លោក លី សារី ដឹកនាំកិច្ចប្រជុំណែនាំ ស្ដីពីដំណើរការបោះឆ្នោត ស្ទាបស្ទង់ក្រុមប្រឹក្សាឃុំ អាណត្តិទី៥ ឆ្នាំ២០២២
ខេត្តបន្ទាយមានជ័យ៖លោក លី សារី សមាជិកអចិន្រ្តៃយ៍គណបក្សខេត្ត និងជាអនុប្រធានក្រុមការងារចុះជួយស្រុកមង្គលបូរី នៅថ្ងៃទី២៧ ខែវិច្ឆិកា ឆ្នាំ២០២១ អញ្ជើញជាអធិបតីក្នុងកិច្ចប្រជុំណែនាំ ស្ដីពីដំណើរការបោះឆ្នោត ស្ទាបស្ទង់ក្រុមប្រឹក្សាឃុំ អាណត្តិទី៥ ឆ្នាំ២០២២ របស់គណបក្សប្រជាជនកម្ពុជា គណៈកម្មាធិការ នៃគណបក្សស្រុកមង្គលបូរី។
ពិធីនេះបានប្រព្រឹត្តទៅ នៅទីស្នាក់ការគណបក្សប្រជាជនកម្ពុជា ស្រុកមង្គលបូរី ដោយមានការចូលរួមពីលោក លោកស្រី ក្រុមការងារខេត្តចុះជួយស្រុក ឃុំ និងគណៈអចិន្រ្តៃយ៍គណៈបក្សស្រុក រួមជាមួយគណៈកម្មាការគណៈបក្សឃុំទាំង១៣ ផងដែរ។
លោក រ័ត្ន ដាស៊ីណង់ បានមានប្រសាសន៍ដែថា៖មន្រ្តី ភូមិ ឃុំ ទាំងអស់ត្រូវខិតខំបន្ថែម ទៀតនូវការងារសំខាន់ៗ រួមមាន ត្រូវថែរក្សាសុខសន្តិភាព ស្ថិរភាពនយោបាយ និងរួមគ្នាទប់ស្កាត់ ប្រឆាំងដាច់ខាតសកម្មភាពនានាផងដែរ ដើម្បីឆ្ពោះទៅកាន់ការបោះឆ្នោតនាពេលខាងមុខ តាមរយៈ នៃការផ្សព្វផ្សាយសេចក្តីសម្រេចស្ដីពីផែនការកទៅកាន់ការបោះឆ្នោតជ្រើសរើស ក្រុមប្រឹក្សា ឃុំ សង្កាត់ អាណត្តិ ទី៥ ឆ្នាំ២០២២។
ថ្លែងក្នុងឱកាសនោះលោក លី សារី បានមានប្រសាសន៍ថា៖ការប្រជុំណែនាំស្ដីពី ដំណើរការបោះឆ្នោតស្ទាបស្ទង់ក្រុមប្រឹក្សាឃុំ អាណត្តិទី៥ ឆ្នាំ២០២២ គឺដើម្បីឱ្យសមាជិក សមាជិកាយើងបានយល់ដឹងកាន់តែច្បាស់ និងធ្វើការផ្សព្វផ្សាយបន្តជូនដល់បងប្អូនប្រជាពលរដ្ឋ បានជ្រាបពីព័ត៌មាន សំដៅធានាបានដល់ការជ្រើសរើសបេក្ខជនតំណាង ឃុំ សង្កាត់ គឺគណបក្សត្រឹមត្រូវ ហើយបេក្ខភាពដែលមានលក្ខណៈសម្បត្តិគ្រប់គ្រាន់មានការគាំទ្រពីប្រជាពលរដ្ឋ និងរក្សាបាននូវសាមគ្គីភាពផ្ទៃក្នុង។
លោកបានបញ្ជាក់ថា៖ មន្រ្តី ភូមិ ឃុំ ទាំងអស់ ត្រូវយកចិត្តទុក្ខដាក់ការផ្តល់សេវាសាធារណៈ និងការដោះស្រាយបញ្ហាប្រឈមនៅមូលដ្ឋាន ត្រូវបន្តជំរុញ និងលើកកម្ពស់ការផ្តល់សេវាសាធារណៈជូនប្រជាពលរដ្ឋ ប្រកបដោយប្រសិទ្ធភាព តម្លាភាព និង គណនេយ្យភាព ដើម្បីឆ្លើយតបតម្រូវការរបស់ប្រជាពលរដ្ឋ ដែលកាន់តែមានការកើនឡើង ក្នុងពេលដែល ប្រទេសជាតិយើងកំពុងមានការអភិវឌ្ឍរីកចម្រើនយ៉ាងឆាប់រហ័ស៕
.jpg)
