កម្លាំងនគរបាលការពារព្រំដែនគោកលេខ៨១៥ និងយោធា ស្រុកម៉ាឡៃ ស្ទាក់ចាប់ឃាត់ខ្លួនពលករខ្មែរប្រុស ស្រីចំនួន២៣នាក់ ខណៈបម្រុងលួចឆ្លងដែនខុសច្បាប់ទៅប្រទេសថៃ
ខេត្តបន្ទាយមានជ័យ៖កម្លាំងនគរបាលការពារព្រំដែនគោកលេខ៨១៥ និងកម្លាំងយោធា ស្រុកម៉ាឡៃ ស្ទាក់ចាប់ឃាត់ខ្លួនពលករខ្មែរប្រុស ស្រីចំនួន២៣នាក់ កាលពីវេលាម៉ោង២០និង៥០នាទីយប់ ថ្ងៃទី២៨ ខែវិច្ឆិកា ឆ្នាំ២០២១ ខណៈបម្រុងលួចឆ្លងដែនខុសច្បាប់ទៅប្រទេសថៃ។
លោកវរសេនីយ៍ឯក សួង សៅ មេបញ្ជាកាវរៈនគរបាលការពារព្រំដែនគោកលេខ៨១៥ បានប្រាប់ភ្នាក់ងាយើងឲ្យដឹងនៅរសៀលថ្ងៃទី២៩ ខែវិច្ឆិកា នេះថា ដោយអនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការ នៃស្នងការដ្ឋាននគរបាលខេត្តបន្ទាយមានជ័យ ក្នុងការបង្ក្រាប និងទប់ស្កាត់នូវបទល្មើសផ្សេងៗ ពិសេសការលួចឆ្លងដែនដោយខុសច្បាប់នោះ លោកបានចាត់កម្លាំងដែលដឹកនាំដោយលោកវរសេនីយ៍ត្រី ណុប អឿន នាយប៉ុស្តិ៍ដើមត្រសេក សហការជាមួយកម្លាំងយោធាសឹករងស្រុកម៉ាឡៃ ចុះត្បាតជាប្រចាំ តាមបន្ទាត់ព្រំដែន លុះដល់ចំណុចប៉ាតង់ទឹក ស្ថិតក្នុងភូមិបឹងរាំង ឃុំអូរស្រឡៅ ស្រុកម៉ាឡៃ ខេត្តបន្ទាយមានជ័យ ក៏ប្រទះឃើញប្រជាពលរដ្ឋចំនួន ២៣នាក់ ក្នុងនោះមានស្រី១៣នាក់ កុមា០៣នាក់ បម្រុងឆ្លងដែនដោយខុសច្បាប់ទៅប្រទេសថៃ ក៏បានធ្វើការស្ទាក់ឃាត់ខ្លួន បញ្ជូនទៅប៉ុស្តិ៍ដើមត្រសេក ដើម្បីសួរនាំ ហើយពលករខ្មែរទាំងនេះគឺមកពីខេត្តសៀមរាបទាំងអស់។
លោកវរសេនីយ៍ឯក សួង សៅ បញ្ជាក់ថា ក្នុងការឃាត់ខ្លួនពលករទាំង២៣នាក់ខាងលើនេះ កម្លាំងបានអនុវត្តតាមការណែនាំរបស់ក្រសួងសុខាភិបាលយ៉ាងខ្ជាប់ខ្ជួន ហើយក្រោយពីសាកសួររួច ក៏បានប្រគល់ពួកគាត់ជូនផ្នែកជំនាញនៃអធិការដ្ឋាននគរបាលស្រុកម៉ាឡៃ ដើម្បីបន្តតាមនីតិវិធី៕