថាប័ន សូមគាំទ្រយ៉ាងមុតចំពោះការប្ដេជ្ញាចិត្តរបស់រាជរដ្ឋាភិបាលក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្ដេចតេជោ ដែលបានរំដោះ ដោយប្រើយុទ្ធសាស្ត្រ សកម្មភាពអាណត្តិទី៦ ក្នុងការអនុវត្តយុទ្ធសាស្ត្រចតុកោណដំណាក់កាលទី១ របស់រាជរដ្ឋាភិបាល ដែលមានទិសដៅសំខាន់ៗជាយុទ្ធសាស្ត្រសំដៅលើការកែលម្អ នូវការបង្កើតសមត្ថភាពស្ថាប័នសាធារណៈ និងលើកកម្ពស់អភិបាលរងខេត្ត បង្កើនការងារជូនប្រជាពលរដ្ឋ ធានាសម្មាករក្នុងសង្គម ព្រមទាំងរក្សាការពារសម្បត្តិធម្មជាតិ និងសម្បត្តិវប្បធម៌ ប្រឆាំងនឹងអំពើពុករលួយ ដែលសុទ្ធតែជាការងារគន្លឹះដ៏សំខាន់បំផុតសម្រាប់ការអភិវឌ្ឍន៍បែបលទ្ធិប្រជាធិបតេយ្យ ប្រកបដោយចីរភាពនឹងកាត់បន្ថយភាពក្រីក្ររបស់ប្រជាពលរដ្ឋ។ជាកិច្ចបញ្ចប់នៃពិធីថ្នាក់ដឹកនាំខេត្ត ក្រុងបានធ្វើការលែងសត្វ និងបង្ហោះប៉េងប៉ោងផងដែរ៕
.jpg)
.jpg)
.jpg)