ឯកឧត្តម ម៉ៅ ធនិន ដឹកនាំកិច្ចប្រជុំបូកសរុបលទ្ធផលការងារ សម្រេចបាន៩ខែ និងលើកទិសដៅអនុវត្តបន្ត ត្រីមាសទី៤ ឆ្នាំ២០២១
ខេត្តកំពត៖ដើម្បីពិនិត្យមើលលទ្ធផលការងារ ដែលសម្រចបានកន្លងមក ក៏ដូចជាបញ្ហាប្រឈមនានា ដែលសាខាកាកបាទក្រហមកម្ពុជាខេត្តកំពតជួបប្រទះ និងធ្វើការដោះស្រាយនូវសំណូមពរមួយចំនួន ដែលមាននៅក្នុងសាខា និងអនុសាខានោះ កាលពីរសៀលថ្ងៃទី១២ ខែវិច្ឆិកា ឆ្នាំ២០២១ ឯកឧត្តម ម៉ៅ ធនិន ប្រធានគណៈកម្មាធិការសាខាកាកបាទក្រហមកម្ពុជាខេត្តកំពត និងជាអភិបាលខេត្ត បានដឹកនាំកិច្ចប្រជុំ បូកសរុបលទ្ធផលការងារសម្រេចបាន៩ខែ និងលើកទិសដៅអនុវត្តបន្ត ត្រីមាសទី៤ ឆ្នាំ២០២១។
កិច្ចប្រជុំនេះបានធ្វើនៅសាលាខេត្តកំពត មានការអញ្ជើញចូលរួមពីសមាជិក សមាជិកា គណៈកម្មាធិការសាខា ក្រុមប្រតិបត្តិសាខា ក្រុមកាកបាទក្រហមមន្ទីរ អង្គភាព អនុសាខា ក្រុង ស្រុក ទាំង៩ផងដែរ។
នាឱកាសនោះដែរឯកឧត្តម ម៉ៅ ធនិន បានមានប្រសាសន៍ថា គ្រប់ក្រុងស្រុកដែលងាយប្រឈមនឹងគ្រោះធម្មជាតិ ឱ្យត្រៀមគ្រប់លក្ខណ: ដើម្បីងាយស្រួលចុះអន្តរាគមន៍ នៅពេលហេតុការណ៍កើតឡើង ដោយគ្មានព្រាងទុក។
ឯកឧត្ដមប្រធានបន្តថា ជាធម្មតាភូមិសាស្ត្រនៃក្រុងស្រុកនីមួយៗមិនដូចគ្នាទេ ម្ល៉ោះហើយផលអាក្រក់ដែលទទួលរងពីគ្រោះធម្មជាតិ រមែងមានលក្ខណ:ខុសប្លែកគ្នា។ដូចជាតំបន់ជាប់ភ្នំតែងជួបប្រទះនូវព្យុះភ្លៀងបោកបក់ បង្កជាជំនន់លិចលង់ភូមិឋានស្រែចម្ការយ៉ាងឆាប់រហ័ស។ ដោយឡែកតំបន់មាត់សមុទ្ររមែងទទួលរងនូវខ្យល់កន្ត្រាក់ ផ្គររន្ទះងាយប្រឈមនឹងគ្រោះថ្នាក់ដូចជារលំផ្ទះសម្បែង ប៉ះពាល់អាយុជីវិតមនុស្សសត្វជាដើម។ដូច្នេះស្នើឲ្យមានការប្រុងប្រយ័ត្នជុំវិញករណីទាំងនេះ គ្រប់អនុសាខាក្រុង ស្រុកដែលប្រឈមទាំងនេះ ចាំបាច់ត្រូវតែត្រៀមគ្រប់លក្ខណ: ដើម្បីងាយស្រួល ចុះអន្តរាគមន៍ពេលហេតុការណ៍កើតឡើង៕
